നിരവധി ആരാധകരുള്ള താരമാണ് വിജയ് ദേവരക്കൊണ്ട. ഇപ്പോഴിതാ ഷൂട്ടിം​ഗിനിടെ നടന് പരിക്കേറ്റുവെന്നാണ് റിപ്പോർട്ടുകൾ. വിഡി 12 എന്ന് താല്ക്കാലികമായി പേരിട്ടിരിക്കുന്ന സിനിമയുടെ ചിത്രീകരണത്തിനിടെയാണ് നടന് പരിക്കേറ്റത്. ആക്ഷൻ രം​ഗങ്ങൾ ചിത്രീകരിക്കുന്നതിനിടെ തോളിനാണ് താരത്തിന് പരിക്കേറ്റതെന്നാണ് വിവരം.

എന്നാൽ താരത്തിന്റെ പരിക്ക് ​ഗുരുതരമല്ലെന്നും താരത്തിന് ഫിസിയോ ചെയ്യുന്നുണ്ടെന്നുമാണ് നടനോട് അടുത്തവൃത്തങ്ങൾ പറയുന്നത്. ആക്ഷൻ രം​ഗങ്ങൾക്ക് ഏറെ പ്രാധാന്യമുള്ള ചിത്രമാണ് വിഡി 12. സിനിമയ്ക്കായി താരം നടത്തിയ കഠിന പരിശീലനങ്ങളുടെ വി‍ഡിയോയും മുൻപ് സോഷ്യൽ മീഡിയയിൽ വൈറലായി മാറിയിരുന്നു.

വിജയ് ദേവരകൊണ്ട, ഭാഗ്യശ്രീ ബോർസ്, രുക്മിണി വസന്ത് എന്നിവരാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. അനിരുദ്ധ് രവിചന്ദർ ആണ് ചിത്രത്തിൻറെ സംഗീതം. അടുത്തവർഷം മാർച്ച് 28ന് ചിത്രം റിലീസാകുമെന്നാണ് വിവരം. ഗൗതം തന്നൂരിയാണ് വിഡി 12 സംവിധാനം ചെയ്യുന്നത്.
‌
തെലുങ്കിലെ സൂപ്പർ സ്റ്റാറുകൾക്കൊപ്പമാണ് ഇന്ന് വിജയ് ദേവരകൊണ്ടയുടെ സ്ഥാനം. തെലുങ്കിൽ മാത്രമല്ല, തെന്നിന്ത്യയിലും ലൈഗറിന്റെ റിലീസോടെ ബോളിവുഡിലും ആരാധകരുള്ള നടനാണ് വിജയ് ദേവരകൊണ്ട. തെലുങ്കിലെ ഏറ്റവും പ്രതിഫലം വാങ്ങുന്ന നടന്മാരിൽ ഒരാൾ കൂടിയാണ് ഇന്ന് വിജയ് ദേവര കൊണ്ട.