വിവാഹത്തോടെ സിനിമയില്‍ നിന്നും അപ്രത്യക്ഷമായ നായികമാരിൽ ഒരാളാണ് മുക്ത. വിവാഹം കഴിഞ്ഞത് മുതല്‍ താരത്തിന്റെ തിരിച്ചുവരവിനായി കാത്തിരിക്കുകയാണ് ആരാധകര്‍. പക്ഷെ ഇടയ്ക്കിടെ താരത്തിന്റെ വരവ് സോഷ്യൽ മീഡിയയിൽ വൈറലാകാറുണ്ട്. ഇത്തവണ താരമെത്തിയത് മകൾ കിയാരയുടെ ഒരു വീഡിയോ പങ്കുവച്ചുകൊണ്ടാണ്.

റിമി ടോമിക്കൊപ്പം പാടാന്‍ ശ്രമിക്കുന്ന മകളുടെ വീഡിയോ പോസ്റ്റ് ചെയ്തതോടെ ആരാധകരുടെ മനസ്സ് കീഴടക്കിയത് കിയാര തന്നെയായിരുന്നു. വീട്ടിനകത്ത് പാട്ട് പരിശീലിക്കുന്ന റിമിയുടെ കൂടെ പാടാന്‍ നോക്കിയതാണ് കുട്ടി താരം. മേലേ മാനത്തെ ഈശോയെ എന്ന പാട്ടാണ് കണ്‍മണി മൂളുന്നത്. പശ്ചാത്തലത്തില്‍ കരോക്കെയുമുണ്ട്. മൈക്ക് കയ്യില്‍ പിടിച്ച് വട്ടംചുറ്റി പാടുന്ന കണ്‍മണിയുടെ പാട്ടിന് താളം പിടിച്ച് വല്യമ്മ റിമിയുമുണ്ട്. വീഡിയോ എടുക്കുന്ന മുക്ത മകള്‍ക്ക് പാടാനുളള പ്രോത്സാഹനവും നല്‍കി.

സഹോദരന്‍ റിങ്കു ടോമിയുടെയും മുക്തയുടെയും ഏകമകളാണ് രണ്ടു വയസ്സുകാരി കണ്‍മണി എന്ന കിയാര. സിനിമയില്‍ നിന്ന് മാറിയെങ്കിലും ബ്യൂട്ടി സലൂണുമായി സജീവമാണ് മുക്ത. മുക്തയുടെ ബ്യൂട്ടി പാർലറിന് ഗ്യാരന്റി നൽകി റിമി വീഡിയോ പോസ്റ്റ് ചെയ്തതും വൈറലായിരുന്നു. ഒരു പ്രാവശ്യം വന്നാൽ വീണ്ടും വീണ്ടും വരൻ തോന്നുമെന്ന് റിമി ഗ്യാരന്റി പറയുന്നുണ്ട്. കിയാരയ്ക്ക് ഏറ്റവും പ്രീയപ്പെട്ടയാള്‍ റിമിയാണെന്ന് മുക്ത പലപ്പോഴും പറഞ്ഞിട്ടുണ്ട്. എവിടെ പോയാലും കിയാരയ്ക്കായി നിരവധി സമ്മാനങ്ങളുമായാണ് റിമിയുടെ വരവെന്നും പറയുന്നു.