സിനിമയിലേയ്ക്കെത്തുന്ന ഒട്ടുമിക്ക താരങ്ങളുടെയും ആഗ്രഹമാണ് രജനികാന്തിനൊപ്പം അഭിനയിക്കുകയെന്നത്. അതില്‍ നടിമാരെന്നോ നടന്മാരെന്നോ വ്യത്യാസമില്ല. അദ്ദേഹത്തിന്റെ സിനിമയില്‍ ചെറിയ ഒരു വേഷം കിട്ടാനോ അദ്ദേഹത്തെ പരിചയപ്പെടാനും കൊതിച്ചു നില്‍ക്കുന്ന നിരവധി താരങ്ങളുണ്ട്. രജനികാന്ത് എന്ന വ്യക്തിയുടെ എളിമയും വ്യക്തിത്വവും കൊണ്ടുകൂടിയാണത്. ഇപ്പോള്‍ രജനിക്കൊപ്പം അഭിനയിക്കാന്‍ അവസരം ലഭിച്ചതിന്റെ സന്തോഷത്തിലാണ് നടി കീര്‍ത്തി സുരേഷ്. അതും രജനിയുടെ നായികയായാണ് കീര്‍ത്തിയെത്തുന്നത്. 

കാല, കബാലി എന്ന ചിത്രങ്ങളില്‍ പ്രായമുള്ള കഥാപാത്രത്തെയായിരുന്നു രജനി അവതരിപ്പിച്ചത്. ഇതിനു ശേഷം പേട്ടയില്‍ അദ്ദേഹം യുവാവായി എത്തി. ഇനി വരുന്ന ചിത്രത്തിലും അത്തരത്തിലൊരു പ്രായം കുറഞ്ഞ കഥാപാത്രമായിരിക്കുമെന്നാണ് സൂചന. പേട്ടയില്‍ അദ്ദേഹത്തിന്റെ നായികമാര്‍ തൃഷയും സിമ്രാനുമായിരുന്നു. ഏആര്‍ മുരുകദോസാണ് രജനി-കീര്‍ത്തി ചിത്രത്തിന്റെ സംവിധായകന്‍. 

മലയാളി കൂടിയായ കീര്‍ത്തി തമിഴ് സിനിമാ മേഖലയിലെ ഏറ്റവും താരമൂല്യമുള്ള നടിമാരില്‍ ഒരാളാണ്. വിക്രമിന്റെ സ്വാമി സ്‌ക്വയര്‍, വിജയ് നായകനായ സര്‍ക്കാര്‍ എന്നിവയിലും കീര്‍ത്തി തന്നെയായിരുന്നു നായിക. സര്‍ക്കാര്‍ എന്ന ചിത്രം സംവിധാനം ചെയ്തത് മുരുഗദോസ് ആയിരുന്നു.

ചിത്രം ഒരു അടിമുടി രജനികാന്ത് സിനിമയായിരിക്കും എന്നായിരുന്നു മുമ്പ് എ.ആര്‍ മുരുഗദോസ് മാധ്യമങ്ങളോട് പറഞ്ഞിരുന്നത്. എല്ലാ രജനി ഫാന്‍സിനേയും ചിത്രം സംതൃപ്തിപ്പെടുത്തുമെന്നും അദ്ദേഹം അവകാശപ്പെട്ടിരുന്നു.

നിലവില്‍ തിയേറ്ററുകളില്‍ വിജയകരമായി പ്രദര്‍ശനം തുടരുകയാണ് പേട്ട. ഇതുവരെ 100 കോടിക്കു മുകളില്‍ കളക്ഷന്‍ നേടിയ ചിത്രം 150 കോടിയിലേക്കുള്ള കുതിപ്പിലാണ്. സിമ്രാന്‍, വിജയ് സേതുപതി, നവാസുദ്ദീന്‍ സിദ്ദിഖി എന്നിവരും ചിത്രത്തില്‍ പ്രധാന വേഷങ്ങളില്‍ എത്തുന്നു.