തെന്നിന്ത്യയിലെ മുൻനിര നായികമാരിൽ ഒരാളാണ് നടി തമന്ന. തമിഴിലും തെലുങ്കിലും തിളങ്ങി നിൽക്കുന്ന തമന്നക്ക് മലയാളത്തിലും ആരാധകർ ഏറെയാണ്. തെന്നിന്ത്യൻ ചലച്ചിത്രങ്ങളിൽ അഭിനയിക്കുന്നതിനു മുമ്പ് 2005ൽ പുറത്തിറങ്ങിയ സോ ഫാർ, ചാന്ദ് സാ റോഷൻ ചെഹരാ എന്നീ ഹിന്ദി സിനിമകളിലാണ് തമന്ന അരങ്ങേറ്റംകുറിച്ചത്.

ഹിന്ദി സിനിമകളിൽ നിന്നും അഭിനയജീവിതം തുടങ്ങിയതുകൊണ്ടാകാം നടിക്ക് സിനിമയിലെത്താൻ പ്രചോദനമായത് ഒരു ബോളിവുഡ് നടനാണ്. അത് മറ്റാരുമല്ല കഹോ ന പ്യാർ ഹേ എന്ന സൂപ്പർഹിറ്റ് ചിത്രത്തിലൂടെ ബോളിവുഡിൽ നായകനായെത്തിയ ഹൃത്വിക് റോഷനാണ്. സിനിമയിലെത്താന്‍ തനിക്ക് പ്രചോദനമായത് ഹൃത്വിക് റോഷനാണെന്ന് തെന്നിന്ത്യന്‍ സുന്ദരി തമന്ന തന്നെയാണ് ആരാധകരെ അറിയിച്ചത്.

ഹൃത്വിക്കിനെ നേരിട്ട് കാണുകയെന്നത് ഒരുപാട് നാളായുള്ള ആഗ്രഹമായിരുന്നുവെന്നും താരത്തിനൊപ്പമുള്ള ഫോട്ടോ ഷെയര്‍ ചെയ്‍ത് തമന്ന പറയുന്നു. ഏറ്റവും ഇഷ്‍ടപ്പെട്ട ഒരു നായകന്‍ ആരെന്നു ചോദിച്ചാല്‍ ഹൃത്വിക് എന്നായിരിക്കും തന്റെ ഉത്തരമെന്നും തമന്ന പറഞ്ഞു. യാഷ് രാജ് സ്റ്റുഡിയോയിലെ റിഹേഴ്‍സലിനിടയ്‍ക്കാണ് തമന്ന ഹൃത്വിക്കിന്റെ കണ്ടത്.

ഹൃത്വിക്കിനെ കണ്ടതിന്റെ ആവേശം തമന്ന ആരാധകരുമായി പങ്കുവയ്‍ക്കുകയായിരുന്നു. എനിക്ക് എപ്പോഴും പ്രചോദനമായിട്ടുള്ള താരമാണ് ഹൃത്വിക് റോഷന്‍. അദ്ദേഹത്തെ കണ്ടാണ് സിനിമാ ലോകത്തേയ്‍ക്ക് വരണമെന്ന് തോന്നിയതുതന്നെ. നൃത്തം ചെയ്യാന്‍ വലിയ താല്‍പ്പര്യമാണ്.

ഹൃത്വിക്കിന്റെ ഡാന്‍സിനെ കുറിച്ച് പറയേണ്ടതില്ലല്ലോ?. അദ്ദേഹത്തിന്റെ നായികയാകാന്‍ അതിയായ ആഗ്രഹമുണ്ട്. സിനിമയോടുള്ള അദ്ദേഹത്തിന്റെ സമര്‍പ്പണവും ആത്മാര്‍ഥയും എപ്പോഴും പ്രചോദനമാണെന്നും തമന്ന പറഞ്ഞു.