മലയാളികളുടെ പ്രിയപ്പെട്ട താരമാണ് അനുശ്രീ. ഡയമണ്ട് നെക്ലേസ് എന്ന ലാല്‍ ജോസ് ചിത്രത്തിലൂടെയാണ് അനുശ്രീയുടെ അരങ്ങേറ്റം. പിന്നീട് നിരവധി സിനിമകളുടെ ഭാഗമായി മാറാന്‍ നടിക്ക് കഴിഞ്ഞു. ഒരു റിയാലിറ്റി ഷോയിലൂടെയാണ് അനുശ്രീ അഭിനയരംഗത്തേക്ക് കടന്നുവരുന്നത്. സിനിമയില്‍ സജീവമായി നില്‍ക്കുമ്പോഴും നാടുമായും നാട്ടുകാരുമായും വളരെ അടുത്ത ബന്ധം സൂക്ഷിക്കുന്ന വ്യക്തിയാണ് അനുശ്രീ.

ഇപ്പോഴിതാ സ്വന്തം നാട്ടിലെ ക്ഷേത്രോത്സവത്തിന് സുഹൃത്തുക്കള്‍ക്കൊപ്പം ചേര്‍ന്ന് കൈകൊട്ടി കളി അവതരിപ്പിച്ച അനുശ്രീയുടെ വീഡിയോയാണ് സമൂഹമാധ്യമങ്ങളില്‍ ശ്രദ്ധ നേടുന്നത്. കടുംനീലയും ചുവപ്പും കലര്‍ന്ന ദാവണിയുടുത്ത് തലയില്‍ മുല്ലപ്പൂ ചൂടി നാടന്‍ ചുവടുകളുമായി ആടിക്കളിക്കുന്ന അനുശ്രീയുടെ വിഡിയോ ആരാധക ശ്രദ്ധ നേടി. അനുശ്രീയുടെ മേക്കപ്പ് ആര്‍ടിസ്റ്റ് പിങ്കി വിശാലാണ് വിഡിയോ സമൂഹമാധ്യമങ്ങളില്‍ പങ്കുവച്ചത്.

'അനുവിന്റെ സ്വന്തം നാട്ടിലെ കമുകുംചേരി തിരുവിളങ്ങോനപ്പന്‍ അമ്പലത്തില്‍ ഉത്സവത്തിന്റെ ഭാഗമായി അനുവും നാട്ടിലെ സുഹൃത്തുക്കളും ചേര്‍ന്ന് കൈകൊട്ടി കളി' എന്നാണ് വിഡിയോ പങ്കുവച്ച് പിങ്കി വിശാല്‍ കുറിച്ചത്.

വലിയ സ്വീകാര്യതയാണ് അനുശ്രീയുടെ ഡാന്‍സ് വിഡിയോയ്ക്ക് ലഭിക്കുന്നത്. കുറച്ച് പ്രശസ്തി വന്നാല്‍ പിന്നെ നാടും വീടും മറക്കുന്ന സെലിബ്രിറ്റികള്‍ക്കിടയില്‍ അനുശ്രീ വേറിട്ടു നില്‍ക്കുന്നുവെന്നാണ് ഒരു ആരാധകന്‍ കുറിച്ച കമന്റ്. 'ഒരു സിനിമാതാരം ആണെന്നുള്ള എന്തെങ്കിലും ജാഡ ഉണ്ടോ?' എന്ന ചോദ്യമാണ് കമന്റ് ബോക്‌സില്‍ ഒറു ആരാധിക കുറിച്ചത്.