സൂര്യയുടെ നിര്‍മ്മാണ കമ്പനിയായ 2ഡി എന്റര്‍ടെയ്ന്‍മെന്റ്‌സിന്റെ അടുത്ത ചിത്രത്തിലൂടെ സൂര്യയുടെ മകന്‍ ദേവ് സിനിമയിലേയ്‌ക്കെത്തുന്നെന്ന തരത്തില്‍ വാര്‍ത്തകള്‍ വന്നിരുന്നു. വന്‍ സ്വീകാര്യതയാണ് വാര്‍ത്തയ്ക്ക് ലഭിച്ചത്. സൂര്യ ആരാധകര്‍ വാര്‍ത്ത ഏറ്റെടുക്കുകയും ആഘോഷിക്കുകയും ചെയ്തു. എന്നാല്‍ ഇത് വാസ്തവ വിരുദ്ധമെന്ന് വെളിപ്പെടുത്തി സൂര്യയുടെ കമ്പനി തന്നെ രംഗത്തെത്തി.

സൂര്യയുടേയും ജ്യോതികയുടേയും മകന്‍ ദേവ് സിനിമയില്‍ അഭിനയിക്കുന്നു എന്ന വാര്‍ത്തയില്‍ യാതൊരു കഴമ്പുമില്ലെന്ന്, സംവിധായകനും സൂര്യയുടെ ഉടമസ്ഥതയിലുള്ള 2ഡി എന്റര്‍ടെയ്ന്‍മെന്റിന്റെ സഹനിര്‍മാതാവുമായ രാജശേഖര്‍ പാണ്ഡ്യന്‍ ട്വീറ്റ് ചെയ്തു.

ഒരു ചെറിയ ആണ്‍കുട്ടിയും അവന്റെ വളര്‍ത്തു പട്ടിയും തമ്മിലുള്ള വൈകാരിക അടുപ്പത്തെ ആസ്പദമാക്കി 2ഡി എന്റര്‍ടെയിന്റ്മെന്റ് ഒരുക്കുന്ന ചിത്രത്തിലാണ് എട്ട് വയസുകാരനായ ദേവ് മുഖ്യ വേഷത്തില്‍ എത്തുന്നത് എന്നായിരുന്നു റിപ്പോര്‍ട്ട്.

തങ്ങളുടെ പുതിയ ചിത്രത്തിലേക്ക് തമിഴ് സംസാരിക്കാന്‍ അറിയാവുന്ന, ആറ് വയസിനും എട്ടു വയസിനും ഇടയില്‍ പ്രായമുള്ള ആണ്‍കുട്ടികളേയും പെണ്‍കുട്ടികളേയും ആവശ്യമുണ്ടെന്ന് അറിയിച്ചുകൊണ്ട് ജനുവരി എട്ടിന് 2ഡി എന്റര്‍ടെയിന്‍മെന്റിന്റെ ട്വീറ്റ് വന്നതിന് പിന്നാലെയാണ് വാര്‍ത്തയും വന്നത്. എന്നാല്‍ ഈ വാര്‍ത്തയില്‍ യാതൊരു വസ്തുതയും ഇല്ലെന്നും ദയവായി വസ്തുതാ വിരുദ്ധമായ കാര്യങ്ങള്‍ പ്രചരിപ്പിക്കരുത് എന്നുമായിരുന്നു രാജ് പാണ്ഡ്യന്റെ ട്വീറ്റ്.