പൃഥ്വിരാജിനെ കേന്ദ്രകഥാപാത്രമാക്കി ബ്ലെസ്സി ഒരുക്കിയ ചിത്രം 'ആടുജീവിതം' മികച്ച പ്രേക്ഷക പ്രതികരണം നേടി നാല് ദിവസം പൂര്‍ത്തി ആക്കുന്നതിന് മുന്‍പ് തന്നെ 50 കോടി ക്ലബ്ബിലും ഇടം പിടിച്ചു. നജീബ് എന്ന കഥാപാത്രമാവുന്നതിന് വേണ്ടി പൃഥ്വിരാജ് ചെയ്ത് ബോഡി ട്രാന്‍സ്‌ഫോമേഷന്‍ വലിയ രീതിയില്‍ ചര്‍ച്ചയായിരുന്നു. മാര്‍ച്ച് 28ന് ആയിരുന്നു ആടുജീവിതം റിലീസ് ചെയ്തത്.

മലയാളത്തില്‍ 2 ലക്ഷത്തോളം കോപ്പികള്‍ വിറ്റഴിഞ്ഞ നോവല്‍ കൂടിയാണ് യഥാര്‍ത്ഥ സംഭവവികാസങ്ങളെ ആസ്പദമാക്കി ബെന്യാമിന്‍ എഴുതിയ ആടുജീവിതം. നജീബ് എന്ന വ്യക്തി തന്റെ പ്രവാസ ജീവിതത്തില്‍ അനുഭവിച്ച ദുരിതങ്ങളും അതിജീവനവും പ്രമേയമാക്കിയാണ് ബെന്യാമിന്‍ ആടുജീവിതമെഴുതിയത്. ഇപ്പോഴിതാ യഥാര്‍ത്ഥ നജീബും സിനിമയിലെ നജീബും തമ്മില്‍ സംസാരിക്കുന്ന വീഡിയോ സമൂഹമാദ്ധ്യമങ്ങളില്‍ വൈറലാവുകയാണ്.

നജീബിനെ പൃഥ്വിരാജ് ഇന്റര്‍വ്യൂ ചെയ്യുന്ന വീഡിയോ ആണിപ്പോള്‍ ആടുജീവിതത്തിന്റെ പ്രൊഡക്ഷന്‍ കമ്പനിയായ വിഷ്വല്‍ റൊമാന്‍സിന്റെ യൂട്യൂബ് ചാനലിലൂടെ പുറത്തുവിട്ടിരിക്കുന്നത്. പങ്കുവെച്ച് നിമിഷങ്ങള്‍ക്കുള്ളില്‍ നിരവധി പേരാണ് വീഡിയോ പങ്കുവെക്കുന്നത്. പൃഥ്വിരാജും നജീബും തമ്മിലുള്ള സംഭാഷണമാണ് വീഡിയോയില്‍. ഇനി എന്നെങ്കിലും സംഭവം നടന്നിടത്ത് പോകാന്‍ അവസരം ലഭിച്ചാല്‍ പോകുമോ എന്നൊക്കെ പൃഥ്വിരാജ് ചോദിക്കുന്നുണ്ട്. ഇല്ലെന്ന് നജീബ് മറുപടിയും നല്‍കി.

നോവല്‍ പുറത്തിറങ്ങിയ ശേഷമാണ് കുടുംബം പോലും തന്റെ അവസ്ഥ അറിഞ്ഞതെന്നും നജീബ് പറയുന്നു. ആദ്യമായിട്ടാണ് താന്‍ അവതരിപ്പിച്ച ഒരു കഥാപാത്രത്തെ നേരില്‍ കാണുന്നതെന്ന് പറഞ്ഞാണ് വീഡിയോ ആരംഭിക്കുന്നത്. 1991ലാണ് നജീബ് വിദേശത്തേക്ക് പോകുന്നത്. സിനിമ ചിത്രീകരണം പൂര്‍ത്തിയായ ശേഷമാണ് നജീബിനെ പൃഥ്വിരാജ് കാണുന്നത്.

അതേസമയം എ.ആര്‍ റഹ്മാന്‍ സംഗീത സംവിധാനം നിര്‍വഹിക്കുന്ന ചിത്രത്തിന് വേണ്ടി റസൂല്‍ പൂക്കുട്ടിയാണ് ശബ്ദ മിശ്രണം ചെയ്തത്. കെ.എസ്. സുനിലാണ് ചിത്രത്തിന്റെ ഛായാഗ്രാഹകന്‍. ശ്രീകര്‍ പ്രസാദാണ് ചിത്രത്തിന്റെ എഡിറ്റിങ് നിര്‍വഹിച്ചിരിക്കുന്നത്. ജിമ്മി ജീന്‍ ലൂയിസ്, അമല പോള്‍, കെ ആര്‍ ഗോകുല്‍, താലിബ് അല്‍ ബലൂഷി, റിക്കബി എന്നിവരാണ് ചിത്രത്തിലെ മറ്റ് താരങ്ങള്‍. മലയാളത്തിന് പുറമെ ഹിന്ദി, തമിഴ്, തെലുങ്ക്, കന്നഡ എന്നീ ഭാഷകളില്‍ പാന്‍ ഇന്ത്യന്‍ ചിത്രമായാണ് ആടുജീവിതമെത്തിയിരിക്കുന്നത്.