തമിഴ് സിനിമാ-രാഷ്ട്രിയ രംഗത്ത് വന്‍ തരംഗമുണ്ടാക്കിയായിരുന്നു രജനികാന്തിന്റെ രാഷ്ട്രിയ പ്രവേശന പ്രഖ്യാപനം. അടുത്ത പൊതുതിരഞ്ഞെടുപ്പുകള്‍ മുതല്‍ എല്ലാ മണ്ഡലങ്ങളിലും തന്റെ പാര്‍ട്ടിയുടെ സ്ഥാനാര്‍ത്ഥികളുണ്ടാകുമെന്നും രജനി പ്രഖ്യാപിച്ചിട്ടുണ്ട്. ഇപ്പോള്‍ തന്റെ രാഷ്ട്രീയ വേരുകള്‍ പടര്‍ത്തുന്നതിന്റെ ആദ്യ ഘട്ടമായി ചാനല്‍ ആരംഭിക്കാന്‍ പോവുകയാണ് അദ്ദേഹം. ജയലളിതയും കരുണാനിധിയുമൊക്കെ തങ്ങളുടെ സ്വന്തം ചാനലുകളിലൂടെ രാഷ്ട്രീയ ജീവിതം പുഷ്ടിപ്പെടുത്തിയവരാണ്.

ചാനല്‍ ആരംഭിക്കുന്നതിന്റെ ഭാഗമായി രജനിയുടെ ടീം എന്‍ഒസി സര്‍ട്ടിഫിക്കേറ്റിന് അപേക്ഷിച്ചു കഴിഞ്ഞു. മൂന്നുപേരുകളാണ് സംഘം മുന്നോട്ടുവച്ചിരിക്കുന്നത്: സൂപ്പര്‍ സ്റ്റാര്‍ ടിവി, രജനി ടിവി, തലവൈര്‍ ടിവി എന്നിങ്ങനെയാണ് പേരുകള്‍. രജനി മക്കള്‍ മണ്ട്രത്തിന്റെ അഡ്മിനിസ്‌ട്രേറ്റര്‍ വി.എം സുധാകറാണ് അപേക്ഷ നല്‍കിയിരിക്കുന്നത്. തന്റെ പേരും ചിത്രവും വച്ച് ചാനല്‍ തുടങ്ങുന്നതില്‍ രജനിക്കും എതിര്‍പ്പില്ലെന്നാണ് ലഭിക്കുന്ന വിവരം.

ഭൂരിഭാഗം രാഷ്ട്രീയ പാര്‍ട്ടികള്‍ക്കും സ്വന്തമായി ചാനലുള്ള സംസ്ഥാനമാണ് തമിഴ്‌നാട്. എഐഡിഎംകെയുടെ നേതൃത്വത്തിലുള്ള ചാനലാണ് ജയ ടിവി. ശശികലയും കുടുംബവുമായിരുന്നു ജയ ടിവി നോക്കി നടത്തിയിരുന്നത്. പാര്‍ട്ടി പിളര്‍ന്നതിന് പിന്നാലെ ന്യൂസ് ജെ എന്ന പേരില്‍ ഇവര്‍പുതിയ ചാനല്‍ ആരംഭിച്ചു. ഡിഎംകെയുടെ നേൃത്വത്തില്‍ കലൈഞ്ജര്‍ ടിവി പ്രവര്‍ത്തിക്കുമ്പോള്‍ എം. കെ സ്റ്റാലിന്റെ കുടുംബം സണ്‍ ടിവി നടത്തുന്നു. വിജയ കാന്തിന്റെ രാഷ്ട്രീയ പാര്‍ട്ടിയുടെ ചാനലാണ് ക്യാപ്റ്റന്‍ ടിവി, പിഎംകെയുടെ ചാനലാണ് മക്കള്‍ ടിവി.