പ്രശസ്ത കന്നഡ സിനിമ സംവിധായകൻ ഗുരുപ്രസാദ് അന്തരിച്ചു. 52 വയസായിരുന്നു പ്രായം. മദനായകനഹള്ളിയിലെ അപ്പാർട്‌മെൻറിൽ ആയിരുന്നു മരിച്ച നിലയിൽ കണ്ടെത്തിയത്. ഞായറാഴ്‌ചയായിരുന്നു സംഭവം. ഫാനിൽ തൂങ്ങിയ നിലയിലായിരുന്നു മൃതദേഹം. അപ്പാർട്‌മെൻറിൽ നിന്ന് രൂക്ഷ ദുർഗന്ധം വന്നതിനെ തുടർന്ന് അയൽവാസികൾ പോലീസിനെ അറിയിക്കുകയായിരുന്നു.

തുടർന്ന് നടത്തിയ പരിശോധനയിലാണ് ഗുരുപ്രസാദിന്റെ മൃതദേഹം കണ്ടെത്തിയത്. മൃത​ദേഹത്തിന് ദിവസങ്ങളുടെ പഴക്കമുണ്ടെന്ന് പോലീസ് പറഞ്ഞു. എന്നാൽ മരണ കാരണം വ്യക്തമല്ല. ഫൊറൻസിക് സംഘം സ്ഥലത്തെത്തി സ്ഥലത്ത്പ രിശോധന നടത്തി മൃതദേഹം പോസ്‌റ്റുമോർട്ടത്തിന് അയച്ചു.

സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. ഗുരുപ്രസാദ് കടുത്ത സാമ്പത്തിക ബാധ്യതയിലായിരുന്നുവെന്നാണ് വിവരം. മാത്രമല്ല, പണം തിരികെ കൊടുക്കാത്തതുമായി ബന്ധപ്പെട്ട് നിരന്തരം സമ്മർദ്ദമുണ്ടായിരുന്നുവെന്നുമാണ് പോലീസ് പറയുന്നത്. സംഭവവുമായി ബന്ധപ്പെട്ട് കൂടുതൽ വിവരങ്ങൾ ലഭിക്കുമെന്നാണ് കരുതുന്നതെന്ന് പോലീസ് പറഞ്ഞു.

കന്നഡ ചലച്ചിത്ര മേഖലയിലെ പ്രധാനിയാണ് ഗുരുപ്രസാദ്. മാത, എഡ്‌ഡെഡ്‌ലു മഞ്ജുനാഥ, ഡയറക്‌ടേഴ്‌സ് സ്‌പെഷൽ തുടങ്ങിയവയാണ് പ്രധാനപ്പെട്ട സിനിമകൾ. അഡേമ എന്ന ചിത്രത്തിൻറെ പ്രവർത്തനങ്ങൾ നടക്കുമ്പോഴായിരുന്നു അപ്രതീക്ഷിത മരണം. പത്തു സിനിമകളിലോളം അദ്ദേഹം അഭിനയിച്ചിട്ടുണ്ട്.