മോഹന്‍ലാലും സുചിത്രയും അവരുടെ 30ാം വിവാഹ വാര്‍ഷികം ആഘോഷിക്കുമ്പോള്‍ മകന്‍ അപ്പു എന്ന പ്രണവ് ഇന്ന് പ്രശസ്തിയുടെ നെറുകയിലാണ്. അതു കൊണ്ടു തന്നെ ലാലിന്റെയും സുചിത്രയുടെയും മുപ്പതാം വിവാഹ വാര്‍ഷികം ചെറുതേന്‍ പോലെ മധുരിക്കുന്നു. എന്തുകൊണ്ടും ഭാഗ്യം നിറഞ്ഞ മാതാപിതാക്കളായി ലാലും സുചിത്രയും മാറുന്നത് മകന്റെ പ്രശസ്തി കൊണ്ടു തന്നെ.

1988 ഏപ്രില്‍ 28 നായിരുന്നു മോഹന്‍ലാല്‍ വിവാഹിതനായത്. ആദ്യം ജാതക ചേര്‍ച്ചയില്ലെന്ന് പറഞ്ഞ് മുടങ്ങിയ വിവാഹമാണ് ഇവരുടേത്. ബേബി മറൈന്‍സിലെ കെ.സി. ബാബുവിന്റെ വീട്ടിലാണ് കോഴിക്കോട് എത്തുമ്പോഴൊക്കെ ലാല്‍ താമസിച്ചിരുന്നത്. രണ്ട് വര്‍ഷം മുമ്പ് വന്നു പോയ വിവാഹാലോചന വീണ്ടും പൊടി തട്ടിയെടുത്തത് ബാബുവാണ്. ജാതകം ചേരില്ലെന്ന ജ്യോതിഷ വിചാരം തെറ്റാണെന്ന് ലാല്‍ മനസിലാക്കിയതും ബാബുവിന്റെ വീട്ടില്‍ നിന്നാണ്.

യഥാര്‍ത്ഥത്തില്‍ മക്കളെ വളര്‍ത്തിയത് സുചിത്രയാണ്. സിനിമയുടെ തിരക്കില്‍ ജീവിച്ച മോഹന്‍ലാലിനെ സംബന്ധിച്ചടത്തോളം അപ്പുവിനെയും അനിയത്തിയെയും നോക്കി വളര്‍ത്താന്‍ സമയം കിട്ടിയിരുന്നില്ല. സംഗീതത്തിലും യാത്രയിലുമായിരുന്നു അപ്പുവിന് താത്പര്യം.

ഒന്നിലും രണ്ട് മക്കളെയും നിര്‍ബന്ധിച്ചിട്ടില്ല. ഇരുവരും ഹോസ്റ്റല്‍ മുറികളിലായിരുന്നു താമസം. ഇരുവര്‍ക്കും എല്ലാ സ്വാതന്ത്ര്യവും അനുവദിച്ചു. അവര്‍ അതിനെ ദുരുപയോഗം ചെയ്തില്ല. ജീവിതത്തിന്റെ വില മനസിലാക്കിയാണ് ഇരുവരും ജീവിച്ചത്. കുട്ടികളെ ഒരു വലിയ ലോകമാണ് കാത്തിരുന്നത്. കുട്ടികളുടെ സ്വാതന്ത്ര്യത്തില്‍ അഛനും അമ്മയും ഇടപെട്ടില്ല.

അപ്പുവിന്റെ സ്വഭാവം സ്ഫടികം പോലെ സുതാര്യമാണെന്ന് മോഹന്‍ലാല്‍ പറഞ്ഞു. കള്ളം പറയില്ല. യാത്രകളില്‍ അപ്പുവിന് സൗകര്യങ്ങള്‍ ആവശ്യമില്ല. ബൈക്കിലും ലഹരിയിലും അപ്പു താത്പര്യം പ്രകടിപ്പിച്ചില്ല. അപ്പു തെറ്റായ വഴിയിലൂടെ സഞ്ചരിക്കരുതെന്ന് മാത്രമാണ് മോഹന്‍ലാല്‍ ആഗ്രഹിച്ചത്. ഒരു ബിരുദം വേണമെന്ന് മാത്രമാണ് മകനെ കുറിച്ച് മോഹന്‍ലാലിന്റെ അഛന്‍ ആഗ്രഹിച്ചത്. എന്നാല്‍ അപ്പുവിനോട് ലാലിന് അതും പറയേണ്ടി വന്നില്ല. അവന്റെ വഴി അവന്‍ തന്നെ തെരഞ്ഞടുത്തു.

മോഹന്‍ലാല്‍ അഭിനയിച്ച സിനിമകളില്‍ സഹസംവിധായകനായി പ്രവര്‍ത്തിക്കുമ്പോഴും മോഹന്‍ലാലിന്റെ സൗകര്യമൊന്നും അപ്പു അനുഭവിച്ചില്ല. വേണമെങ്കില്‍ അപ്പുവിന് അതെല്ലാം അനുഭവിക്കാമായിരുന്നു. എന്നാല്‍ അഛന്റെ സൗകര്യങ്ങളൊന്നും തനിക്ക് വേണ്ടെന്ന നിലപാടാണ് അപ്പു സ്വീകരിച്ചത്. പുസ്തകങ്ങള്‍ക്കും പരീക്ഷകള്‍ക്കുമപ്പുറമായിരുന്നു അപ്പുവിന്റെ ലോകം. ഇതേ ചിന്താഗതിയായിരുന്നു മോഹന്‍ലാലിനും.

അപ്പു സിനിമയില്‍ അഭിനയിക്കുമെന്ന് മോഹന്‍ലാല്‍ കരുതിയിരുന്നില്ല. അതും അപ്പുവിന്റെ തീരുമാനമായിരുന്നു. ആദി 50 കോടി ക്ലബിലെത്തിയിട്ടും അപ്പുവിന് ആവേശം അനുഭവപ്പെട്ടില്ല. സാധാരണക്കാരനെ പോലെ അപ്പു ജീവിച്ചു. മകന്‍ പ്രശസ്തിയില്‍ നിറഞ്ഞു നില്‍ക്കുമ്പോള്‍ ഒരഛനും അമ്മക്കും ഇനി അഭിമാനിക്കാന്‍ എന്തു വേണം?