സീരിയലില്‍ അഭിനയിച്ചതിന് തന്നെ ഒരു പ്രമുഖ നടന്‍ വഴക്ക് പറഞ്ഞെന്ന് നടി ശാന്തികൃഷ്ണ. മടങ്ങിവരവില്‍ സിനിമയിലോ സീരിയലിലോ അഭിനയിക്കാനാണ് താരം ശ്രമിക്കുന്നത്. അതിനിടെയാണ് ഇക്കാര്യം വെളിപ്പെടുത്തിയത്. സിനിമകളില്‍ അവസരം കുറയുന്നവരാണ് സീരിലുകളില്‍ അഭിനയിക്കുക എന്നാണ് പലരുടെയും ധാരണ. എന്നാലത് ശരിയല്ലെന്നും താരം പറഞ്ഞു. നീയെന്തിനാണ് സീരിയലുകളില്‍ അഭിനയിക്കുന്നത്, സിനിമാ താരങ്ങള്‍ക്കൊരു വിലയുണ്ട്. അത് കളയരുതെന്നാണ് നടന്‍ പറഞ്ഞത്. അത് തന്നോടുള്ള സ്‌നേഹം കൊണ്ടായിരുന്നെന്നും താരം വ്യക്തമാക്കി.

സിനിമാ അഭിനയവും സീരിയല്‍ അഭിനയവും തമ്മില്‍ വ്യത്യാസമില്ല. ആകെയുള്ള കാര്യം ക്യാമറമാത്രമാണ്. സിനിമയില്‍ അഭിനയിച്ചതിനേക്കാള്‍ ജനപിന്തുണയും ആരാധകരെയും ലഭിച്ചത് സീരിയലുകളില്‍ അഭിനയിച്ചത് വഴിയാണെന്നും ശാന്തികൃഷ്ണ ഓര്‍മിക്കുന്നു. മോഹപ്പക്ഷികളും സ്‌കൂട്ടറും കുതിരകളുമൊക്കെ ദൂരദര്‍ശനില്‍ വരുന്നത് കാണാന്‍ ആവേശത്തോടെയാണ് പലരും ഇരുന്നിരുന്നത്. ഇന്നും നാല്പതു വയസ്സുള്ള സ്ത്രീകള്‍ കാണുമ്പോള്‍ മോഹപ്പക്ഷികളെക്കുറിച്ച് പറയും. അതേസമയം സിനിമ തനിക്ക് നേട്ടങ്ങളൊന്നും തരാതിരുന്നിട്ടില്ലെന്നും താരം പറഞ്ഞു. സിനിമയില്‍ വരണമെന്ന് ആഗ്രഹിച്ചിരുന്നില്ല. നൃത്തമാണ് അതിന് വഴിയൊരുക്കിയത്.

ഫ്‌ളോറിഡയിലും അല്‍ബേനിയയിലും ജീവിച്ചപ്പോള്‍ വല്ലപ്പോഴും കാണുന്ന മലയാളികളുടെ സ്‌നേഹം എനിക്ക് മറക്കാനാകില്ല. അത് സിനിമ തന്നതാണ്. രണ്ടാംവിവാഹത്തില്‍ അസ്വാരസ്യങ്ങള്‍ ഉണ്ടായതോടെയാണ് താരം അമേരിക്കയില്‍ നിന്ന് നാട്ടിലേക്ക് മടങ്ങിയത്. അവിടെ താമസിച്ച അവസാനത്തെ രണ്ട് വര്‍ഷം താനും കുട്ടികളും മാത്രമാണുണ്ടായിരുന്നതെന്ന് താരം ഓര്‍മിക്കുന്നു. അതേസമയം താരത്തെ സിനിമകളിലും സീരിയലുകളിലും അഭിനയിപ്പിക്കാന്‍ പ്രമുഖ സംവിധായകരും നിര്‍മാതാക്കളും ശ്രമിക്കുന്നുണ്ട്.