നടിയായി തുടങ്ങി പിന്നീട് സൂപ്പർ താരം സുകുമാരന്റെ ഭാര്യയായി മാറി സിനിമ ലോകം വിട്ടതിനു ശേഷം ചെറിയൊരു ഇടവേളക്ക് കഴിഞ്ഞു വീണ്ടും സിനിമയിലും സീരിയലിലും സജീവമാകാനുള്ള തയ്യാറെടുപ്പിലാണ് മല്ലികാ സുകുമാരന്‍. ഖത്തറിലെ തങ്ങളുടെ ഹോട്ടല്‍ ബിസിനസൊക്കെ അവസാനിപ്പിച്ച് കേരളത്തിലേക്ക് മടങ്ങുന്നത് മക്കളുടെ നിര്‍ബന്ധത്തിന് മാത്രം വഴങ്ങിയാണെന്നും, ഇപ്പോൾ രമേഷ് പിഷാരടി സംവിധാനം ചെയ്യുന്ന പടത്തില്‍ നല്ലൊരു വേഷമുണ്ടെന്നും മല്ലിക പറയുന്നു.

തിരിച്ചെത്തുകയാണെങ്കിലും ഇന്ദ്രനും പൃഥ്വിക്കുമൊപ്പം അഭിനയിക്കാന്‍ തനിക്ക് താത്പര്യമില്ലെന്ന് പറയുകയാണ് മല്ലിക. കാരണം ഞങ്ങള്‍ ഒരുമിച്ച് ഒരേ സിനിമയില്‍ അഭിനയിക്കാതിരിക്കാനാണ് ശ്രമിക്കുന്നത്.

നാട്ടുകാരെ പേടിച്ചിട്ടാ…കാരണം അവരു ചോദിക്കില്ലേ, അമ്മയും മക്കളും കൂടെ അഭിനയിക്കാന്‍ ഇറങ്ങിയിരിക്കുകയാണോ എന്ന്. മല്ലിക പറയുന്നു എനിക്കിഷ്ടം അവരില്ലാത്ത പടത്തില്‍ അഭിനയിക്കാനാണ്. അവർ സിനിമയിലെത്തിയ സമയത്തൊക്കെ അമ്മേ ഇതെങ്ങനുണ്ട് കഥ എന്നൊക്കെ ചോദിക്കുമായിരുന്നു. പക്ഷേ ഇപ്പോള്‍ അവര്‍ ഈ ഫീല്‍ഡ് നന്നായിട്ട് പഠിച്ചല്ലോ. ഇനി ദാ നമുക്കൊന്നും ഒരു പ്രസക്തിയുമില്ല. നന്നായിട്ട് കഥ സെലക്ട് ചെയ്യാന്‍ അവര്‍ക്ക് അറിയാം.

രാജു സുകുവേട്ടനെപ്പോലെയാണ്, ഉള്ളിലുള്ള പ്രയാസങ്ങളൊന്നും അവനെ ഒരിക്കലും ബാധിക്കില്ല. ഇത് പറയാൻ കാരണം പലരും പല കാര്യങ്ങള്‍ക്കും അവനെ കുറ്റപ്പെടുത്തുന്നതു കേള്‍ക്കുമ്പോള്‍ ഞാനും ഇന്ദ്രനും തളര്‍ന്നുപോകും. പക്ഷേ രാജുവത് ഒരു ചെവിയിലൂടെ കേട്ട് മറ്റേ ചെവിയിലൂടെ വിട്ടുകളയും. അങ്ങനെ വളര്‍ന്ന രാജുവിനെയാണ് ഇവിടെ പലരും എണ്ണയിലിട്ട് പൊരിക്കാന്‍ നടക്കുന്നത്.

സൂപ്പര്‍സ്റ്റാര്‍ മെഗാസ്റ്റാര്‍ എന്ന വാക്കേ തന്റെ കുഞ്ഞുങ്ങള്‍ക്ക് വേണ്ട എന്നും, കാരണം പ്രതിസന്ധികള്‍ക്ക് നടുവിലൂടെ വളര്‍ന്ന എന്റെ കുഞ്ഞുങ്ങള്‍ അവരുടേതായ കഴിവ് തെളിയിച്ചല്ലോ എന്നതിലാണ് കൂടുതല്‍ സന്തോഷം എന്നും മല്ലിക പറഞ്ഞു. ഇന്ദ്രന്‍ ആദ്യമേ എല്ലാ വേഷവും ചെയ്തു. പിന്നീടാണ് നായകനായത്. രാജു ആദ്യം തന്നെ ഒരു ഹീറോ ലെവലിലേക്ക് എസ്റ്റാബ്ലിഷ്ഡ് ആയി. ഇവര്‍ തമ്മില്‍ ആ ഒരു ഗ്യാപ് തുടക്കം മുതലുണ്ട്.

ഇന്ദ്രനും ആ നിലയിലെത്തും കാരണം അവനു എല്ലാ റോളും ചെയ്യാൻ പറ്റും, എനിക്ക് ഉറപ്പുണ്ട്. തനിക്കു എന്നും സുകുമാരന്റെ ഭാര്യ എന്നറിയപ്പെട്ടാല്‍ മതി എന്നും മല്ലിക പറഞ്ഞു. കാരണം എല്ലാത്തിന്റേയും ഉറവിടം സുകുമാരന്‍ എന്ന വ്യക്തിയാണ്. എനിക്ക് ജീവിതം തന്ന, മക്കളെ തന്ന, കുടുംബം തന്ന മാനസികമായൊരു ധൈര്യം തന്ന, നിനക്കൊപ്പം ഞാനുണ്ട് എന്ന ഉറപ്പു എപ്പോഴും, ഇപ്പോഴും തരുന്ന സുകുമാരന്റെ ഭാര്യ– മല്ലിക പറഞ്ഞു നിറുത്തി.