90കളിൽ ഇന്ത്യൻ ചലച്ചിത്ര ലോകത്തെ മിന്നുന്ന താരമായിരുന്നു പൂജാഭട്ട്. 1989 ൽ 17 വയസ്സിലാണ് പൂജ ആദ്യമായി അഭിനയിച്ചത്. തന്റെ പിതാവായ മഹേഷ് ഭട്ട് സംവിധാനം ചെയ്ത ഡാഡി എന്ന ടി.വി. ഫിലിമിലാണ് പൂജ അഭിനയരംഗത്ത് അരങ്ങേറ്റം കുറിച്ചത്.

പക്ഷേ ചലച്ചിത്രത്തിൽ ആദ്യമായി അഭിനയിച്ച ചിത്രമായ ദിൽ ഹേ കി മാൻ‌ത നഹിൻ എന്ന ചിത്രം ഒരു മ്യൂസികൽ വിജയമായിരുന്നു. മികച്ച പുതുമുഖ നടിക്കുള്ള ഫിലിംഫെയർ അവാർഡും ഇതിലൂടെ പൂജ സ്വന്തമാക്കി. ഇപ്പോഴിതാ നായികാ സങ്കൽപ്പങ്ങളുടെ ചട്ടക്കൂടുകളെ തകർത്തെറിഞ്ഞ ഈ സുന്ദരി തന്റെ 45ാം വയസിൽ ഒരു പുസ്തകവുമായി എത്തുകയാണ്.

ജീവിതത്തിൽ വില്ലനായി മാറിയ മദ്യപാനത്തെക്കുറിച്ചുള്ളതാണ് പൂജയുടെ പുസ്തകം. മൂന്നു പതിറ്റാണ്ടിലേറെയായി തന്നെ ഭരിച്ചിരുന്ന മദ്യപാനത്തെ പൂർണമായും ഒഴിവാക്കിയതിനെക്കുറിച്ചും അതിനായി സ്വീകരിച്ച വഴികളെക്കുറിച്ചുമാണ് പുസ്തകത്തിൽ പറയുന്നത്. ഇതൊരിക്കലും തന്റെ ആത്മകഥയല്ലെന്നും പൂജ വ്യക്തമാക്കുന്നു.

45 ാം വയസിൽ ആത്മകഥ എഴുതാനുള്ള അനുഭവങ്ങളും പക്വതയും എനിക്ക് എത്തിയിട്ടില്ല എന്നാണ് പൂജ പറയുന്നത്. മദ്യത്തിന്റെ ലഹരി ആസ്വദിച്ച് കഴിഞ്ഞാൽ പിന്നെ അതിൽ നിന്ന് രക്ഷപ്പെടാൻ കഴിയില്ലെന്ന് വിലപിക്കുന്നവരോട് ശ്രമിച്ചാൽ സാധിക്കാത്തതായി ഒന്നുമില്ലെന്ന് പറയുകയാണ് സംവിധായിക കൂടിയായ പൂജ ഭട്ട്.

കടുത്ത മദ്യപാന ശീലമുള്ള ആളായിരുന്നു പൂജ. അതൊരിക്കലും മറച്ചുവയ്ക്കാനോ നിരസിക്കാനോ താരം തയാറായിട്ടുമില്ല. എന്നാൽ, കഴിഞ്ഞ പത്ത് മാസമായി മദ്യം ഞാൻ കൈ കൊണ്ട് തൊട്ടിട്ടില്ല എന്ന് പൂജ പറയുന്നു.

എന്റെ ആ തീരുമാനം നടപ്പിലാക്കുക അത്ര എളുപ്പമായിരുന്നില്ല. എന്നാൽ അത്രയും കടുപ്പവും ആയിരുന്നില്ല. എടുക്കുന്ന തീരുമാനത്തിന്റെ ആഴം അത് നടപ്പിലാക്കാനും സഹായകമാകുമെന്നും പൂജ ഉറപ്പിക്കുന്നു. മദ്യപാനത്തിൽ നിന്ന് രക്ഷപ്പെടാൻ മറ്റുള്ളവരെ സഹായിക്കുകയാണ് പുസ്തകത്തിലൂടെ ലക്ഷ്യമിടുന്നത്.

മദ്യപാനികളുടെ പ്രയാസങ്ങളെക്കുറിച്ചും മറ്റും തന്റെ അനുഭവങ്ങളിലൂടെ പൂജ എഴുതും. പ്രശ്നങ്ങൾ പരിഹരിക്കാൻ ഇതിലൂടെ അവർക്ക് കഴിയുമെന്നും പൂജ പറയുന്നു. പെൻഗ്വിൻ ബുക്സ് പ്രസിദ്ധീകരിക്കുന്ന പുസ്തകം അടുത്ത വർഷം പുറത്തിറക്കും.