'വട ചെന്നൈ' യ്ക്ക് ശേഷം ധനുഷ്-വെട്രിമാരൻ കൂട്ടുകെട്ടിൽ ഒരുങ്ങുന്ന 'അസുരൻ' തമിഴ് സിനിമ മേഖലയിൽ ഏറെ കോളിളക്കം സൃഷ്ടിക്കുമെന്നാണ് സിനിമ പ്രേമികളുടെ വിലയിരുത്തൽ. ഈയിടയ്ക്ക് പുറത്തിറങ്ങിയ 'വട ചെന്നൈ' ധനുഷിന്റെ മികച്ച ചിത്രങ്ങളിലൊന്നായിരുന്നു. ആരാധക പ്രശംസകൾ പിടിച്ചു പറ്റിയ ചിത്രത്തിന് മികച്ച സ്വീകാര്യതയുമുണ്ടായിരുന്നു. അതിനാൽ തന്നെ ധനുഷും വെട്രിമാരനും ഒന്നിക്കുന്ന അസുരനായുള്ള കാത്തിരിപ്പിലാണ് തമിഴകം.

അതേസമയം ധനുഷിന്റെ ചിത്രം അസുരനെക്കുറിച്ചുള്ള പുതിയ ട്വീറ്റ് കേരളത്തിലും സിനിമാ ആരാധകർക്കിടയിൽ വലിയ ചർച്ചായാവുകയാണ്. ധനുഷ്-വെട്രിമാരൻ കൂട്ടുകെട്ടിനുപരി മലയാളത്തിന്റെ സ്വന്തം നായിക മഞ്ജു വാര്യർ തമിഴ് സിനിമ ലോകത്തേയ്ക്ക് കടക്കാനൊരുങ്ങുന്നതായി ധനുഷ് ട്വീറ്റ് ചെയ്യുകയായിരുന്നു.

നിത്യഹരിത നായികയായ മഞ്ജു വാര്യരാണ് ചിത്രത്തിൽ പ്രധാന സ്ത്രീ കഥാപാത്രത്തെ അവതരിപ്പിക്കുക എന്നായിരുന്നു ധനുഷ് തന്‍റെ ട്വിറ്ററിൽ കുറിച്ചിരിക്കുന്നത്. സിനിമ ലോകത്ത് വിസ്മയങ്ങൾ തീർത്ത അഭിനയപാടവത്തിൽ നിന്നും കൂടുതൽ പഠിക്കാൻ അവസരം വന്നു ചേർന്നിരിക്കുന്നുവെന്നും ധനുഷ് കുറിച്ചു. ജനുവരി 26 ന് ചിത്രത്തിന്‍റെ ഷൂട്ടിംഗ് ആരംഭിക്കുമെന്നും ധനുഷ് ട്വിറ്ററിൽ കുറിച്ചു. ധനുഷിന്റെ ട്വീറ്റിനു പിന്നാലെ മഞ്ജുവും തന്റെ തമിഴ് അരങ്ങേറ്റത്തെ കുറിച്ച് ഫേസ്ബുക്കില്‍ കുറിച്ച് കഴിഞ്ഞു. ഒപ്പം ധനുഷിന്റെ പോസ്റ്റിന്റെ സ്‌ക്രീന്‍ ഷോട്ടും പങ്കു വെച്ചിട്ടുണ്ട്. ഇതിനു പിന്നാലെ ചിത്രത്തെപ്പറ്റിയുള്ള ചർച്ചകളും സിനിമ മേഖലയിൽ സജ്ജീവമാകുകയിരുന്നു.

മഞ്ജുവിന്റെ തമിഴ് അരങ്ങേറ്റത്തെപ്പറ്റി മുൻപും പല തരത്തിലുള്ള വാർത്തകൾ വന്നിരുന്നു. തമിഴ് സിനിമ മേഖലയോടും ഭാഷയോടുമുള്ള താത്പര്യം മഞ്ജു തന്നെ പലപ്പോഴും പ്രകടമാക്കിയിട്ടുമുണ്ട്. ഏതായാലും ഹിറ്റ് കൂട്ടുകെട്ടിനൊപ്പമുള്ള മഞ്ജുവിന്റെ കടന്ന് വരവ് കേരളത്തിലെ തീയറ്ററുകളും നിറയ്ക്കുമെന്നാണ് അണിയറ പ്രവർത്തരുടേയും കണക്കുകൂട്ടൽ.

ചിത്രത്തിന്റെ പോസ്റ്റര്‍ നേരത്തെ തന്നെ ധനുഷ് ഫേസ്ബുക്കിലൂടെ പുറത്തു വിട്ടിരുന്നു. കലൈപുള്ളി എസ് താണുവിന്റെ നിര്‍മ്മാണത്തില്‍ ഒരുങ്ങുന്ന അസുരന്റെ ചിത്രീകരണം ജനുവരി 26ന് ആരംഭിക്കുമെന്നാണ് അറിയാൻ കഴിഞ്ഞത്. ചിത്രത്തെ കുറിച്ച കൂടുതല്‍ വിവരങ്ങള്‍ ഒന്നും ലഭ്യമായിട്ടില്ല. വി ക്രിയേഷന്‍സ് ആണ് ചിത്രം നിര്‍മിക്കുന്നത്.

ദേശീയ തലത്തില്‍ ശ്രദ്ധിക്കപ്പെട്ട ആടുകളം, വിസാരണൈ തുടങ്ങിയ ചിത്രങ്ങളിലൂടെ സംവിധായകൻ വെട്രിമാരന്‍ ഇന്ന് രാജ്യത്തെ ഏറ്റവും പോപ്പുലര്‍ ആയ സംവിധായകരില്‍ ഒരാളാണ്. മാരി 2 ആണ് ധനുഷിന്റെ ഒടുവിൽ പുറത്തിറങ്ങിയ ചിത്രം. സായി പല്ലവി നായികയായ ചിത്രം മികച്ച ബോക്സ് ഓഫീസ് വിജയം നേടിയിരുന്നു.