സിനിമയില്‍ പ്രണയരംഗങ്ങള്‍ കാണിക്കുമ്പോള്‍ കാമുകിയും കാമുകനും ഒരേ മതം, ജാതി, സോഷ്യല്‍ സ്റ്റാറ്റസ് എന്നിവരാണെന്നുള്ള അടിക്കുറിപ്പ് കൂടി കൊടുക്കണമെന്ന് സെന്‍സര്‍ ബോര്‍ഡിനോട് അഭ്യര്‍ത്ഥിച്ച് തിരക്കഥാകൃത്തും സംവിധായകനും നടനുമായ സിദ്ധാര്‍ത്ഥ് ശിവ. പ്രണയിച്ച് വിവാഹം കഴിച്ചതിന്റെ പേരില്‍ കൊല്ലപ്പെട്ട കെവിന്റെ സംഭവവുമായി ബന്ധപ്പെട്ടാണ് സിദ്ധാര്‍ത്ഥ് ശിവയുടെ ഫെയ്‌സ്ബുക്ക് പോസ്റ്റ്.

സിദ്ധാർഥ് ശിവയുടെ ഫെയ്‌സ്ബുക്ക് കുറിപ്പ്

ബഹുമാനപ്പെട്ട സെൻസർ ബോർഡ്

ഇനി മുതൽ സിനിമയിലെ പ്രണയരംഗങ്ങൾ കാണിക്കുമ്പോൾ ‘ഈ പ്രണയരംഗങ്ങളിൽ അഭിനയിച്ചിരിക്കുന്ന രണ്ടുപേരും ഒരേജാതിയിലും മതത്തിലും നല്ല കുടുംബത്തിലും ഉളളവരാണെന്ന’ അടിക്കുറിപ്പ് കൂടി കൊടുക്കുക. കാരണം സിനിമയിലെ പ്രണയം കണ്ട് അത് ദിവ്യമാണ്, അനശ്വരമാണ്, കാവ്യാത്മകമാണ്, മതാതീതമാണ് എന്ന് കരുതി സ്വപ്നം കണ്ട് ജാതീം മതോം സമ്പത്തുമൊന്നും നോക്കാതെ പ്രേമിച്ച് നടക്കുന്ന പാവം പിളളേര് മൂന്നാം പക്കം വല്ല വെളളത്തിലും പൊങ്ങും.

പ്രേമിച്ച പെണ്‍കുട്ടിയെ കല്യാണം കഴിച്ചതിന്‍റെ പേരില്‍ പെണ്‍കുട്ടിയുടെ ആങ്ങളയും കൂട്ടുകാരും കൂടി തല്ലിക്കൊന്ന കെവിന്‍റെ മൃതദേഹം പൊങ്ങിയത് തോട്ടിലാണ്. പൊലീസുമായി ഉള്‍പ്പെടെ ഒത്തുകളിച്ചാണ് കെവിനെ കൊലപ്പെടുത്തിയതെന്നാണ് ഉയരുന്ന ആരോപണം. പ്രതികളുടെ മൊഴികളില്‍നിന്ന് വ്യക്തമാകുന്നതും ഇത് തന്നെയാണ് എന്നാണ് സൂചന. ഈ സംഭവത്തിന്‍റെ പശ്ചാത്തലത്തിലാണ് സിദ്ധാര്‍ത്ഥ് ശിവയുടെ പ്രതികരണം.