നടി സത്യകല അച്ഛന്റെ വീട്ടുതടങ്കലിലാണെന്ന ആരോപിച്ച്‌ നിര്‍മ്മാതാവും നടനുമായ ഷമന്‍ മിത്രു ഹേബിയസ് കോര്‍പ്പസ് ഹര്‍ജി നല്‍കി. സത്യകലയെ താത്പര്യമില്ലാത്ത വിവാഹത്തിന് നിര്‍ബന്ധിക്കുകയാണെന്നും പൊള്ളിച്ചിയിലെ വീട്ടില്‍ പൂട്ടിയിട്ടിരിക്കുകയുമാണെന്നാണ് ഷമന്റെ ആരോപണം. ആദ്യം സിനിമയില്‍ അഭിനയിക്കാന്‍ വീട്ടുകാര്‍ സമ്മതിച്ചിരുന്നെന്നും പിന്നീട് വിവാഹത്തിന് നിര്‍ബന്ധിക്കുകയായിരുന്നെന്നും ഷമന്‍ ആരോപിക്കുന്നു. സിനിമയുടെ ഷൂട്ടിംഗ് സമയത്ത് അച്ഛനും രണ്ടാനമ്മയും ചേര്‍ന്ന് മാനസികമായി പീഡിപ്പിക്കുന്ന കാര്യം സത്യകല പറഞ്ഞിരുന്നെന്നും ഷമന്‍ പറയുന്നു.

സിനിമയുടെ റിലീസുമായി ബന്ധപ്പെട്ടുള്ള പത്രസമ്മേളനത്തില്‍ പങ്കെടുക്കാതെ വന്നതോടെ കാര്യം അന്വേഷിച്ചപ്പോഴാണ് വീട്ടുതടങ്കലിലാണെന്ന് അറിഞ്ഞതെന്നും ഷമന്‍ ഹര്‍ജിയില്‍ പറയുന്നു. ഉടന്‍ പൊലീസിനെ അറിയിച്ചെങ്കിലും ഫലമുണ്ടാകാതെ വന്നതോടെയാണ് കോടതിയെ സമീപിച്ചതെന്നും നടന്‍ കോടതിയെ അറിയിച്ചു. ആഗസ്റ്റ് രണ്ടിന് പുറത്തിറങ്ങുന്ന തൊരട്ടി എന്ന ചിത്രത്തിലെ നായികയാണ് സത്യകല. ഷമന്‍ ചിത്രത്തില്‍ പ്രധാനവേഷത്തിലെത്തുന്നുണ്ട്.