നടന് ജയസൂര്യ 'നന്മ മരം' ചമയുകയാണ്... വിമര്ശകന് മറുപടിയുമായി സംവിധായകന് രതീഷ് രഘുനന്ദന്
നടന് ജയസൂര്യ ചെയ്യുന്ന കാര്യങ്ങള് നന്മമരം ചമയലാണോ എന്നറിയില്ല... എനിക്കുണ്ടായ അനുഭവം പറയാം, വിമര്ശകന് മറുപടിയുമായി സംവിധായകന് രതീഷ് രഘുനന്ദന്. നടന് ജയസൂര്യ 'നന്മ മരം' ചമയുകയാണെന്ന് പലപ്പോഴായി ചിലര് സോഷ്യല് മീഡിയയിലൂടെ വിമര്ശിക്കാറുണ്ട്. സ്വന്തം സിനിമയുടെ റിലീസിന്റെ സമയത്ത് മാത്രമേ താരം പല സാമൂഹിക വിഷയങ്ങളിലും പ്രതികരിക്കാറുള്ളൂവെന്നൊക്കെ വിമര്ശനം ഉയര്ന്നിട്ടുണ്ട്. ജയസൂര്യയെക്കുറിച്ചുള്ള ഒരു ഫേസ്ബുക്ക് പോസ്റ്റിന് സംവിധായകന് രതീഷ് രഘുനന്ദന് നല്കിയ മറുപടിയാണ് ഇപ്പോള് സോഷ്യല് മീഡിയയില് ചര്ച്ചയായിക്കൊണ്ടിരിക്കുന്നത്.
മലയാള സിനിമയില് നന്മമരം ചമയുന്ന നടന് ജയസൂര്യയാണെന്ന തരത്തിലായിരുന്നു പോസ്റ്റ്. ഇതിനുതാഴെയായി നന്മമരം ചമയുന്നതാണോ എന്നറിയില്ല എന്നു പറഞ്ഞുകൊണ്ട് കൊവിഡ് കാലത്ത് ജയസൂര്യ നല്കിയ പണത്തെക്കുറിച്ച് സംവിധായകന് വെളിപ്പെടുത്തി.
'നന്മമരം ചമയലാണോ എന്നറിയില്ല. എനിക്കുണ്ടായ അനുഭവം പറയാം. ഞങ്ങള് ഒരുമിച്ചു ഒരു സിനിമ ചെയ്യാന് തീരുമാനിക്കുന്നു. വിജയ് ബാബു നിര്മാതാവ്. പ്രീ പ്രൊഡക്ഷന് തുടങ്ങി ദിവസങ്ങള്ക്കകം കൊവിഡും ലോക്ഡൗണും വരുന്നു. എല്ലാം പൂട്ടിക്കെട്ടി. രണ്ടോ മൂന്നോ മാസങ്ങള് കഴിഞ്ഞപ്പോള് ജയേട്ടന്റെ വിളി ''എങ്ങനെ പോകുന്നെടാ കാര്യങ്ങള്?'', ഇങ്ങനെയൊക്കെ പോകുന്നുവെന്നു ഞാന് പറഞ്ഞു.
''ഇത്തിരി പൈസ അക്കൗണ്ടില് ഇട്ടിട്ടുണ്ട് ട്ടോ''. വേണ്ട എന്ന് പറയാവുന്ന സാഹചര്യം ആയിരുന്നില്ല. ജയസൂര്യ എന്ന നടന് എന്നെ പോലെ ഒരാളെ ഓര്ത്തു സഹായിക്കേണ്ട ഒരു കാര്യവും ഉണ്ടായിരുന്നില്ല. ആ രണ്ട് ലക്ഷം ഇന്നും തിരിച്ചു വാങ്ങിയിട്ടുമില്ല. ഇതും നന്മമരം ചമയലിന്റെ ഭാഗമാകാം. അറിയില്ല.'- എന്നാണ് സംവിധായകന് കമന്റ് ചെയ്തിരിക്കുന്നത്.
https://www.facebook.com/Malayalivartha
