ഉപ്പും മുളകില് നിന്ന് ഇടവേളയെടുക്കുകയാണെന്ന് സിദ്ധാര്ത്ഥ്
തട്ടീം മുട്ടീം എന്ന സീരിയലിലൂടെ ജനശ്രദ്ധ പിടിച്ചു പറ്റിയ നടനാണ് സിദ്ധാര്ത്ഥ് പ്രഭു. പിന്നീട് ചില സിനിമകളിലും വേഷമിട്ടു. അടുത്തിടെയാണ് ഉപ്പും മുളകും പരമ്പരയില് ലച്ചുവിന്റെ (ജൂഹി റുഹ്തഗി) ഭര്ത്താവായി താരം എത്തിയത്. ഡെയ്ന് ഡേവിസാണ് ആദ്യം ഈ വേഷം ചെയ്തിരുന്നത്. സിദ്ധാര്ത്ഥ് പ്രഭുവിന്റെ വാഹനം ഇടിച്ച് ചികിത്സയിലായിരുന്ന വയോധികന് മരിച്ചതിനെത്തുടര്ന്ന് അടുത്തിടെ ചില വിവാദങ്ങളിലും താരം അകപ്പെട്ടിരുന്നു.
ക്രിസ്മസ് തലേന്ന് രാത്രിയിലാണ് മദ്യപിച്ച് അമിതവേഗത്തില് വാഹനം ഓടിച്ച സിദ്ധാര്ത്ഥ് വയോധിനെ ഇടിച്ചിട്ടത്. ഒരിടവേളക്കു ശേഷം ഉപ്പും മുളകിലേക്ക് താരം തിരിച്ചെത്തുകയും ചെയ്തിരുന്നു. ഇപ്പോഴിതാ താന് വീണ്ടും ഉപ്പും മുളകില് നിന്ന് ഇടവേള എടുക്കുകയാണെന്ന് അറിയിച്ച് എത്തിയിരിക്കുകയാണ് സിദ്ധാര്ത്ഥ്.
''ഉപ്പും മുളകും എന്ന പരമ്പരയില് നിന്ന് കുറച്ച് കാലത്തേക്ക് ഒരു ചെറിയ ഇടവേള എടുക്കാന് ഞാന് തീരുമാനിച്ചിരിക്കുകയാണ്. ഇത് ഒരു വിടപറയലല്ല, ഒരു ചെറിയ ഇടവേള മാത്രമാണ്. ഇനി ഒരിക്കല് തിരികെ വരാന് തീരുമാനിക്കുകയാണെങ്കില് അത് ഞാന് തീര്ച്ചയായും നിങ്ങളെയെല്ലാം അറിയിക്കും. ഈ യാത്രയില് എന്നില് വിശ്വാസമര്പ്പിക്കുകയും ഇത്ര മനോഹരമായൊരു അവസരം നല്കുകയും ചെയ്ത ഫഌവഴ്സ് ടിവിയോട് ഹൃദയത്തിന്റെ ആഴങ്ങളില് നിന്ന് നന്ദി അറിയിക്കുന്നു. ഞങ്ങളുടെ സംവിധായകന്, തിരക്കഥാകൃത്തുകള്, നിര്മാതാക്കള്, ടെക്നീഷ്യന്മാര്, ക്യാമറ ടീം, മേക്കപ്പ് ആര്ട്ടിസ്റ്റുകള്, കോസ്റ്റ്യൂം ടീം, പ്രൊഡക്ഷന് സ്റ്റാഫ്, ക്യാമറയ്ക്ക് പിന്നില് അക്ഷീണം പ്രയത്നിച്ചവര്... ഓരോരുത്തര്ക്കും എന്റെ പ്രത്യേകം നന്ദി. നിങ്ങളാണ് ഒരിക്കലും മറക്കാനാകാത്ത അനുഭവമായി ഇതിനെ മാറ്റിയത്'', സിദ്ധാര്ത്ഥ് ഇന്സ്റ്റഗ്രാമില് കുറിച്ചു.
https://www.facebook.com/Malayalivartha
