വൈകിയെങ്കിലും കൊല്ലപ്പെട്ട മധുവിന്റെ വീട്ടിലെത്തിയ സുരേഷ് ഗോപി വികാരാധീനനായി. ജീവനു ഭീഷണിയുണ്ടെന്നു മധുവിന്റെ കുടുംബം സുരേഷ്‌ഗോപിയോട് വിലപിച്ചു. അവരുടെ വിഷമം മനസിലാക്കി മുഖ്യമന്ത്രിയുടെ വാക്കുകള്‍ ധൈര്യമായി വിശ്വസിക്കാം എന്നാണ് സുരേഷ് ഗോപി പറഞ്ഞത്.

മധുവിന്റെ കൊലപാതകക്കേസ് അന്വേഷണം സിബിഐയെ ഏല്‍പിക്കണമെന്നും കുടുംബം ആവശ്യമുന്നയിച്ചു. അട്ടപ്പാടിയില്‍ കൊല്ലപ്പെട്ട ആദിവാസി യുവാവ് മധുവിന്റെ ചിണ്ടക്കി താഴെ ഊരിലെ വീട് സന്ദര്‍ശിച്ചപ്പോഴാണു സുരേഷ് ഗോപിയോടു മധുവിന്റെ അമ്മ മല്ലിയും സഹോദരിമാരായ ചന്ദ്രികയും സരസുവും ഈ ആവശ്യമുന്നയിച്ചത്. തങ്ങള്‍ക്കും ബന്ധുക്കള്‍ക്കും നേരെ ചിലരില്‍ നിന്നു ഭീഷണിയുണ്ടെന്നും കേസന്വേഷണം അട്ടിമറിക്കപ്പെടുമെന്ന ആശങ്കയുണ്ടെന്നും ഇവര്‍ വെളിപ്പെടുത്തി.

മുഖ്യമന്ത്രി പിണറായി വിജയന്‍ നേരിട്ടെത്തി നല്‍കിയ ഉറപ്പ് വിശ്വസിക്കാമെന്നു സുരേഷ്‌ഗോപി കുടുംബാംഗങ്ങളോടു പറഞ്ഞു. പൊലീസ് അന്വേഷണവും മജിസ്റ്റീരിയല്‍ അന്വേഷണവും നടക്കുന്നുണ്ട്. ഇതിന്റെ പുരോഗതി നോക്കാമെന്നും എന്തു സംഭവിച്ചാലും മുഖ്യമന്ത്രി ഉത്തരവാദിയാണ്. മധുവിന്റെ രക്തസാക്ഷിത്വം ഭാരതത്തിലെ മുഴുവന്‍ വനവാസികളുടെയും ഉന്നമനം ഉറപ്പാക്കുന്നതിനു കാരണമാകും.

ആദിവാസികളുടെ ജീവിത വികസനത്തിനും സുരക്ഷിതത്വത്തിനും പുതിയ നിയമങ്ങളും ഭരണ സംവിധാനങ്ങളും ഉണ്ടാകുമെന്നും അദ്ദേഹം അഭിപ്രായപ്പെട്ടു.