പൃഥ്വിരാജിനെപ്പോലെയാകാന്‍ തനിക്ക് സാധിക്കില്ലെന്ന് മോഹന്‍ലാല്‍
ഈ വര്‍ഷം മോഹന്‍ലാല്‍ ആരാധകര്‍ ഏറെ പ്രതീക്ഷയോടെ ഉറ്റുനോക്കുന്ന സിനിമയാണ് ലൂസിഫര്‍. മുരളി ഗോപി തിരക്കഥ എഴുതി പൃഥ്വിരാജ് സംവിധാനം ചെയ്യുന്ന ചിത്രമെന്ന നിലയില്‍ പേര് അനൗണ്‍സ് ചെയ്ത ഉടന്‍ തന്നെ ഇതൊരു തരംഗമായി മാറി. മോഹന്‍ലാലും ഈ പ്രോജക്ടില്‍ വലിയ പ്രതീക്ഷയിലാണ്.
'പേര് മാത്രമേ ഇതുവരെ തീരുമാനിച്ചിട്ടുള്ളൂ. ഗോപി ചേട്ടന്‍ സംവിധാനം ചെയ്ത ചിത്രത്തിലും സുകുമാരന്‍ ചേട്ടന്‍ നിര്‍മിച്ച ചിത്രത്തിലും, ഇരുവരും അഭിനയിച്ച ചിത്രങ്ങളിലും ഞാന്‍ അഭിനയിച്ചിട്ടുണ്ട്. അതുകൊണ്ട് അവരുടെ മക്കള്‍ ഒരു ഓഫറുമായി വന്നപ്പോള്‍ ഞാന്‍ ഏറ്റെടുത്തു. മാത്രമല്ല വളരെ സെന്‍സിബിളാണ് മുരളി ഗോപിയും പൃഥ്വിരാജും.
മുരളി ഗോപിയും പൃഥ്വിരാജും പറഞ്ഞ ആശയം എനിക്കിഷ്ടമായി. ചിത്രത്തിന്റെ ആശയം അവര്‍ തിരക്കഥയായി വികസിപ്പിക്കണം. അത് പൂര്‍ത്തിയായി കഴിഞ്ഞാല്‍ ഉടന്‍ ഇരുവരുമായി ചര്‍ച്ച നടത്തും. ഒരുപാട് പേര് ഒന്നിയ്ക്കുന്ന ചിത്രം വെറും സാധാരണ സിനിമയായി പോകാന്‍ പാടില്ലല്ലോ. അതിന് വേണ്ടിയാണ് ശ്രമിച്ചുകൊണ്ടിരിയ്ക്കുന്നത്. വീണ്ടും ഒരു ചര്‍ച്ച നടത്തുന്നുണ്ട്.
സംവിധാനം മറ്റൊരു തലമാണ്. വെറുതെ ഒരു സിനിമ സംവിധാനം ചെയ്യാന്‍ സാധിക്കില്ല. ഇപ്പോള്‍ പൃഥ്വിരാജിനെ തന്നെ നോക്കൂ. കരിയറിന്റെ തുടക്കം മുതല്‍ സംവിധാനത്തില്‍ താത്പര്യമുള്ള ആളാണ് പൃഥ്വിരാജ്. അതിന് വേണ്ടി സിനിമ നിരീക്ഷിയ്ക്കുകയും പഠിക്കുകയും ചെയ്തിട്ടുണ്ട്. അതുപോലെ ചെയ്യാന്‍ എനിക്ക് സാധിക്കില്ല. അതിന് സമയം കണ്ടെത്തണം.
അഭിനയം മാറ്റിവച്ച് തിരക്കഥ എഴുതുകയും സംവിധാനം ചെയ്യുകയും വേണം. എന്നാലേ ആ കലയോട് നീതി പുലര്‍ത്താന്‍ കഴിയൂ. അല്ലാതെ ചെയ്യുന്നത് ആഭാസമാവും. നല്ലൊരു കഥയും ക്യാമറമാനും സഹസംവിധായകരും ഉണ്ടെങ്കില്‍ എനിക്കും സിനിമ ചെയ്യാന്‍ സാധിച്ചേക്കും. എന്റെ സിനിമകളില്‍ തന്നെ ഞാന്‍ സംവിധായകരെ സഹായിക്കാറുണ്ട്. ചില ഗാനങ്ങളും ആക്ഷന്‍ രംഗങ്ങളും സംവിധാനം ചെയ്തിട്ടുണ്ട്. പക്ഷെ ഒരു നല്ല, മുഴുനീള സിനിമ ചെയ്യാന്‍ അതൊന്നും പോര. ഭാവിയിലും അത് സാധിക്കില്ല എന്നാണ് എനിക്ക് തോന്നുന്നത്. എനിക്ക് സ്വതന്ത്രമായി ഇരിക്കാനാണ് ഇഷ്ടം. സിനിമയൊക്കെ ഒരുപാട് ആയികഴിഞ്ഞാല്‍ യാത്രകള്‍ ചെയ്യണം. എന്റെ ആഗ്രഹങ്ങള്‍ നടക്കുമോ എന്ന് അറിയില്ല.'-മോഹന്‍ലാല്‍ പറഞ്ഞു.
https://www.facebook.com/Malayalivartha
