പിണറായി, ഒരു ബിഗ് ഹാന്ഡ്; ഇതാണ് ആണത്തം!
മാധ്യമങ്ങളുടെ ഭരണപര്വം പിണറായി വിജയന് മുഖ്യമന്ത്രിയായതോടെ അവസാനിച്ചു. ക്യാമറയും മൈക്കുകളുമായി മുഖ്യമന്ത്രിയെ ചെറുത്ത് നിര്ത്തി ചോദ്യ ശരങ്ങള് ഉന്നയിച്ചിരുന്ന മഹാന്മാരൊക്കെ ഇപ്പോള് എവിടെയാണെന്നു പോലുമറിയില്ല. അന്പതു വര്ഷം കേരള നിയമസഭയില് അംഗമായിരുന്ന കെ എം മാണിയെ ഒടിച്ചു മടക്കിയത് മാധ്യമപ്രവര്ത്തനം എന്താണെന്ന് പോലുമറിയാത്ത ടെലിവിഷന് ചാനലുകളിലെ കള്ളക്കുട്ടികളാണെന്ന് മനസ്സിലാക്കുമ്പോള് പിണറായിയുടെ ധൈര്യം കണ്ട് നമ്മള് അന്തംവിട്ടുപോകും.
കഴിഞ്ഞ ദിവസം കണ്ണൂരില് ദളിത് സ്ത്രീകളെ ജയിലിലടച്ച സംഭവത്തില് പ്രതികരണം ചോദിക്കാനെത്തിയ ടെലിവിഷന് പ്രവര്ത്തകരോട് പിണറായി പറഞ്ഞത് ഇത്രമാത്രം. അത് പോലീസിനോട് ചോദിക്കുക ജാമ്യം കിട്ടാത്തതും ജയിലിലടയ്ക്കപ്പെടുന്നതും അറിയേണ്ടത് മുഖ്യമന്ത്രിയല്ല, പോലീസ് തന്നെയാണ്. കോടതിയില് ആവശ്യാനുസരണം ജാമ്യ വ്യവസ്ഥകള് നല്കിയില്ലെങ്കില് ജയിലില് അടയ്ക്കപ്പെടുമെന്ന് എല്ലാവര്ക്കുമറിയാം.
ഉമ്മന്ചാണ്ടി മുഖ്യമന്ത്രിയായിരുന്ന കാലത്ത് അദ്ദേഹത്തിന്റെ ശുചിമുറിയില് വരെ മാധ്യമങ്ങള് കയറിയിറങ്ങി അദ്ദേഹത്തിന്റെ ഓഫീസ് പ്രവര്ത്തിച്ചത് മാധ്യമപ്രവര്ത്തകര്ക്ക് വേണ്ടി മാത്രമാണ്. എന്നിട്ടെന്തുണ്ടായി. നിര്ണായക ഘട്ടത്തില് മാധ്യമങ്ങള് ചാണ്ടിയെ കൈവിട്ടു.
മന്ത്രിസഭായോഗത്തിനു ശേഷം നടത്തുന്ന വാര്ത്താ സമ്മേളനങ്ങള് വേണ്ടെന്നു വച്ച് ചരിത്രം തിരുത്തിയതും പിണറായി തന്നെ. വാര്ത്താ സമ്മേളനത്തിന് പകരം ഇപ്പോള് നല്കുന്നത് വാര്ത്താ കുറിപ്പ് മാത്രം. കാബിനറ്റ് ബ്രീയിംഗിന് തലസ്ഥാനത്തെ പത്രക്കാര്ക്ക് ഇരിക്കാന് പ്രത്യേക കസേരകള് പോലുമുണ്ടായിരുന്നു ഒരു കാലത്ത് സെക്രട്ടേറിയറ്റില്.
മാധ്യമങ്ങള്ക്ക് മുമ്പില് കുനിയുന്നതല്ല മുഖ്യമന്ത്രിയുടെ തലയെടുപ്പ്. മാധ്യമങ്ങള്ക്ക് മുമ്പില് കുനിഞ്ഞു നില്ക്കുന്ന മുഖ്യമന്ത്രിയുമല്ല പിണറായി. മാധ്യമങ്ങള് വിചാരിച്ചാല് കേരളത്തിലൊന്നും നടക്കില്ലെന്ന് അദ്ദേഹത്തിന് നന്നായറിയാം. ഇതിന്റെ പേരാണ് ആണത്തം. ഏറെ കാലമായി നമ്മുടെ നാട്ടില് പലര്ക്കും ഇല്ലാതിരുന്നത്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha