പ്രശസ്ത കന്നഡ നടി ഭാവന ബിജെപിയില്‍ ചേര്‍ന്നുവെന്ന വാര്‍ത്ത കഴിഞ്ഞദിവസം പുറത്തുവന്നിരുന്നു. എന്നാല്‍ പ്രശസ്ത കന്നഡ നടി ഭാവന ബിജെപിയില്‍ ചേര്‍ന്നതിനെ തുടര്‍ന്ന് എട്ടിന്റെ പണി കിട്ടിയത് മലയാളി നടി ഭാവനയ്ക്കാണ്. കഴിഞ്ഞ ദിവസമാണ് കന്നഡ താരം ഭാവന രമണ്ണ ബിജെപിയില്‍ അംഗമായത്. എന്നാല്‍ ഇത് മനസ്സിലാക്കാതെയാണ് ചിലര്‍ ഭാവനയുടെ പേരിലുള്ള ഫെയ്‌സ്ബുക്ക് പേജുകളില്‍ സൈബര്‍ ആക്രമണം നടത്തുന്നത്.

ഇടത് അനുഭാവികളെന്ന് തോന്നിക്കുന്ന പ്രെഫൈലുകളില്‍ നിന്നാണ് ആക്രമണമെന്ന് കാണാം. എന്നാല്‍ ഭാവനയുടെ പേജില്‍ കമ്മ്യൂണിസ്റ്റുകാര്‍ എന്ന വ്യാജേന കമന്റുകള്‍ ഇടുന്നത് സംഘ പരിവാര്‍ അനുകൂല വ്യാജ പ്രൊഫൈലുകളില്‍ നിന്നുള്ളവരാണെന്നാണ് ഇടത് സൈബര്‍ ഗ്രൂപ്പുകള്‍ പറയുന്നത്. ബിജെപിയില്‍ ചേര്‍ന്നതിനാല്‍ ഭാവനയുടെ സിനിമ ബഹിഷ്‌കരണം, സിനിമ റിലീസ് ചെയ്യിക്കില്ല തുടങ്ങിയ തരത്തിലുള്ള പ്രതികരണങ്ങളാണ് താരത്തിന്റെ പേജില്‍ നിറയുന്നത്.

എന്നാല്‍ ആള് മാറിയെന്ന് മനസ്സിലായപ്പോള്‍ കന്നഡ ഭാവനയായാലും മലയാളം ഭാവനയായാലും ഇനി മുതല്‍ ഭാവനമാര്‍ അഭിനയിക്കുന്ന മലയാള ചിത്രങ്ങളോ അന്യഭാഷ ചിത്രങ്ങളോ തങ്ങള്‍ കാണില്ലെന്ന് കമന്റിടുന്നവരും ഇക്കൂട്ടത്തിലുണ്ട്. അതേസമയം ഭാവന ഇത് തന്നെയാണെന്നും ഇവര്‍ കന്നഡയില്‍ അഭിനയിച്ചതുകൊണ്ടാണ് കന്നഡ ഭാവനയെന്ന് അറിയപ്പെടുന്നതെന്നും കമന്റിടുന്നവരുണ്ട്.

കഴിഞ്ഞ ദിവസമാണ് കോണ്‍ഗ്രസ് പ്രവര്‍ത്തകയായിരുന്ന ഭാവന രാമണ്ണ ബിജെപിയില്‍ ചേരുന്നത്. കര്‍ണാടക തെരഞ്ഞെടുപ്പ് നടക്കാന്‍ രണ്ട് ദിവസം ശേഷിക്കേയായിരുന്നു ഭാവന ബിജെപിയിലേയ്ക്ക് ചുവടുമാറ്റിയത്. 2013ലെ നിയമസഭാ തെരഞ്ഞടുപ്പിലും 2014ലെ ലോക്‌സഭാ തെരഞ്ഞടുപ്പിലും കോണ്‍ഗ്രസ് പ്രചരണരംഗത്ത് താരം സജീവമായിരുന്നു.