വളരെയധികം അവസരങ്ങൾ ലഭിച്ചിട്ടും ഇതുവരെയും നാടകത്തിൽ അഭിനയിക്കാത്തതിനു പിന്നിലെ കാരണം വെളിപ്പെടുത്തി നടൻ സിദ്ധിഖ്‌. ഷര്‍ട്ടില്ലാതെ ഒരു സീനില്‍ പോലും അഭിനയിക്കാന്‍ തനിക്കാക്കാകാത്തതാണ് ഇതിനു കാരണമെന്ന് സിദ്ധിഖ് പറഞ്ഞു.

ഒരുപാട് പേര്‍ നാടകത്തില്‍ അഭിനയിക്കാന്‍ ക്ഷണിച്ചിരുന്നു. എന്നാല്‍ അവര്‍ പറയുന്ന വേഷങ്ങള്‍ ഭീമനും അര്‍ജുനനുമൊക്കെയാണ്. അതൊക്കെ ഷര്‍ട്ടില്ലാതെ അഭിനയിക്കേണ്ട വേഷങ്ങളായതുകൊണ്ടാണ് നാടകത്തില്‍ എത്തപ്പെടാതിരുന്നതെന്നും അദ്ദേഹം പറഞ്ഞു.

സിനിമയില്‍ മുപ്പത് വര്‍ഷത്തോളമായി അഭിനയിക്കുന്നുണ്ട്. ഒരു ചെറിയ സീനില്‍പോലും ഷര്‍ട്ടിടാതെ അഭിനയിക്കാന്‍ വല്ലാത്ത ചമ്മലാണ്. ഒരു പുതപ്പെങ്കിലും വേണം. ഇതൊക്കെയാണ് എന്റെ ദൗര്‍ബല്യങ്ങള്‍. കഷണ്ടി ഒരു ദൗര്‍ബല്യമായിട്ട് തോന്നിയിട്ടില്ല. അതിനാലാണ് വിഗ് വെക്കാത്തത്. അതിലും വലിയ ദൗര്‍ബല്യങ്ങള്‍ തനിക്കുണ്ടെന്ന ഉറച്ച ബോധ്യമുള്ള ആളാണ് താനെന്നും സിദ്ധിഖ് പറഞ്ഞു.

സണ്ണി വെയ്ന്‍ പ്രൊഡക്ഷന്‍സിന്റെ ലോഗോയും ആദ്യ നിര്‍മ്മാണ സംരംഭമായ മൊമെന്റ ജസ്റ്റ് ബിഫോര്‍ ഡെത്ത് ‘ നാടകത്തിന്റെ പോസ്റ്റർ ലോഞ്ച് ചെയ്യുന്നതിനിടയിലാണ് ഇക്കാര്യം വ്യക്തമാക്കിയത്.