കള്ളപ്പണക്കാര്‍ക്ക് പണി വരുന്നു... ഇനി പണം കൊണ്ട് പറ്റിപ്പ് നടക്കില്ല
സഹകരണ ബാങ്കുകള്‍ വഴി വന്‍തോതില്‍ കള്ളപ്പണം നിക്ഷേപിക്കുന്നവരുടെ കളി പൊളിഞ്ഞു. 50,000 രൂപയ്ക്ക് മേലുള്ള സഹകരണബാങ്കുകളിലെ സ്ഥിര നിക്ഷേപങ്ങള്‍ക്കും പാന്‍ വേണമെന്ന വ്യവസ്ഥ കേന്ദ്ര സര്‍ക്കാര്‍ നിര്‍ബന്ധമാക്കി.
ഇക്കാലമത്രയും സമ്പത്ത് ഒളിപ്പിക്കാനുള്ള പ്രധാന മാര്‍ഗ്ഗം സഹകരണ ബാങ്കുകളായിരുന്നു. സഹകരണ ബാങ്കുകളിലെ നിക്ഷേപങ്ങള്‍ ആദായനികുതി വകുപ്പിന്റെ ശ്രദ്ധയില്‍ വരുമായിരുന്നില്ല. ഇനി പോസ്റ്റ് ഓഫീസുകളിലും ബാങ്കിംഗ് ഇതര ധനകാര്യ സ്ഥാപനങ്ങളിലുമുള്ള നിക്ഷേപങ്ങളും പാനിന്റെ പരിധിയില്‍ വരും. സഹകരണ ബാങ്കുകളിലെ വന്‍തോതിലുള്ള പണം നിക്ഷേപം കാരണം പൊതുമേഖലാ ബാങ്കുകളില്‍ സ്ഥിര നിക്ഷേപം കുറഞ്ഞിരുന്നു, പൊതു മേഖലാ ബാങ്കുകളില്‍ സ്ഥിരം നിക്ഷേപം നടത്തണമെങ്കില്‍ പാന്‍ നിര്‍ബന്ധമാണ്.
സഹകരണ ബാങ്കുകളിലെ സ്ഥിര നിക്ഷേപങ്ങളുടെ കണക്കുകള്‍ ആദായ നികുതി വകുപ്പിന് കൈമാറണമെന്ന വ്യവസ്ഥ നേരത്തെ കൊണ്ടു വന്നിരുന്നുവെങ്കിലും സഹകരണ ബാങ്കുകള്‍ അക്കാര്യം അനുസരിക്കാന്‍ തയ്യാറായിരുന്നില്ല. ഇതിനെതിരെ സഹകരണ ബാങ്ക് ജീവനക്കാര്‍ സമരവും സംഘടിപ്പിച്ചിരുന്നു. തുടര്‍ന്ന് കേന്ദ്ര സര്‍ക്കാര്‍ പ്രകോപനപരമായ നിലപാടുകളില്‍ നിന്നും പിന്‍മാറി.
എന്നാല്‍ ആരും അറിയാതെ കേന്ദ്രസര്‍ക്കാര്‍ സ്ഥിരം നിക്ഷേപങ്ങള്‍ക്ക് പാന്‍ നിര്‍ബന്ധമാക്കുകയായിരുന്നു. ഒരു വര്‍ഷം മൊത്തം അഞ്ചുലക്ഷം രൂപയില്‍ കൂടുതല്‍ വരുന്ന നിക്ഷേപങ്ങള്‍ക്കും കേന്ദ്ര സര്‍ക്കാര്‍ പാന്‍ നിര്‍ബന്ധമാക്കിയിരിക്കുകയാണ്. പാന്‍ നമ്പര്‍ കര്‍ശനമാക്കിയതോടെ ഒരു പാന്‍ നമ്പറില്‍ എവിടെ പണം നിക്ഷേപിച്ചാലും കേന്ദ്ര സര്‍ക്കാരിന് അത് കണ്ടെത്താന്‍ കഴിയും. ആര്‍ക്കും സ്ഥിര നിക്ഷേപത്തിന്റെ കാര്യം രഹസ്യമായി സൂക്ഷിക്കാന്‍ കഴിയുകയില്ല.
കേന്ദ്ര സര്‍ക്കാരിന്റെ പുതിയ നടപടി കേരളം ഉള്‍പ്പെടെയുള്ള സംസ്ഥാനങ്ങളിലെ സഹകരണ ബാങ്കുകളുടെ നട്ടെല്ല് തകര്‍ക്കും. സ്ഥിര നിക്ഷേപങ്ങള്‍ ഇല്ലാതായാല്‍ സഹകരണ ബാങ്കുകള്‍ പൂട്ടേണ്ടി വരും.
അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക
https://www.facebook.com/Malayalivartha
