ഡല്‍ഹിയില്‍ ചര്‍ച്ച മുറുകി, ഉപരോധം അട്ടിമറിച്ചു
ഡല്‍ഹിയില്‍ നടന്ന കൂടിയാലോചനകളെ തുടര്‍ന്നാണ്‌ ഇടതു മുന്നണി സംഘടിപ്പിച്ച സെക്രട്ടറിയേറ്റ്‌ ഉപരോധം പൊടുന്നനെ പിന്‍വലിച്ചത്‌.
സോളാര്‍ വിഷയം ഉയര്‍ത്തിക്കാട്ടി പാര്‍ലമെന്റില്‍ ഇടതു എം.പി.മാര്‍ ബഹളം തുടങ്ങിയതോടെയാണ്‌ കോണ്‍ഗ്രസിന്റെ കേന്ദ്ര നേതൃത്വത്തിന്‌ സോളാര്‍ വിഷയത്തിലുള്ള ഗൗരവം മനസിലായത്‌. തുടര്‍ന്ന്‌ കോണ്‍ഗ്രസിന്റെ കേന്ദ്ര നേതൃത്വം സിപിഎമ്മിന്റെ കേന്ദ്ര നേതൃത്വമായി ബന്ധപ്പെട്ടു. സെക്രട്ടറിയേറ്റ്‌ ഉദ്‌ഘാടനം ചെയ്‌ത പ്രകാശ്‌ കാരാട്ട്‌ ഡല്‍ഹിയില്‍ മടങ്ങിയെത്തിയതോടെ ചര്‍ച്ചകള്‍ മുറുകി. ഉപരോധ സമരം അടിയന്തിരമായി പിന്‍വലിക്കാന്‍ നിര്‍ദ്ദേശം നല്‍കണമെന്ന്‌ കോണ്‍ഗ്രസ്‌ നേതൃത്വം സിപിഎം കേന്ദ്ര നേതൃത്വത്തോട്‌ ആവശ്യപ്പെട്ടു.
എന്നാല്‍ സമരം പൊടുന്നനെ പിന്‍വലിക്കാനാവില്ലെന്ന നിലപാടാണ്‌ പ്രകാശ്‌ കാരാട്ട്‌ സ്വീകരിച്ചത്‌. സമരം നിര്‍ത്തിയാല്‍ അണികളോട്‌ എന്തു പറയുമെന്ന ആശങ്കയാണ്‌ അദ്ദേഹത്തെ അലട്ടിയത്‌. എങ്കില്‍ ജുഡീഷ്യല്‍ അന്വേഷണം പ്രഖ്യാപിക്കാം എന്ന്‌ കോണ്‍ഗ്രസ്‌ നേതൃത്വം ഉറപ്പു നല്‍കി. മുഖ്യമന്ത്രിയുടെ രാജിയും ജുഡീഷ്യല്‍ അന്വേഷണവും രണ്ടുംകൂടി നടക്കുകയില്ലെന്നും കേന്ദ്ര നേതൃത്വം വ്യക്തമാക്കി.
സമരം പിന്‍വലിച്ചില്ലെങ്കില്‍ ലാവ്‌ലിന്‍ ഉള്‍പ്പെടെയുള്ള കേസുകളില്‍ നിലപാട്‌ കര്‍ശനമാക്കേണ്ടി വരുമെന്ന്‌ ഇതോടെ കോണ്‍ഗ്രസ്‌ നേതൃത്വം അറിയിച്ചു. പിണറായി വിജയന്‍ തെറ്റുകാരനാണെന്ന സിബിഐ വാദം വന്നിട്ട്‌ അധിക നാളുകളായിട്ടില്ല.
ലാവ്‌ലിന്‍ കേസ് മുറുകിയാല്‍ അത് പിണറായിയെ മാത്രമല്ല ബാധിക്കുക. അന്തരിച്ച സിപിഎം മുതിര്‍ന്ന നേതാവിന്റെ അടുത്ത ബന്ധുക്കള്‍ക്ക്‌ ഇടപാടുമായി ബന്ധമുണ്ട്‌. ആദരണീയനായ നേതാവിന്റെ ബന്ധുക്കളെ സമരത്തിന്റെ പേരില്‍ കൊലക്കു കൊടുക്കാന്‍ തയ്യാറല്ലെന്ന നിലപാടുമായി സിപിഎം കേന്ദ്ര നേതൃത്വം രംഗത്തു വന്നു. അതോടെ ഉപരോധ സമരം അവസാനിച്ചു.
ജുഡീഷല്‍ അന്വേഷണം ഒരു പുകമറ മാത്രമാണെന്ന്‌ ഭരണ പക്ഷത്തിനും പ്രതിപക്ഷത്തിനും അറിയാം.അന്വേഷണത്തിന്‌ സിറ്റിംഗ്‌ ജഡ്‌ജിയെ വിട്ടുകിട്ടില്ലെന്നും വിരമിച്ച ജഡ്‌ജി നടത്തുന്ന അന്വേഷണം അനേക മാസങ്ങള്‍ നീണ്ടു പോകുമെന്നും ഇരുകൂട്ടര്‍ക്കുമറിയാം. എന്നാലും ഇരുവര്‍ക്കും മുഖം രക്ഷിക്കണം.
https://www.facebook.com/Malayalivartha
