വമ്പന്മാരെ വീഴ്‌ത്തിയ സോളാര്‍ പരസ്യം ഇതാ... രാത്രിയിലും സൂര്യപ്രകാശം, സൗരോര്‍ജ ഉപകരണങ്ങള്‍ ഏറ്റവും കുറഞ്ഞ വിലയില്‍, ഒരു വര്‍ഷം 9,000 രൂപവരെ വൈദ്യുതി ലാഭിക്കാം, ഒപ്പം വിഎസ്‌ സര്‍ക്കാരിന്റെ അര പേജ് പരസ്യവും
ഇതെന്താ ഈ മലയാളികള്‍, പ്രത്യേകിച്ചും നാലു കാശുള്ളവര്‍ ഇത്രമാത്രം ഇങ്ങനെ പറ്റിക്കപ്പെടുന്നത്‌? സോളാര്‍ വിവാദം ഉയര്‍ന്നു വന്നപ്പോള്‍ എല്ലാവരും ചോദിച്ച ഒരു ചോദ്യമാണിത്‌. എന്നാല്‍ സോളാറില്‍ പണം മുടക്കിയവരാരും കണ്ണുമടച്ച്‌ പണം നല്‍കിയവരല്ല. ഭരണാധികാരികളും ഉദ്യോഗസ്ഥരും എന്തിന്‌ മാധ്യമങ്ങള്‍ പോലും ഇതില്‍ കണ്ണികളാവുന്നുണ്ട്‌. പത്രപരസ്യം കണ്ട്‌ എടുത്തു ചാടിയാല്‍ കുറ്റം പറയാം. എന്നാല്‍ പ്രശസ്‌ത പത്രത്തില്‍ വന്ന ബിസിനസ്‌ ഫീച്ചറാണ്‌ പലരേയും സോളാറിലേക്ക്‌ തള്ളിയിട്ടത്‌. കൂടാതെ വിഎസ്‌ സര്‍ക്കാരിന്റെ വക ഊര്‍ജ സംരക്ഷണ അവാര്‍ഡിന്റെ അരപേജ്‌ പരസ്യവും.
2010 ഡിസംബര്‍ 14ന്‌ ദ ന്യൂ ഇന്ത്യന്‍ എക്‌സ്‌പ്രസില്‍ പ്രസിദ്ധീകരിച്ച പരസ്യം ഉള്‍പ്പെടെ ഒരു പേജു വരുന്ന ബിസിനസ്‌ ഫീച്ചറാണ്‌ ഇപ്പോള്‍ വിവാദമായിരിക്കുന്നത്‌. ഈ ഫീച്ചറില്‍ വിഎസ്‌ സര്‍ക്കാര്‍ നല്‍കിയ അരപേജ്‌ പരസ്യമാണ്‌ കഴിഞ്ഞദിവസം നിയമസഭയില്‍ തിരുവഞ്ചൂര്‍ രാധാകൃഷണന്‍ ഉയര്‍ത്തിക്കാട്ടിയത്‌.
ആരേയും വീഴ്‌ത്തുന്ന പരസ്യവാചകങ്ങള്‍ ബിസിനസ്‌ ഫീച്ചറിന്റേയും സര്‍ക്കാര്‍ പരസ്യത്തിന്റേയും അകമ്പടിയില്‍ എത്തിയതാണ്‌ പലരും സോളാറില്‍ പണം നിക്ഷേപിക്കാന്‍ കാരണം.
പല വമ്പന്മാരേയും വലയില്‍ വീഴ്‌ത്തിയ ആ ബിസിനസ്‌ ഫീച്ചറിന്റെ സംക്ഷിപ്‌തം ഇതാണ്‌.
വീടുകള്‍, സ്ഥാപനങ്ങള്‍, ബിസിനസ്‌ കേന്ദ്രങ്ങള്‍, ഗവ. സ്ഥാപനങ്ങള്‍ എന്നിവയ്‌ക്കെല്ലാം ഉയര്‍ന്ന വൈദ്യുതി ചെലവില്‍ നിന്നും നല്ലൊരു കുറവുവരുത്തി സ്വയം പര്യാപ്‌തമാക്കാന്‍ കഴിയുന്ന സ്ഥാപനമാണ്‌ 1987ല്‍ സ്ഥാപിതമായ ടീം സോളാര്‍. രാജ്യത്തെ ഏറ്റവും വലിയ ഊര്‍ജ വിതരണ സേവന കമ്പനി കൂടിയായ ടീം സോളാര്‍ ഉന്നത നിലവാരമുള്ള ഉത്‌പന്നന്നങ്ങളാണ്‌ നല്‍കുന്നത്‌. ടീം സോളാറിന്റെ സോളാര്‍, വിന്‍ഡ്‌ മില്‍ എന്നിവയിലൂടെ ഓരോമാസവും നല്ല പണം ലാഭിക്കാന്‍ കഴിയും.
ആര്‍ഇ 3 കണ്‍സപ്‌റ്റ്‌ അടിസ്ഥാനമാക്കി 3 പ്രധാന കാര്യങ്ങളാണ്‌ ടീം സോളാര്‍ വാഗ്‌ദാനം ചെയ്യുന്നത്‌. ഇപ്പോഴുപയോഗിക്കുന്ന വൈദ്യുതി വിദഗ്‌ദ്ധ മാനേജ്‌മെന്റിലൂടെ താരതമ്യ പഠനം ചെയ്യുന്ന റിവ്യൂ, കാര്യക്ഷമമായ ഉത്‌പന്നങ്ങളിലൂടെ കാര്യക്ഷമമായ വൈദ്യുതി പ്രദാനം ചെയ്യുന്ന റെഡ്യൂസ്‌, ഉയര്‍ന്ന കാര്യക്ഷമതയുള്ള സോളാര്‍ ഉത്‌പന്നങ്ങളും അവയുടെ സേവനങ്ങളും ഉള്‍ക്കൊള്ളുന്ന റിന്യൂ എന്നിവയാണവ.
മൂന്ന്‌ നാല് മണിക്കൂറുകള്‍ മാത്രമുള്ള സൂര്യപ്രകാശം കൊണ്ട് ഈ സോളാര്‍ പാനലുകള്‍ പ്രവര്‍ത്തിപ്പിക്കാന്‍ കഴിയും. സ്‌കൂളുകള്‍, കോളേജുകള്‍, വില്ലകള്‍, അപ്പാര്‍ട്ടുമെന്റുകള്‍ എന്നിവയ്‌ക്കും സോളാര്‍ പാനല്‍ വളരെ ഉപയോഗപ്രദമാണ്‌.
കാറ്റുള്ള സ്ഥലങ്ങള്‍ക്കായി സോളാര്‍ ഹൈബ്രിഡും ഉപയോഗിക്കാവുന്നതാണ്‌. കൂടാതെ 24 മണിക്കൂറും പ്രവര്‍ത്തിക്കുന്ന മൊബൈല്‍ ഗ്രീന്‍ ഫോഴ്‌സും ടീം സോളാറിനുണ്ട്‌. രാത്രിയില്‍ സൂര്യപ്രകാശമാണ്‌ കമ്പനിയുടെ മുഖ്യലക്ഷ്യം എന്നു പറഞ്ഞാണ്‌ ഈ ബിസിനസ്‌ ഫീച്ചര്‍ അവസാനിക്കുന്നത്‌.
കമ്പനിയുടെ വെബ്‌സൈറ്റും സരിതയുടെ മൊബൈല്‍ ഫോണ്‍ നമ്പരും കൊടുത്തിട്ടുണ്ട്‌.
ഈ ബിസിനസ്‌ ഫീച്ചറിനു താഴെ ടീം സോളാറിന്റെ മലയാളത്തിലുള്ള പരസ്യവും കൊടുത്തിട്ടുണ്ട്‌. സൗരോര്‍ജ ഉപകരണങ്ങള്‍ ഏറ്റവും കുറഞ്ഞ വിലയില്‍. കൂടിയ കാര്യക്ഷമത. കുറഞ്ഞ ഉത്‌പ്പന്ന വില. ഏറെ ലാഭകരം. ഒരു വര്‍ഷം 9,000 രൂപവരെ വൈദ്യുതി ചാര്‍ജ്‌ ലാഭം. ഇങ്ങനെ പോകുന്നു പരസ്യ വാചകങ്ങള്‍ ഇതിലും സരിതയുടെ നമ്പരാണ്‌ കൊടുത്തിരിക്കുന്നത്‌.
തൊട്ടു താഴെ കേരള എനര്‍ജി മാനേജ്‌മെന്റ്‌ ഡയറക്‌ടര്‍ കെഎം ധരേശന്‍ ഉണ്ണിത്താന്റെ നല്ലോരു ഭാവിക്കായി ഊര്‍ജം സംരക്ഷിക്കാം എന്ന ഒരു ലേഖനവുമുണ്ട്‌.
ഈ ലേഖനത്തിനു താഴെയാണ്‌ വിവാദമായ വിഎസ്‌ സര്‍ക്കാരിന്റെ അര പേജ് പരസ്യം കൊടുത്തിരിക്കുന്നത്‌.
.jpg)
ഈ പരസ്യമാണ്‌ ജനങ്ങളുടെ കണ്ണില്‍ പൊടിയായി മാറിയത്‌. കേരള സര്‍ക്കാരിന്റെ എംബ്ലത്തോടു കൂടിയ പരസ്യം പലരേയും തെറ്റിദ്ധരിപ്പിച്ചു. ഊര്‍ജ സംരക്ഷണത്തിന്റെ സംസ്ഥാന അവാര്‍ഡിന്റെ പരസ്യമാണ്‌ അത്. അന്നത്തെ മുഖ്യമന്ത്രിയായ വിഎസ്‌ അച്യുതാനന്ദന്റേയും വൈദ്യുതി മന്ത്രി എ.കെ. ബാലന്റേയും സന്ദേശവുമുണ്ട്‌. ഊര്‍ജസംരക്ഷണ രംഗത്ത് ചില വ്യക്തികളും സ്ഥാപനങ്ങളും വഹിക്കുന്ന പങ്കിനെ വിഎസും എകെ ബാലനും അഭിനന്ദിക്കുന്നുണ്ട്‌.
എല്ലാം കൂടിയായപ്പോള്‍ പലരും ടീം സോളാറിനെ സര്‍ക്കാരിന്റെ ഔദ്യോഗിക ഏജന്‍സിയാണോ എന്നു പോലും സംശയിച്ചു. അങ്ങനെയാണ്‌ പലരും സരിതയുടെ ഫോണിലേക്ക്‌ വിളിക്കുന്നതും തുടര്‍ന്ന്‌ പറ്റിക്കപ്പെട്ടതും.
https://www.facebook.com/Malayalivartha
