രേഖാ മോഹന്റെ മരണം: അന്വേഷണം ഭര്‍ത്താവിലേക്കും; ടേബിളില്‍ ചാരിക്കിടന്ന് വിശ്രമിക്കുന്ന രേഖയുടെ അവസാന വീഡിയോ
സിനിമ സീരിയല്‍ നടി രേഖാമോഹന്റെ(45) മരണത്തില്‍ അന്വേഷണം ഭര്‍ത്താവിലേക്കും നീളുന്നു. മരണത്തിലെ ദുരൂഹത മാറ്റാന്‍ ഭര്‍ത്താവിനെ പൊലീസ് ചോദ്യം ചെയ്യും. പോസ്റ്റ്‌മോര്‍ട്ടം റിപ്പോര്‍ട്ട് ലഭിച്ചാല്‍ മാത്രമേ കൂടുതല്‍ വിവരങ്ങള്‍ ലഭ്യമാകൂവെന്ന് പൊലീസ് അറിയിച്ചു. അസ്വാഭാവികമരണത്തിന് കേസെടുത്തിട്ടുണ്ട്. കൊലപാതകമല്ലെന്ന നിഗമനത്തില്‍ പൊലീസ് എത്തിയിട്ടുണ്ട്. ആത്മഹത്യയോ സ്വാഭാവിക മരണമോ എന്ന് ഉറപ്പിക്കാനാണ് പൊലീസ് ശ്രമം.
ഇതിനായി രേഖാ മോഹന്റെ ആന്തരികാവയവങ്ങള്‍ പരിശോധനയ്ക്കായി കാക്കനാട്ടെ ലാബിലേക്ക് അയച്ചു. രേഖാമോഹനെ ഫ്‌ളാറ്റിനകത്ത് മരിച്ച നിലയില്‍ ശനിയാഴ്ചയാണ് കണ്ടത്. മൃതദേഹം പോസ്റ്റ്‌മോര്‍ട്ടത്തിനുശേഷം ബന്ധുക്കള്‍ക്ക് വിട്ടുകൊടുത്തു.
മലേഷ്യയിലായിരുന്ന ഭര്‍ത്താവ് മോഹന്‍ എത്തിയിരുന്നു. ശോഭാ സിറ്റിയിലെ ഫ്‌ളാറ്റില്‍ രേഖാമോഹന്‍ ഒറ്റയ്ക്കാണ് താമസിച്ചിരുന്നത്. മരണം രണ്ടുദിവസം മുന്‍പ് നടന്നിരിക്കാമെന്ന് പൊലീസ് പറഞ്ഞു. ഒരാഴ്ച മുന്‍പാണ് ഇവര്‍ വിദേശത്തുനിന്ന് തിരിച്ചെത്തിയത്. ഈ സാഹചര്യത്തിലാണ് ഭര്‍ത്താവിനെ പൊലീസ് ചോദ്യം ചെയ്യുന്നത്.
വിദേശത്ത് വ്ച്ച് എന്തെങ്കിലും കുടുംബ പ്രശ്‌നങ്ങള്‍ ഉണ്ടായിട്ടുണ്ടോയെന്നാണ് പൊലീസ് പരിശോധിക്കുന്നത്. വിഷം കഴിച്ചാകും മരണമെന്നാണ് പ്രാഥമിക നിഗമനം. മോഹന്‍ ഫോണിലൂടെ വിളിച്ചിട്ട് കിട്ടാതായപ്പോള്‍ ഡ്രൈവറെ വിളിച്ചറിയിക്കുകയായിരുന്നു. ഡ്രൈവര്‍ ഫ്‌ളാറ്റിലെത്തി വിളിച്ചിട്ടും മറുപടി ലഭിച്ചില്ല. വിയ്യൂര്‍ പൊലീസ് എത്തി വാതില്‍ തുറന്നുനോക്കിയപ്പോഴാണ് മരിച്ചനിലയില്‍ കണ്ടെത്തിയത്. ഒമ്പതാം നിലയിലെ ഫ്‌ളാറ്റിലാണ് ഇവര്‍ താമസിച്ചിരുന്നത്. പത്താം തീയതിവരെ ഡ്രൈവറുമായി ഇവര്‍ ഫോണിലൂടെ ബന്ധപ്പെട്ടിരുന്നു. ഉന്നത പൊലീസ് സംഘം, പോസ്റ്റുമോര്‍ട്ടം നടത്തിയ തൃശ്ശൂര്‍ മെഡിക്കല്‍ കോളേജിലെത്തിയിരുന്നു.
കസേരയില്‍ ഇരിക്കുന്ന നിലയിലായിരുന്നു മൃതദേഹം. രണ്ടു ദിവസത്തെ പത്രം എടുത്തിട്ടില്ല. തിങ്കളാഴ്ച രാത്രിക്കു ശേഷമായിരിക്കും മരണമെന്നു പൊലീസ് കരുതുന്നു. തിങ്കളാഴ്ച ഉച്ചയ്ക്ക് ഇവര്‍ ഭക്ഷണം പുറത്തുനിന്നു വരുത്തിയിരുന്നു. ഇതു കഴിച്ചിട്ടുണ്ട്. എന്നാല്‍ ഇതിനു ശേഷം ആരും ഇവരെ കണ്ടിട്ടില്ല. വിരലടയാള വിദഗ്ധരും പൊലീസും ചേര്‍ന്ന് ഇന്‍ക്വസ്റ്റ് നടപടികള്‍ പൂര്‍ത്തിയാക്കിയത്. സീരിയലുകളിലും സജീവമായിരുന്ന രേഖ ഇടക്കാലത്ത് സിനിമാ സീരിയല്‍ രംഗത്ത് നിന്നും അകന്ന് നില്‍ക്കുകയായിരുന്നു.
സ്ത്രീജന്മം എന്ന ടിവി പരമ്പരയില്‍ മായമ്മയായി ജനപ്രീതി നേടിയ താരമാണ് രേഖാ മോഹന്‍. മലയാളിയുടെ തനത് ഭാവങ്ങളുമായി ക്യാമറയ്ക്ക് മുമ്പിലെത്തി കുടുംബ പ്രേക്ഷകരുടെ പ്രിയ കഥാപാത്രമായി മായമ്മ മാറിയിരുന്നു. ഉദ്യാനപാലകന്‍ എന്ന സിനിമയില്‍ മമ്മൂട്ടിയുടെ സഹോദരിയായി അഭിനയിച്ചു ശ്രദ്ധ നേടിയിരുന്നു. മോഹന്‍ലാലിന്റെ യാത്രമൊഴിയും ദിലീപിന്റെ നീവരുവോളവും രേഖാ മോഹനെ നടിയെന്ന നിലയില്‍ മലയാളി അംഗീകരിച്ച സിനിമകളാണ്.
https://www.facebook.com/Malayalivartha
