മാധ്യമങ്ങളും ചലച്ചിത്ര ആരാധകരും ഒരു പോലെ കൊണ്ടാടിയ ദിലീപ്-കാവ്യ വിവാഹത്തില്‍ മമ്മൂട്ടി ഉള്‍പ്പടെയുള്ള താരങ്ങളുടെ സാന്നിദ്ധ്യം ഉണ്ടായിരുന്നു. മുമ്ബ് മഞ്ജുദിലീപ് വിവാഹത്തിന് ചുക്കാന്‍ പിടിച്ച പല പ്രമുഖരും ഈ വിവാഹത്തിനും മുന്‍പന്തിയില്‍ തന്നെ നിന്നു. എങ്കിലും വിവാഹത്തിനിടയിലെ പലരുടേയും അസാന്നിദ്ധ്യവും ചര്‍ച്ചയാവുകയാണ്.

കാവ്യ കഴിഞ്ഞാല്‍ ദിലീപിന്റെ ഭാഗ്യജോഡിയായി വാഴ്ത്തിയിരുന്ന ഭാവന വിവാഹത്തില്‍ പങ്കെടുത്തില്ല. ഇരുവരും ഭാവനയെ ക്ഷണിച്ചിട്ടില്ലെന്നാണ് മനസിലാക്കാന്‍ സാധിക്കുന്നത്. അതേസമയം കുറച്ച് സിനിമകളില്‍ മാത്രം ഒരുമിച്ച് അഭിനയിച്ച മീരാ ജാസ്മിനെ പോലും ചടങ്ങിലേക്ക് ക്ഷണിക്കപ്പെട്ടിരുന്നു. മഞ്ജുവിന്റെ പക്ഷത്ത് നിന്നതു കൊണ്ടാണോ ഭാവനയ്ക്ക് മാത്രം ക്ഷണം ഉണ്ടാവാത്തതെന്നാണ് ഉയരുന്ന ചോദ്യം. 2015 ഡിസംബറിലാണ് ഡെക്കാന്‍ ക്രോണിക്കിളിന് നല്‍കിയ അഭിമുഖത്തില്‍ തനിക്ക് മലയാള സിനിമയില്‍ അനൗദ്യോഗിക വിലക്കുണ്ടെന്ന് നടി ഭാവന വെളിപ്പെടുത്തുന്നത്.

'സിനിമയിലെ ഒരു വനിതാ സുഹൃത്ത് എന്നെ സമീപിച്ച് കുടുംബ പ്രശ്‌നങ്ങളില്‍ തകര്‍ന്നിരിക്കുകയാണെന്നും സഹായിക്കണം എന്നും അഭ്യര്‍ത്ഥിച്ചു.അത് എന്റെ ജീവിതത്തേയും ബാധിക്കുകയാണെന്ന് പിന്നീടാണ് മനസിലായത്. നിരവധി സിനിമകള്‍ നഷ്ടപ്പെട്ടു.'ഭാവന അന്ന് പറഞ്ഞത് ഇങ്ങനെ. വളരെ പെട്ടെന്ന് ഭാവനക്ക് മലയാളത്തില്‍ അവസരങ്ങള്‍ കുറഞ്ഞു, ഒരു വേള ഇല്ലാതായി എന്ന് തന്നെ പറയാം. ദിലീപിന്റെ കുടുംബപ്രശ്‌നത്തില്‍ മഞ്ജുവിന്റെ ഒപ്പം നിന്നതിന്റെ പ്രതികാരം മൂലമാണിതെന്ന് സിനിമാവൃത്തങ്ങളില്‍ മുമ്ബ് തന്നെ ചര്‍ച്ചയുണ്ടായിരുന്നു.
പുതിയ സാഹചര്യത്തില്‍ ഇതും വിവാഹത്തില്‍ ഭാവനയുടെ അസാന്നിദ്ധ്യവും കൂട്ടി വായിക്കപ്പെടുകയാണ്. ഭാവനയും മഞ്ജു വാര്യരും തമ്മിലുള്ള സൗഹൃദമാണ് ദിലീപ് ഭാവനയെ ഒഴിവാക്കിയതിന് കാരണം എന്നു പറയപ്പെടുന്നു. മഞ്ജു വാര്യര്‍ ദിലീപ് പ്രശ്‌നത്തില്‍ പലരും പുറത്തു നിന്ന് ഇടപെട്ടു എന്ന് ദിലീപും മുമ്ബ് വെളിപ്പെടുത്തിയിരുന്നതാണ്. അങ്ങനെ ഇടപെട്ടവരില്‍ ഒരാള്‍ ഭാവനയാണത്രെ.

ദിലീപിനെതിരെ നിന്നതുകൊണ്ടാണു ഭാവനയ്ക്ക് സിനിമയില്‍ അവസരങ്ങള്‍ കുറഞ്ഞതെന്ന് പരസ്യമായ ഒരു രഹസ്യം തന്നെയാണ്. മലയാളത്തിലും തമിഴിലും തിളങ്ങി നിന്നപ്പോഴായിരുന്നു ഭാവനയുടെ കരിയര്‍ പെട്ടെന്ന് മന്ദഗതിയിലായത്.
വിവാഹത്തിന് കാവ്യയും ഭാവനയെ വിളിച്ചില്ല. കാവ്യയും ദിലീപും തമ്മില്‍ വിദേശത്ത് നടന്ന ഒരു സ്‌റ്റേജ്‌ഷോയ്ക്കിടെ അടുത്തിടപഴകിയെന്ന് ഭാവന മഞ്ജുവാര്യരെ അറിയിച്ചതാണ് താരത്തോട് ഇരുവര്‍ക്കും വൈരാഗ്യമുണ്ടാവാന്‍ കാരണം. അന്ന് ദിലീപ് ഭാവനയോട് ദേഷ്യപ്പെട്ടിരുന്നു. എന്നാല്‍ ഭാവന തന്റെ നിലപാടില്‍ ഉറച്ച് നിന്നു. അതോടെ ദിലീപ് പിണങ്ങി. തുടര്‍ന്ന് വൈശാഖിന്റെ കസിന്‍സ് എന്ന സിനിമയില്‍ നിന്ന് കരാറൊപ്പിട്ട ശേഷം ഭാവനയെ മാറ്റി. കാര്യം അന്വേഷിച്ചപ്പോഴാണ് ദിലീപാണ് അതിന് പിന്നിലെന്ന് അറിഞ്ഞത്. ഇതേ തുടര്‍ന്ന് ദിലീപിനെതിരെ ഭാവന അമ്മയില്‍ പരാതി നല്‍കിയിരുന്നു. പിന്നീട് തുടര്‍ച്ചയായി അവസരങ്ങള്‍ നിഷേധിക്കപ്പെട്ടു. അങ്ങനെ കന്നഡയില്‍ കുറേ ചിത്രങ്ങളില്‍ ഭാവന അഭിനയിച്ചു.

ഇടയ്ക്ക് വിജയ്‌മേനോന്‍ സംവിധാനം ചെയ്ത സിനിമയില്‍ ഭാവന നായികയായി. പക്ഷെ, അതൊരു മുഖ്യധാരാ ചിത്രമല്ലായിരുന്നു. അതിന് ശേഷം ഹണീബി ടുവിലാണ് ഭാവന അഭിനയിക്കുന്നത്. അതിനുണ്ടായ കാരണം ഹണീബിയുടെ ഒന്നാം പാര്‍ട്ടില്‍ ഭാവന നായികയായിരുന്നു എന്നത് മാത്രമാണ്.
സിനിമയിലെ ഈഗോയും പ്രതികാരവും കരിയര്‍ ഇല്ലാതാക്കുന്നതിന്റെ ഒരു ഉദാഹരണമായി മാറുകയാണ് ഭാവനയുടെ അനുഭവം. സിനിമയിലെ പ്രമുഖര്‍ പങ്കെടുത്ത ദിലീപിന്റെ രണ്ടാം വിവാഹത്തില്‍ ഭാവനയെ കൂടാതെ മഞ്ജുവിനെ പിന്തുണച്ച നടി ഗീതു മോഹന്‍ദാസിനും ക്ഷണമുണ്ടായിരുന്നില്ല. അതേസമയം വിവാഹത്തിനു ക്ഷണം ലഭിച്ചില്ലെങ്കിലും സിനിമയില്‍ അവരങ്ങള്‍ കുറഞ്ഞാലും പോട്ടെ തന്റെ പക്ഷം വിജയിച്ചല്ലോ എന്നോര്‍ത്തു സന്തോഷത്തിലാണ് ഭാവനയെന്നാണ് റിപ്പോര്‍ട്ടുകള്‍ പറയുന്നത്.