കമൽ ഹാസനും ഗൗതമിയും പതിമൂന്ന് വർഷത്തെ ബന്ധം അവസാനിപ്പിച്ച് വേർപിരിഞ്ഞത് ആരാധകരെ ഞെട്ടിച്ചിരുന്നു. അവിവാഹിതരായി ജീവിച്ചതിനാൽ നിയമത്തിന്റെ നൂലാമാലകൾ കൂടാതെ തന്നെ അവർ വേർപിരിഞ്ഞു. കഴിഞ്ഞ വർഷം ബ്ലോഗിലൂടെയാണ് ഗൗതമി കമലിനൊപ്പമുള്ള ജീവിതം അവസാനിപ്പിച്ചുവെന്ന് പ്രഖ്യാപിച്ചത്. എന്നാൽ കാരണമെന്തെന്ന് വ്യക്തമാക്കിയിരുന്നില്ല. കഴിഞ്ഞ ദിവസം ഒരു മാധ്യമത്തിന് നൽകിയ അഭിമുഖത്തിൽ ഈ കാരണം വ്യക്തമാക്കുകയാണ് ഗൗതമി.

ഒക്ടോബറിന് മുമ്പ് തന്നെ കമലുമായി പിരിയുന്നതിനെക്കുറിച്ച് ആലോചിച്ചിരുന്നു. ഞങ്ങൾക്കിടയിൽ നിന്നിരുന്ന ചില വ്യവസ്ഥകൾ തെറ്റിയത് അകൽച്ചയ്ക്ക് കാരണമായി. ഞാൻ ഒരു ബന്ധത്തിൽ ഏർപ്പെടുകയാണെങ്കിൽ. നൂറു ശതമാനം ആത്മാർത്ഥത പുലർത്തും. ഞങ്ങളുടെ ബന്ധത്തിന്റെ തുടക്കത്തിൽ കൈമാറിയ ചില മൂല്യങ്ങളാണ് എന്നെ ജീവിതത്തിൽ പിടിച്ചുനിർത്തിയത്.

പരസ്പര വിശ്വാസം, ബഹുമാനം, സത്യസന്ധത എന്നീ വാക്കുകൾ എല്ലാ ബന്ധങ്ങൾക്കും ബാധകമാണ്. പ്രത്യേകിച്ച് ജീവിതം പങ്കുവയ്ക്കുമ്പോൾ ഇതൊന്നും ഇല്ലാതാകുമ്പോൾ നമുക്ക് നമ്മളോട് തന്നെയുള്ള ബഹുമാനം നഷ്ടപ്പെടും. ഞാനും ശ്രുതിയും തമ്മിലുള്ള അഭിപ്രായവത്യാസമാണ് എല്ലാ പ്രശ്നങ്ങളുടെയും തുടക്കമെന്ന് പലരും പറയുന്നത് കേട്ടു. ഒരിക്കലും അല്ല, ഞങ്ങൾക്കിടയിൽ മൂന്നാമത് ഒരാളില്ല. ശ്രുതിയും അക്ഷരയും മിടുക്കികളായ രണ്ട് പെൺകുട്ടികളാണ്. അവരോടുള്ള എന്റെ സമീപനം ജീവിതകാലം മുഴുവൻ ഒരുപോലെയായിരിക്കും. എന്റെയും കമലിന്റെയും ബന്ധത്തിൽ ഒരിക്കലും അവർ ഇടപ്പെട്ടിട്ടില്ല.

കഴിഞ്ഞ പതിനേഴ് മാസങ്ങളായി ഞാൻ മൗനം പാലിക്കുകയായിരുന്നു. ഇപ്പോൾ നിങ്ങളോട് സത്യം പറയുകയാണ്. കാരണം ഇത്രയും കാലം എല്ലാവരും ഈ ചോദ്യം കൊണ്ട് ബുദ്ധിമുട്ടിപ്പിക്കുകയാണ്. പതിനേഴാമത്തെ വയസ്സിൽ സിനിമയിൽ എത്തിയ ഗൗതമി മലയാളം, തമിഴ്, തെലുങ്ക്, കന്നട ഭാഷകളിൽ ഒട്ടനവധി ചിത്രങ്ങൾ ചെയ്തിട്ടുണ്ട്. 1998 ൽ സന്ദീപ് ഭാട്ടിയയെ വിവാഹം ചെയ്തുവെങ്കിലും ആ ബന്ധം 1999 ൽ അവസാനിച്ചു. ആ ബന്ധത്തിൽ ഒരു മകളുണ്ട്. 35-ാമത്തെ വയസ്സിൽ സ്തനാർബുദം ബാധിച്ച് ഒറ്റപ്പെട്ട സമയത്ത് കമലിന്റെ പരിചരണമാണ് തന്നെ രോഗവിമുക്തയാക്കിയതെന്ന് ഗൗതമി നേരത്തേ പറഞ്ഞിട്ടുണ്ട്.

ഇപ്പോൾ കമലിന്റെ പ്രൊഡക്ഷൻ കമ്പനിക്കെതിരെ പരാതി നൽകിയിരിക്കുകയാണ് ഗൗതമി. മലയാളത്തിലെ സൂപ്പർ ഹിറ്റ് ചിത്രം ദൃശ്യത്തിന്റെ തമിഴ് റീമേക്കായ പാപനാശം എന്ന ചിത്രത്തിൽ നായികയായെത്തിയതും വസ്ത്രാലങ്കാരം നിർവഹിച്ചതും ഗൗതമിയായിരുന്നു. എന്നാൽ വസ്ത്രാലങ്കാരം നിർവഹിച്ചതിന് രാജ് കമൽ ഇന്റർനാഷ്ണൽ പണം നൽകിയിട്ടില്ലെന്ന് ഗൗതമിയുടെ ആരോപണം. ഗൗതമി പറഞ്ഞതെല്ലാം സത്യമാണെന്ന് കമൽ സമ്മതിച്ചു. ഉടൻ തന്നെ രാജ് കമൽ ഇന്റർനാഷ്ണൽ ഗൗതമിയുടെ പ്രതിഫലം നൽകുമെന്നും കമൽ മാധ്യമങ്ങളോട് പറഞ്ഞു.