നാഗശൗര്യ നായകനാകുന്ന കാരുവിന്റെ പ്രചരണ പരിപാടികളില്‍ നിന്ന് ചിത്രത്തിലെ നാഗശൗര്യ ഒഴിഞ്ഞുമാറുകയാണെന്ന് റിപ്പോര്‍ട്ട്. എല്‍ വിജയ് ഒരുക്കുന്ന ചിത്രമാണ് കാരു. നായിക സായ് പല്ലവിയുമായുള്ള പ്രശ്‌നങ്ങളാണ് നാഗശൗര്യ ചിത്രത്തില്‍ നിന്ന് മാറി നില്‍ക്കാന്‍ കാരണമെന്ന് മാധ്യമങ്ങള്‍ റിപ്പോര്‍ട്ട് ചെയ്യുന്നു. സായിയുടെ പെരുമാറ്റം സഹതാരങ്ങള്‍ക്ക് സഹിക്കാനാവുന്നില്ല എന്ന ആരോപണവുമായി നടന്‍ നാഗശൗര്യ രംഗത്തെത്തിയിരുന്നു. ഇത് വിവാദമായിരുന്നു. എന്നാല്‍, താന്‍ ആരോടും മോശമായി പെരുമാറിയിട്ടില്ല എന്നാണ് വിവാദത്തെക്കുറിച്ച് സായി പ്രതികരിച്ചത്.

'എന്റെ കൂടെ ജോലി ചെയ്യുന്ന ആര്‍ക്കെങ്കിലും അങ്ങനെ തോന്നിയിട്ടുണ്ടെങ്കില്‍ അത് നിര്‍ഭാഗ്യകരമാണ്. ഒരാളെ വേദനിപ്പിക്കാന്‍ എനിക്കറിയില്ല. എന്നെക്കുറിച്ച് പരാതിയുണ്ടെങ്കില്‍ നിര്‍മാതാവിനോടോ സംവിധായകനോടോ പറയാമായിരുന്നു. എങ്കില്‍ മാത്രമേ നല്ല അന്തരീക്ഷം സെറ്റില്‍ ഉണ്ടാകൂ. നാഗശൗര്യയുടെ ചിന്തകളെ ഞാന്‍ ബഹുമാനിക്കുന്നു.

അദ്ദേഹത്തിന് തോന്നിയത് എന്തോ അത് അദ്ദേഹത്തിന് പറയാം. ഞാന്‍ മന:പൂര്‍വം നാഗശൗര്യയെ വേദനിപ്പിച്ചിട്ടില്ല. അഥവാ അങ്ങനെ സംഭവിച്ചുവെങ്കില്‍ മാപ്പ്.' എന്നായിരുന്നു താരത്തിന്റെ മറുപടി.
നാഗശൗര്യയുടെ ഈ നടപടിയില്‍ നിര്‍മാതാക്കളും അസംതൃപ്തരാണ്. പ്രചരണ പരിപാടികളില്‍ നിന്ന് നായകന്‍ വിട്ടുനില്‍ക്കുന്നതില്‍ അണിയറ പ്രവര്‍ത്തകര്‍ അതൃപ്തരാണ്.