സ്ത്രീവിരുദ്ധ കമന്റുകള്‍ ചെയ്തവര്‍ക്കെതിരെ പരാതി നല്‍കിയ ഹണി റോസിപ്പോള്‍ ബോബി ചെമ്മണ്ണൂരിനെതിരെ പരസ്യമായി രംഗത്ത് വന്നു കഴിഞ്ഞു. പരാതിനല്‍കിയതിന് പിന്നാലെ താരത്തിന് വന്‍ ജന പിന്തുണയാണ് ഉണ്ടായിരിക്കുന്നത്.

ഹണി റോസിന്റെ കമന്റ് ബോക്‌സ് നിറയെ പ്രശംസാപ്രവാഹം ആണ്. കൃത്യമായ നിലപാട് തുറന്നുപറഞ്ഞ് നിയമത്തിന്റെ വഴിയെ തിരിഞ്ഞ താരത്തിന് അഭിനന്ദനങ്ങള്‍ അറിയിക്കുകയാണ് ഏവരും. 'ഇതാണ് കൃത്യമായ നിലപാട്. പേര് എടുത്ത് പറഞ്ഞ ഈ ആര്‍ജ്ജവത്തിന് ബിഗ് സല്യൂട്ട്. ഇതാണ് പെണ്‍പോരാട്ടം', എന്നാണ് ഒരാള്‍ കമന്റ് ചെയ്തിരിക്കുന്നത്.

'നന്നായി പേര് പരസ്യമാക്കിയത്. മുഖം മൂടികള്‍ പൊളിഞ്ഞു വീഴണം, നിങ്ങളോട് യോജിക്കുന്നു ഐക്യദാര്‍ഢ്യം അറിയിക്കുന്നു, ഇതു പോലെ എല്ലാപേരും പ്രതികരിക്കട്ടെ. അഭിപ്രായ സ്വാതന്ത്ര്യം ഉണ്ടെന്ന് കരുതി ആര്‍ക്കും ആരെയും എന്തും പറയാം എന്നുള്ളത് മാറണം. ഇത് ഒരു തുടക്കമാകട്ടെ, മറ്റു സ്ത്രീകള്‍ക്കു പ്രചോദനമാവട്ടെ', എന്നിങ്ങനെ പോകുന്നു മറ്റ് കമന്റുകള്‍.

അതേസമയം, 'കമന്റ് ബോക്‌സുകളില്‍ നല്ല കമന്റുകള്‍ വന്നതിനെ ചൂണ്ടിക്കാണിക്കുന്നവരും കൂട്ടത്തിലുണ്ട്. കമന്റ് ബോക്‌സ് എന്താ വൃത്തി. രണ്ട് കേസ് വന്നപ്പോള്‍ എല്ലാത്തിന്റെയും ധൈര്യം അങ്ങ് ചോര്‍ന്ന് പോയി', എന്നാണ് ഇവര്‍ കമന്റ് ചെയ്യുന്നത്. ഹണി റോസിന്റെ പരാതിയില്‍ ബോബി ചെമ്മണ്ണൂരിനെതിരെ കേസെടുക്കും. ലൈംഗിക അധിക്ഷേപം നടത്തിയതിനാണ് കേസെടുക്കുക. ജാമ്യമില്ലാ വകുപ്പുകളാണ് ഇയാള്‍ക്കെതിരെ ചുമത്തിയിരിക്കുന്നത്. നാല് മാസം മുന്‍പ് ഒരു ഉദ്ഘാടനത്തിനിടെ തനിക്ക് മോശം അനുഭവം ഉണ്ടായെന്ന് ചൂണ്ടിക്കാട്ടിയാണ് ഹണി പരാതി നല്‍കിയത്.