നടന്‍ ദിലീപിനെ പൊലീസ് അറസ്റ്റ് ചെയ്തതിന് പിന്നാലെ അമ്മയില്‍ നിന്ന് പുറത്താക്കിയതില്‍ സുഹൃത്തുക്കളും സഹപ്രവര്‍ത്തകരുമായ പലര്‍ക്കം അമര്‍ഷം. ഇതിന്റെ ഭാഗമായാണ് ദിലീപിന് പിന്തുണ അറിയിച്ച് നടന്‍ സിദ്ധിഖ് ഇന്നലെ ഫെയിസ്ബുക്ക് പോസ്റ്റിട്ടത്. സലിംകുമാറിനും ഇടവേള ബാബുവിനും ഒക്കെ ഇതേ നിലപാടാണെന്ന് അറിയുന്നു. മുമ്പ് ജഗതി ശ്രീകുമാറിനെ വിതുര പെണ്‍വാണിഭ കേസില്‍ അറസ്റ്റ് ചെയ്തപ്പോള്‍ സംഘടന പുറത്താക്കിയിരുന്നില്ല. അന്വേഷണം പൂര്‍ത്തിയായി കോടതി വിധി വരുന്നത് വരെ കാത്തിരിക്കാനായിരുന്നു തീരുമാനം. ദിലീപിന് ആ ആനുകൂല്യം നല്‍കാത്തതില്‍ ഫെഫ്കയിലെ പലര്‍ക്കും എതിര്‍പ്പുണ്ട്. 

അമ്മ എന്ന സംഘടന സാമ്പത്തിക ബാധ്യതകളുടെ പടുകുഴിയില്‍ വീണ സമയത്ത് താങ്ങായി നിന്നത് ദിലീപാണെന്ന് അദ്ദേഹത്തെ അനുകൂലിക്കുന്നവര്‍ ചൂണ്ടിക്കാട്ടുന്നു. അമ്മ സിനിമ നിര്‍മിക്കാന്‍ ആലോചിച്ചപ്പോള്‍ നിര്‍മാണ ചുമതല തിലകനെയായിരുന്നു ഏല്‍പ്പിച്ചിരുന്നത്. എന്നാല്‍ അത് നീണ്ട് പോയതിനെ തുടര്‍ന്ന് ദിലീപ് സ്വയം ഏറ്റെടുക്കുകയായിരുന്നു. എന്നാല്‍ ദിലീപ് രണ്ട് കോടി രൂപയാണ് സിനിമയ്ക്ക് വേണ്ടി മുടക്കിയതെന്നും താരങ്ങളെല്ലാം പ്രതിഫലം പറ്റാതെയാണ് അഭിനയിച്ചതെന്നും പുറത്താക്കലിനെ അനുകൂലിക്കുന്നവര്‍ പറയുന്നു. മാത്രമല്ല മലയാളത്തില്‍ ഏറ്റവും കൂടുതല്‍ കലക്ഷന്‍ കിട്ടിയ സിനിമകളില്‍ ഒന്നാണ് ട്വന്റി ട്വന്റി. അതിന്റെ ലാഭത്തിന്റെ നല്ലൊരു ശതമാനം ദിലീപ് കൈപ്പറ്റിയിട്ടുണ്ടെന്നും ഇവര്‍ ചൂണ്ടിക്കാട്ടുന്നു.

സംഘടനയെ രക്ഷിച്ചെന്ന് കരുതി മനുഷ്യത്വ രഹിതമായ കാര്യങ്ങള്‍ ചെയ്താല്‍ സംരക്ഷിക്കേണ്ടെന്ന നിലപാടിലാണ് വിമണ്‍ ഇന്‍ കളക്ടീവ് സിനിമ പ്രവര്‍ത്തകര്‍. അമ്മയുടെ എക്‌സിക്യൂട്ടീവിനും നേതൃസ്ഥാനത്തും നടിമാര്‍ക്ക് 50 ശതമാനം പ്രീതിനിത്യം വേണമെന്ന് ഇവര്‍ ആവശ്യപ്പെടുന്നതും അതുകൊണ്ടാണ്. ഇനി അമ്മയില്‍ ചില നടന്‍മാരുടെ അപ്രമാദിത്വം നടക്കാന്‍ പാടില്ല. അത് തങ്ങളുടെ തന്നെ നിലനില്‍പ്പിനെ ബാധിക്കുമെന്ന് ഇവര്‍ക്ക് വ്യക്തമായി അറിയാം.