ഒടുവിൽ ദീർഘകാലത്തെ പ്രണയം പൂവണിഞ്ഞു. ഇനി അക്ഷിത രഞ്ജിത്തിന് സ്വന്തം. സൂപ്പര്‍ സ്റ്റാര്‍ ചിയാന്‍ വിക്രമിന്റെ മകള്‍ അക്ഷിതയും ഡി.എം.കെ നേതാവ് കരുണാനിധിയുടെ പേരക്കുട്ടി മനു രഞ്ജിത്തും വിവാഹിതരായി.

കരുണാനിധിയുടെ മകനും ഗായകനുമായ എം.കെ മുത്തുവിന്റെ മകള്‍ തേന്മൊഴിയുടെയും പ്രമുഖ ബിസ്സിനസ്സ് ഗ്രൂപ്പായ കവിന്‍കെയറിന്റെ ഉടമ സി.കെ രംഗനാഥന്റെയും മകനാണ് രഞ്ജിത്ത്. കരുണാനിധിയുടെ ഗോപാല്‍പുരത്തുള്ള വസതിയില്‍ വച്ച്‌ അടുത്ത ബന്ധുക്കള്‍ മാത്രം പങ്കെടുത്ത ചടങ്ങിലായിരുന്നു വിവാഹം.

കഴിഞ്ഞ ജൂലായ് 10ന് ചെന്നൈയിലായിരുന്നു വിവാഹനിശ്ചയം. ചെന്നൈയിലെ പഞ്ചനക്ഷത്ര ഹോട്ടലില്‍ അടുത്തബന്ധുക്കളെയും സുഹൃത്തുക്കളെയും മാത്രം ക്ഷണിച്ചാണ് നിശ്ചയം നടത്തിയത്. കണ്ണൂര്‍ സ്വദേശിയായ ഷൈലജ ബാലകൃഷ്ണനാണ് വിക്രമിന്റെ ഭാര്യ.

നീണ്ടകാലത്തെ പ്രണയത്തിന് ശേഷം 1992ലാണ് വിക്രം ഷൈലജയെ കല്യാണം കഴിച്ചത്. വിക്രമിന്റെ മകള്‍ അക്ഷിതയും മനുവും ദീര്‍ഘനാളായി പ്രണയത്തിലായിരുന്നു. രണ്ട് വീട്ടുകാരെയും കാര്യങ്ങള്‍ അറിയിച്ചതോടെ ജീവിതയാത്രയ്ക്ക് വഴിയൊരുങ്ങുകയായിരുന്നു.

ക്രിസ്തുമത വിശ്വാസിയായ കെന്നഡി ജോണ്‍ വിക്രം ഹിന്ദുവായ ഷൈലജയെ പ്രണയിച്ച് വിവാഹം കഴിച്ചത് പോലെ മകള്‍ അക്ഷിത ഹിന്ദുവായ മനുവിനെ പ്രണയിച്ചതും ഇപ്പോള്‍ വിവാഹം കഴിക്കുന്നതും യാദൃശ്ചികം മാത്രം. നിരവധി ചിത്രങ്ങളില്‍ പ്രണയനായകനായി അഭിനയിച്ച വിക്രം മകളുടെ പ്രണയമറിഞ്ഞപ്പോള്‍ ഏറെ സന്തോഷിച്ചു. പ്രമുഖര്‍ക്കായുള്ള വിവാഹ സത്ക്കാരം അടുത്ത ദിവസം തന്നെ ചെന്നൈയില്‍ വച്ച്‌ നടക്കും.