ഹോട്ടൽ മുറിയിൽ ദുരൂഹ സാഹചര്യത്തിൽ 27 വയസ്സുകാരിയായ വനിതാ ഡോക്ടറെ മരിച്ച നിലയിൽ കണ്ടെത്തി. ഹൈദരാബാദിലെ മിയാപൂരിൽ ആണ് സംഭവം. ഹനമകൊണ്ട മെഡിക്കൽ കോളേജിലെ പിജി വിദ്യാർത്ഥിനിയും പീഡിയാട്രീഷ്യനുമായ കോട്ടമി സൃജനയാണ് മരിച്ചത്. യുവതിയെ കാണാനില്ലെന്ന് ചൂണ്ടിക്കാട്ടി കുടുംബം നൽകിയ പരാതിയിൽ പോലീസ് നടത്തിയ മൊബൈൽ ലൊക്കേഷൻ പരിശോധനയിലാണ് ഒക്ടോബർ 2-ന് ഹോട്ടൽ മുറിയിൽ മൃതദേഹം കണ്ടെത്തിയത്. അന്വേഷണത്തിൽ ഒക്ടോബർ ഒന്നിന് സൃജനയുടെ സുഹൃത്തായ രവികുമാർ ഹോട്ടലിൽ നിന്ന് ചെക്ക് ഔട്ട് ചെയ്ത് പോയതായി പോലീസ് കണ്ടെത്തി. താൻ നൽകിയ സ്വർണ്ണമാല തിരികെ വാങ്ങാനാണ് ഒക്ടോബർ 30-ന് സൃജന സുഹൃത്തിന്റെ അടുത്തേക്ക് എത്തിയതെന്ന് കുടുംബം പറയുന്നു. സൃജനയുടെ പിതാവിന്റെ പരാതിയിൽ രവികുമാറിനെതിരെ പോലീസ് കൊലപാതകക്കുറ്റത്തിന് കേസെടുത്ത് അന്വേഷണം ആരംഭിച്ചു. നിലവിൽ ഒളിവിൽ പോയ പ്രതിക്കായി തെരച്ചിൽ തുടരുകയാണ്.