ഇരുപത്തിയൊന്ന് ദിവസം ക്വാറന്റീനില്‍ കഴിഞ്ഞതിനെക്കുറിച്ചും ഇപ്പോള്‍ കോവിഡില്‍ നിന്നും മുക്തയായതിനെക്കുറിച്ചും തുറന്നു പറഞ്ഞു മലയാളത്തിന്റെ യുവനടി ഗൗതമി നായര്‍. പ്രത്യേക ലക്ഷണങ്ങളൊന്നും ഇല്ലായിരുന്നുവെന്നും പ്രൈമറി കോണ്ടാക്റ്റില്‍ ഉള്‍പ്പെട്ടിരുന്നതുകൊണ്ടാണ് ടെസ്റ്റ് നടത്താന്‍ തോന്നിയതെന്നും തനിക്കൊപ്പം സഹോദരിക്കും കോവിഡ് പോസിറ്റിവ് ആയെന്നും താരം പങ്കുവച്ചു.

ശ്രീചിത്രയില്‍ ന്യൂറോളജിയും റേഡിയോളജിയും ഒന്നിച്ചുള്ള ഒരു പ്രോജെക്റ്റില്‍ റീസേര്‍ച്ചര്‍ ആയി ജോലി നോക്കുകയാണ് ഗൗതമി ഇപ്പോള്‍. കോവിഡ് പകര്‍ന്നതിനെക്കുറിച്ചു താരം പറയുന്നതിങ്ങനെ.. 'തിരുവനന്തപുരം ശ്രീചിത്രയില്‍ റീസേര്‍ച്ചര്‍ ആയി ജോലി നോക്കുകയാണ്. അവിടെയുള്ള സുഹൃത്തിന്റെ ഡിപ്പാര്‍ട്മെന്റില്‍ കുറച്ചുപേര്‍ കോവിഡ് പോസിറ്റീവ് ആയിരുന്നു, ആ വഴിക്കാണ് എനിക്കും കോവിഡ് ബാധിച്ചതെന്നു കരുതുന്നു.

ഇടയ്ക്കിടെ ശക്തമായ തലവേദനയും വയറിനു വേദനയും ഉണ്ടായിരുന്നതൊഴിച്ചാല്‍ മറ്റു ലക്ഷണങ്ങളൊന്നും ഉണ്ടായിരുന്നില്ല. സഹോദരിക്കും കോവിഡ് ബാധിച്ചതോടെ വീട്ടിലുള്ള പ്രായമായവര്‍ക്ക് രോഗബാധ ഉണ്ടാകാതിരിക്കാന്‍ ആലപ്പുഴയുള്ള വീട്ടിലേക്ക് താമസം മാറി ക്വാറന്റീനില്‍ തുടരുകയായിരുന്നു. നഴ്സുമാരുടെയും ആരോഗ്യപ്രവര്‍ത്തകരുടെയും പിന്തുണ പറയാതെ വയ്യ. ആരോഗ്യം അറിയാനായി എല്ലാദിവസവും ഹെല്‍ത്ത് സെന്ററില്‍ നിന്നും ഞങ്ങളെ ബന്ധപ്പെടുന്നുണ്ടായിരുന്നു.

തലവേദന മരുന്നു കഴിച്ചപ്പോള്‍ മാറിയിരുന്നു. പക്ഷേ അതല്ലാതെ ഒരു ആരോഗ്യ പ്രശ്നവും ഇല്ലായിരുന്നു. കടുത്ത തലവേദനയെത്തുടര്‍ന്നാണ് കോവിഡ് ടെസ്റ്റ് ചെയ്തത്. പ്രൈമറി കോണ്ടാക്റ്റില്‍ ഉള്‍പ്പെട്ടില്ലായിരുന്നെങ്കില്‍ കൊറോണ പോസിറ്റിവ് ആണെന്ന് അറിയാനേ കഴിയില്ലായിരുന്നു.

അങ്ങനെയെങ്കില്‍ എത്രപേര്‍ക്ക് ഞാന്‍ കാരണം രോഗം ഉണ്ടായേനെ. അതുകൊണ്ട് ശരീരത്തില്‍ ഇതുമായി ബന്ധപ്പെട്ട എന്തെങ്കിലും അസ്വസ്ഥതകള്‍ വന്നുതുടങ്ങിയാല്‍ ഉടനെ തന്നെ ടെസ്റ്റ് നടത്തണം. അത് മറ്റുള്ളവരുടെ കൂടെ സുരക്ഷയ്ക്കു വേണ്ടിയാണ്. ഇപ്പോള്‍ ഞങ്ങള്‍ രണ്ടുപേരും പൂര്‍ണമായും രോഗമുക്തരായിക്കഴിഞ്ഞുവെന്നും ഗൗതമി പറഞ്ഞു.