കഴിഞ്ഞ ദിവസം പുറത്തിറങ്ങിയ അമലപോള്‍ ചിത്രം 'ആടൈ'യുടെ ടീസര്‍ പരക്കെ ശ്രദ്ധ നേടി. രത്‌ന കുമാര്‍ സംവിധാനം ചെയ്യുന്ന ചിത്രത്തിന്റെ ടീസര്‍ റിലീസ് ചെയ്തത് കരണ്‍ ജോഹര്‍ ആണ്. ടീസറില്‍ അര്‍ദ്ധനഗ്‌നയായാണ് അമലപോള്‍ എത്തിയത്. 70-ലധികം വ്യൂസ് നേടിയ ടീസര്‍ ദിവസങ്ങളോളം യൂട്യൂബില്‍ ട്രെന്‍ഡിംഗ് ആയിരുന്നു. എന്നാല്‍ ഈ ടീസറില്‍ അമ്മ എന്ന് സേവ് ചെയ്ത് കാണിച്ച ഒരു നമ്പറിനെ കുറിച്ച് പുറത്ത് വരുന്ന വാര്‍ത്ത കൗതുകകരമാണ്.

ഈ നമ്പറിലേക്ക് കുറേ പൂവാലന്മാര്‍ തുരുതുരെ വിളിച്ചുവെന്ന വാര്‍ത്തയാണ് പുറത്ത് വരുന്നത്. തമിഴ്‌നാട്ടുകാര്‍ മാത്രമല്ല മലയാളികളും ഈ നമ്പറിലേക്ക് വിളിച്ചുവെന്നാണ് റിപ്പോര്‍ട്ട്. ഒടുവില്‍ തമിഴ് ആര്‍.ജെ സരിത്തിരന്‍ ഈ നമ്പറുകള്‍ ശേഖരിച്ച് അതിലേക്ക് തിരിച്ചു വിളിച്ചപ്പോള്‍ സംഗതി കൈവിട്ടു പോയെന്നു കരുതി എല്ലാവരും ഞെട്ടി.

പോലീസില്‍ നിന്നും പരാതി കിട്ടിയ ശേഷം വിളിക്കുകയാണെന്ന് പറഞ്ഞപ്പോള്‍ ഫോണ്‍ എടുത്തവര്‍ ഒന്ന് ഞെട്ടി. ചിലര്‍ കോള്‍ കട്ട് ചെയ്തപ്പോള്‍ മറ്റുള്ളവര്‍ മാപ്പു പറഞ്ഞു. കാര്യം വീട്ടില്‍ അറിഞ്ഞാല്‍ പ്രശ്‌നമാകുമെന്നു അപേക്ഷിച്ചവരുണ്ടെന്നും റിപ്പോര്‍ട്ടുണ്ട്.

അമല പോള്‍ ഈ ചിത്രത്തില്‍ അവതരിപ്പിക്കുന്നത് മുന്‍നിര നായികമാരൊക്കെ ചെയ്യാന്‍ മടിക്കുന്ന കഥാപാത്രമാണ്. ത്രില്ലര്‍ സ്വഭാവമുള്ള ചിത്രമാണ് ആടൈ. ചിത്രത്തിന് 'എ' സര്‍ട്ടിഫിക്കറ്റ് കിട്ടിയത് കഴിഞ്ഞ ദിവസം വാര്‍ത്തയായിരുന്നു. വയലന്‍സ് രംഗങ്ങളുടെ അതിപ്രസരമാണ് ചിത്രത്തിന് എ സര്‍ട്ടിഫിക്കറ്റ് ലഭ്യമാകാന്‍ കാരണമായത്.

ചിത്രത്തിന്റെ ഫസ്റ്റ്‌ലുക്ക് പോസ്റ്ററും ഏറെ ചര്‍ച്ചയായിരുന്നു. ടോയ്‌ലറ്റ് പേപ്പര്‍ ശരീരത്തില്‍ ചുറ്റി, മുഖത്തും ശരീരത്തിലും പടര്‍ന്ന ചോരയുമായി പേടിച്ച് കരയുന്ന അമലപോളിന്റെ ചിത്രമായിരുന്നു ഫസ്റ്റ് ലുക്ക് പോസ്റ്ററില്‍. കാമിനി എന്നാണ് ചിത്രത്തില്‍ അമല പോളിന്റെ കഥാപാത്രത്തിന്റെ പേര്.