ഇന്ന് മലയാളത്തിൽ ഏറ്റവും തിരക്കുള്ള മ്യൂസിക്ക് ഡയറക്ടറാണ് ​ഗായകൻ സുഷിൻ. ഭീഷ്മപർവം, രോമാഞ്ചം, മഞ്ഞുമ്മൽ ബോയ്സ്, ആവേശം തുടങ്ങിയവാണ് സുഷിൻ സം​ഗീതം നൽകി ​ഗാനങ്ങൾ ഒരുക്കിയ ചിത്രങ്ങളിൽ ചിലത്.

സംഗീത സംവിധായകൻ സുഷിൻ ശ്യാം ഇന്ന് വിവാഹിതനായി. ഉത്തരയാണ് വധു. ക്ഷേത്രത്തിലെ താലികെട്ട് ചടങ്ങുകൾക്കെല്ലാം നടൻ ജയറാമാണ് കാരണവർ സ്ഥാനത്ത് നിന്ന് നേതൃത്വം നൽകിയതും കാര്യങ്ങൾ നിയന്ത്രിച്ചതും. ജയറാം മാത്രമല്ല ഭാര്യ പാർവതി മകനും നടനുമായ കാളിദാസ് തുടങ്ങിയവരെല്ലാം വിവാഹ​ത്തിൽ പങ്കെടുക്കാൻ എത്തിയിരുന്നു.

നടിയും ജയറാമിന്റെ ഭാര്യയുമായ പാർവതിയുടെ സഹോദരി പുത്രിയാണ് സുഷിന്റെ വധു ഉത്തര. അതിനാലാണ് ജയറാമും കുടുംബവും ചടങ്ങിൽ നിറഞ്ഞ് നിന്നത്. മാസങ്ങൾക്ക് മുമ്പ് നടന്ന ജയറാമിന്റെ മകൾ മാളവികയുടെ വിവാഹത്തിന് സുഷിൻ ഉത്തരയ്ക്കൊപ്പം എത്തിയിരുന്നു. അന്ന് ഭാര്യയെന്ന് പറഞ്ഞാണ് ഉത്തരയെ മീഡിയയ്ക്ക് സുഷിൻ പരിചയപ്പെടുത്തിയത്. വിവാഹ ചിത്രങ്ങൾ പുറത്തുവന്നതോടെ നിരവധി ആരാധകരാണ് വധൂവരന്മാർക്ക് ആശംസകൾ നേർന്നെത്തിയത്.