സർക്കാർ പ്രഖ്യാപിച്ച സ്വർണ മോതിരം നൽകിയില്ലെന്നാരോപിച്ച് ഡ്യൂട്ടിയിലുണ്ടായിരുന്ന നഴ്സിനും ആരോഗ്യ പ്രവർത്തകർക്കും നേരെ ക്രൂരമായ ആക്രമണം. തമിഴ്‌നാട്ടിലെ കുംഭകോണത്തിനടുത്തുള്ള പട്ടേശ്വരത്താണ് നാടിനെ നടുക്കിയ ഈ സംഭവം നടന്നത്. പട്ടേശ്വരം പ്രാഥമിക ആരോഗ്യ കേന്ദ്രത്തിലെ നഴ്സായ അലമേലുവിനും ഒപ്പമുണ്ടായിരുന്ന രണ്ടു ജീവനക്കാർക്കുമാണ് മർദ്ദനമേറ്റത്. സമത്വപുരം സ്വദേശിയായ മദൻ എന്നയാളാണ് ആശുപത്രിയിൽ അതിക്രമിച്ചു കയറി ഇവരെ ആക്രമിച്ചത്. മദന്റെ ഭാര്യ വനിത അടുത്തിടെ ഇതേ സർക്കാർ ആശുപത്രിയിൽ വെച്ച് രണ്ടാമത്തെ കുഞ്ഞിന് ജന്മം നൽകിയിരുന്നു.

തമിഴ്‌നാട് സർക്കാരിന്റെ 'തായ്മാമൻ തങ്കമോതിരം' പദ്ധതി പ്രകാരം ഈ കുഞ്ഞിന് സ്വർണ മോതിരം ലഭിക്കാൻ അർഹതയുണ്ടായിരുന്നു. എന്നാൽ നഴ്സ് അലമേലു തങ്ങൾക്ക് മോതിരം നിഷേധിച്ചു എന്ന് ആരോപിച്ചായിരുന്നു മദന്റെ അക്രമം. അടുക്കളയിൽ ഉപയോഗിക്കുന്ന ചട്ടുകം ഉപയോഗിച്ചാണ് ഇയാൾ നഴ്സിനെയും കൂടെയുണ്ടായിരുന്നവരെയും ക്രൂരമായി പരിക്കേൽപ്പിച്ചത്. ആക്രമണത്തിൽ ഗുരുതരമായി പരിക്കേറ്റ നഴ്സ് അലമേലുവിനെയും മറ്റു രണ്ടുപേരെയും ഉടൻ തന്നെ അടുത്തുള്ള ആശുപത്രിയിൽ പ്രവേശിപ്പിച്ചു. സംഭവത്തിൽ പട്ടേശ്വരം പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്.