മഞ്ഞുമ്മലി'ന്റെ കളക്ഷന് റെക്കാഡുകള്ക്ക് പിന്നില് ഇതോ?
പറവ ഫിലിംസിന്റെ ബാനറില് നടന് സൗബിന് ഷാഹിര്, പിതാവ് ബാബു ഷാഹിര്, ഷോണ് ആന്റണി എന്നിവര് ചേര്ന്നാണ് മഞ്ഞുമ്മല് ബോയ്സ് നിര്മ്മിച്ചത്. മഞ്ഞുമ്മലി'ന്റെ കളക്ഷന് റെക്കാഡുകള്ക്ക് പിന്നില് കള്ളപ്പണം വെളുപ്പിക്കലുമുണ്ടെന്ന വിവരമാണ് ഇപ്പോള് പുറത്തുവരുന്നത്. തമിഴ്നാട്ടില് നിന്ന് വന്ന തുകയുടെ ഒരുഭാഗം കള്ളപ്പണമാണെന്നാണ് ഇ.ഡിക്ക് ലഭിച്ച വിവരം. തിയറ്ററുകള് ഹൗസ്ഫുള് ആണെന്നു വരുത്തിത്തീര്ത്ത്, വ്യാജടിക്കറ്റ് വരുമാനം കള്ളപ്പണമായി എത്തിച്ചുവെന്നാണ് പരാതി.
തമിഴ്നാട്ടിലെ ഒരു സാമ്പത്തികത്തട്ടിപ്പുകേസ് പ്രതിയാണ് ഇതിനുപിന്നിലെന്ന് ആരോപണമുണ്ട്. കള്ളപ്പണം പറവ ഫിലിംസിന്റെ അടുത്ത നിര്മ്മാണസംരംഭങ്ങള്ക്ക് വിനിയോഗിക്കാനാണ് ലക്ഷ്യമിട്ടിരുന്നതത്രേ. അന്വേഷണത്തിന്റെ ഭാഗമായി ഇ.ഡി കഴിഞ്ഞദിവസം പറവയുടെ കൊച്ചി ഓഫീസില് റെയ്ഡ് നടത്തി. ഷോണ് ആന്റണിയില് നിന്ന് രണ്ടുതവണ മൊഴിയെടുക്കുകയും ചെയ്തു. സൗബിനെ അടുത്തദിവസം ചോദ്യം ചെയ്യാനാണ് ഇ.ഡിയുടെ നീക്കം. ഇതിനായി നോട്ടീസ് നല്കിയിട്ടുണ്ട്. ഇതോടെ നിര്മ്മാതാക്കള്ക്കെതിരേ കേസിനു പുറമേ കേസെന്ന സ്ഥിതിയായി.
മഞ്ഞുമ്മല് കൂട്ടായ്മയിലേക്ക് 7 കോടി രൂപയുടെ നിക്ഷേപവുമായി അരൂര് സ്വദേശി സിറാജ് വലിയതുറയും ചേര്ന്നു. അതായത്, സിനിമയുടെ മുടക്കുമുതലിന്റെ മൂന്നിലൊന്നും സിറാജാണ് നല്കിയതെന്നര്ത്ഥം. കളക്ഷന് അനുസരിച്ച് ലാഭവിഹിതം നല്കാമെന്നായിരുന്നു വാഗ്ദാനം. എന്നാല് ഒന്നുമുണ്ടായില്ല. സിറാജിന്റെ പരാതി ആദ്യമെത്തിയപ്പോള്, സിനിമയുടെ വിജയം മുതലെടുക്കാനുള്ള നീക്കമാണെന്ന് വിമര്ശിക്കപ്പെട്ടു.
എന്നാല് പരാതിയില് കഴമ്പുണ്ടെന്ന് കണ്ടെത്തിയ എറണാകുളം സബ്കോടതി, ഷോണ് ആന്റണിയുടെ അക്കൗണ്ട് മരവിപ്പിച്ചു. മരട് പൊലീസിനോട് അന്വേഷണത്തിനും നിര്ദ്ദേശിച്ചു. അറസ്റ്റ് തടയണമെന്നാവശ്യപ്പെട്ട് നിര്മ്മാതാക്കള് ഹൈക്കോടതിയെ സമീപിച്ചു. ഹര്ജിയില് പൊലിസ് നല്കിയ റിപ്പോര്ട്ട് ഗുരുതര ആരോപണങ്ങളടങ്ങിയതായിരുന്നു. പണം മുടക്കിയ സിറാജിനെ സൗബിന് അടക്കമുള്ളവര് പല വാക്കുകളും നല്കി ബോധപൂര്വം വഞ്ചിക്കുകയായിരുന്നുവെന്ന സൂചനയാണ് പൊലീസ് റിപ്പോര്ട്ടിലുള്ളത്.
'കണ്മണി അന്പോട്' പാട്ടിന്റെ ഹമ്മിംഗുകളാണ് മഞ്ഞുമ്മല് ബോയ്സ് ജനഹൃദയങ്ങളില് തങ്ങിനിന്നതിന്റെ ഒരു പ്രധാന ഘടകം. ഗുണ സിനിമയിലെ ഈ ഇളയരാജ ഗാനം മഞ്ഞുമ്മല് വഴി 2024ല് വീണ്ടും തരംഗമായി. ഗുണ റീലീസായ കാലത്ത് ജനിച്ചിട്ടില്ലാത്ത പുതുതലമുറയും പാട്ടു മൂളി നടന്നു. സമൂഹമാദ്ധ്യമങ്ങളില് പുതിയ റീല്സുകള് നിറഞ്ഞു. അതിനിടെയാണ് മഞ്ഞുമ്മല് നിര്മ്മാതാക്കള്ക്ക് ഇളയരാജയുടെ വക്കീല്നോട്ടീസെത്തിയത്.
തന്റെ പാട്ട് ഉപയോഗിക്കുക വഴി പകര്പ്പവകാശനിയമം ലംഘിച്ചുവെന്നാണ് രാജാ സാറിന്റെ ആരോപണം. സിനിമയുടെ ക്രെഡിറ്റില് ഇളയരാജയുടെ പേരു നല്കിയിട്ടുണ്ടെന്നാണ് മഞ്ഞുമ്മല് അണിയറക്കാര് വിശദീകരിച്ചത്. എന്നാല് അതുകൊണ്ടുമാത്രം കാര്യമില്ലെന്നും മതിയായ നഷ്ടപരിഹാരം വേണമെന്നുമാണ് ഇളയരാജയുടെ വക്കീല് നോട്ടീസില് പറയുന്നത്.
ഇത് ഒത്തുതീര്പ്പാവാത്ത പക്ഷം മറ്റൊരു നിയമനടപടിയിലേക്ക് നീങ്ങും. മഞ്ഞുമ്മല് ബോയ്സ് വഞ്ചനാകേസിന്റെ പശ്ചാത്തലത്തില് സമാനമായ പല ആക്ഷേപങ്ങളും സിനിമാ രംഗത്ത് അവിടവിടെയായി ഉയരുന്നുണ്ട്. ഇ.ഡിയടക്കം പല ഏജന്സികളും ഇവരുടെ പിന്നാലെയുണ്ട്. സിനിമയിലെ അനധികൃത ഇടപാടുകള്ക്ക് താല്ക്കാലികമായെങ്കിലും കടിഞ്ഞാണ് വീഴുമെന്ന് പ്രതീക്ഷിക്കാം.
https://www.facebook.com/Malayalivartha
