അന്തരിച്ച നടന്‍ അംബരീഷിന്റെ ആത്മശാന്തിക്കായി നടത്തിയ ചടങ്ങില്‍ താലത്തില്‍ വച്ച മദ്യവും സിഗരറ്റും വിവാദമാകുന്നു. ചടങ്ങിന്റെ ചിത്രം കഴിഞ്ഞ ദിവസം പുറത്തുവരികയും വൈറലാകുകയും ചെയ്തിരുന്നു. തെന്നിന്ത്യന്‍ ചലച്ചിത്ര താരവും കേന്ദ്രമന്ത്രിയുമായിരുന്നു അംബരീഷ്.

അംബരീഷിന്റെ ചിത്രത്തിന് സമീപം ഭാര്യയും നടിയുമായ സുമലത നില്‍ക്കുന്ന ചിത്രമാണ് പുറത്തുവന്നത്. പൂക്കള്‍ക്കും പഴങ്ങള്‍ക്കുമൊപ്പം താലത്തില്‍ മദ്യവും വച്ചിരിക്കുന്നത് കാണാം. വിസ്‌കി കുപ്പിക്ക് സമീപത്ത് തന്നെ വെള്ളവും സിഗരറ്റും ലൈറ്ററും വച്ചിരിക്കുന്നു. ചിത്രം പുറത്തുവന്നതിന് പിന്നാലെ ചടങ്ങില്‍ മദ്യവും സിഗരറ്റും വച്ചത് ശരിയല്ലെന്നാണ് ആരോപണം ഉയര്‍ന്നത്. അതേസമയം മരിച്ചയാളുടെ ഇഷ്ടങ്ങള്‍ക്കാണ് പ്രധാനമെന്നും ഇഷ്ടഭക്ഷണങ്ങളും ചടങ്ങില്‍ വയ്ക്കാറുണ്ടെന്നും സുമലതയും ബന്ധുക്കളും പറയുന്നു.

കഴിഞ്ഞ വര്‍ഷം നവംബര്‍ 24നാണ് അംബരീഷ് മരിച്ചത്. മരണം നടന്ന് രണ്ട് മാസങ്ങള്‍ക്ക് ശേഷമാണ് കുടുംബം ചടങ്ങ് നടത്തിയത്. ഇതിന്റെ ചിത്രമാണ് വൈറലായത്.