കാമാത്തിപ്പുരയിലെ ലൈംഗിക തൊഴിലാളികള്‍ക്കൊപ്പം പലരാത്രികള്‍ കഴിച്ചുകൂട്ടിയ നായികയുടെ അനുഭവം
കഥാപാത്രത്തിന്റെ പൂര്‍ണതയ്ക്ക് വേണ്ടി കാമാത്തിപ്പുരയിലെ ലൈംഗിക തൊഴിലാളിക്കൊപ്പം താമസിച്ച നടി ശോഭിത ധുലിപലയ്ക്ക് ഞെട്ടിക്കുന്ന ഓര്‍മ്മകള്‍. നിവിന്‍ പോളിയെ നായകനാക്കി ഗീതു മോഹന്‍ദാസ് ഒരുക്കുന്ന മൂത്തോനിലെ കഥാപാത്രത്തിന് വേണ്ടിയാണ് ശോഭിത, കാമാത്തിപ്പുരയിലെ ലൈംഗിക തൊഴിലാളികളുടെ ജീവിതം അറിഞ്ഞത്. ഒരു അഭിമുഖത്തില്‍ ശോഭിത തന്നെയാണ് ഇക്കാര്യം പറഞ്ഞത്.
മണിക്കൂറുകളോളം ലൈംഗിക തൊഴിലാളികളുമായി സംസാരിച്ചു. ജീവിതവും ജീവിതാനുഭവങ്ങളും ചോദിച്ചറിഞ്ഞു. ഒരു ലൈംഗിക തൊഴിലാളിക്കൊപ്പം ശോഭിത താമസിക്കുകയും ചെയ്തു.
ഒട്ടും പ്രതീക്ഷിക്കാതെ കൈവന്ന കഥാപാത്രമാണ് മൂത്തോനിലേത്. ലോകത്തെ ഏറ്റവും വലിയ ലൈംഗിക തെരുവുകളില്‍ ഒന്നായ കാമാത്തിപ്പുരയിലെ തന്റേടിയായ ഒരു സ്ത്രീയെയാണ് ഞാന്‍ അവതരിപ്പിക്കുന്നത്. ഗറില്ല സ്‌റ്റൈല്‍ ചിത്രീകരണമായിരുന്നു ഏറെയും. ചിലപ്പോള്‍ ഇരുപത് മണിക്കൂറ് വരെ നീണ്ടുനിന്നു ചിത്രീകരണം.
അവിടുത്തെ സ്ത്രീകളുമായെല്ലാം ഞാന്‍ സംസാരിച്ചു. അവരുടെ ഇടുങ്ങിയ കൊച്ചുമുറിയില്‍ താമസിക്കുകയും ചെയ്തു. തൊഴിലിന്റെയും ജാതിയുടെയും നിറത്തിന്റെയുമെല്ലാം അടിസ്ഥാനത്തില്‍ ആളുകളെ വേര്‍തിരിക്കുന്ന ഒരു പതിവുണ്ട് ഇന്ത്യയില്‍.
എന്നാല്‍, ഭീതിദത്തവും ദയനീയവുമായ ജീവിതം നയിക്കുമ്പോഴും കാമാത്തിപ്പുരയിലെ സ്ത്രീകള്‍ അങ്ങേയറ്റം സ്‌നേഹമുള്ളവരും നന്മയുള്ളവരുമാണ്. സത്യത്തില്‍ എന്റെ കണ്ണ് തുറപ്പിക്കുന്നതായിരുന്നു അവിടുത്തെ ജീവിതാനുഭവം. അവരുടെ ശരീരം വാങ്ങാന്‍ വരുന്നത് കണ്ട് ഞെട്ടി വിറച്ചു.
ലക്ഷദ്വീപില്‍ നിന്നും തന്റെ സഹോദരനെ തിരഞ്ഞ് പോകുന്ന ഒരു യുവാവിന്റെ കഥയാണ് മൂത്തോന്‍ പറയുന്നത്. ഹിന്ദിയിലും മലയാളത്തിലുമായാണ് ചിത്രം ഒരുക്കുന്നത്. ശശാങ്ക് അറോറ, ഹരിഷ് ഖന്ന, അലന്‍സിയര്‍, സൗബിന്‍ ഷാഹിര്‍ എന്നിവരാണ് മറ്റ് താരങ്ങള്‍.
ഗീതുവിന്റെ കഥയ്ക്ക് അനുരാഗ് കശ്യപാണ് തിരക്കഥ ഒരുക്കുന്നത്. ഛായാഗ്രഹണം ഭര്‍ത്താവും സംവിധായകനുമായ രാജീവ് രവിയാണ്.
https://www.facebook.com/Malayalivartha
