ബ്യൂണസ് എയർസിലെ ഹോട്ടലിലെ മൂന്നാം നിലയിൽ നിന്ന് താഴെ വീണ് ബ്രിട്ടിഷ് ഗായകൻ ലിയം പെയ്ൻ അന്തരിച്ചു. 31 വയസ്സായിരുന്നു. ബുധനാഴ്ച വൈകിട്ടായിരുന്നു അപകടം. പ്രശസ്തമായ വൺ ഡയറക്ഷൻ എന്ന ബ്രിട്ടിഷ് ബോയ്ബാൻഡിലൂടെ ശ്രദ്ധ നേടിയ യുവഗായകനായിരുന്നു ലിയം പെയ്ൻ. ‘ദി എക്സ് ഫാക്ടർ’ എന്ന റിയാലിറ്റി ഷോയിലൂടെ രംഗത്തു വന്ന താരങ്ങൾ ഒന്നിച്ച്  2010ൽ രൂപീകരിച്ച ബാൻഡായിരുന്നു വൺ ഡയറക്ഷൻ. 2015ൽ ബാൻഡ് വേർപിരിയൽ പ്രഖ്യാപിച്ചതിനു പിന്നിലെ സോളോ ആൽബങ്ങളിലൂടെയാണ് ലിയം പെയ്ൻ വാർത്തകളിൽ നിറഞ്ഞത്. ഗായകന്റെ ആദ്യ സോളോ ആൽബമായ ‘എൽപി1’ 2019ൽ പുറത്തിറങ്ങി. പുതിയ സോളോ ആൽബത്തിന്റെ പണിപ്പുര‌യിലിരിക്കെയാണ് അപ്രതീക്ഷിത അപകടവും മരണവും.