മലയാളി വാര്‍ത്ത.
തിരുവനന്തപുരം: ആര്‍ഭാട വിവാഹങ്ങള്‍ നിയന്ത്രിക്കാന്‍ നിയമനിര്‍മാണത്തിനൊപ്പം ശക്തമായ ബോധവത്കരണവും ആവശ്യമാണെന്ന് മന്ത്രി കെ.എം.മാണി. നിയമംകൊണ്ട് മാത്രം വിവാഹങ്ങളിലെ ധൂര്‍ത്ത് നിരോധിക്കുക പൂര്‍ണമായും പ്രായോഗികമല്ല. ജനങ്ങള്‍ക്ക് ഇക്കാര്യത്തില്‍ ഒരു നിലപാട് ഉണ്ടാകണം. അതിലൂടെ മാത്രമേ ഈ സാമൂഹ്യതിന്മയെ ഒഴിവാക്കാനാകൂ. അതിലേക്ക് വേണ്ടിയുള്ള പ്രവര്‍ത്തനങ്ങള്‍ക്ക് ബലം നല്‍കാന്‍ സര്‍ക്കാറിന്‍െറയും രാഷ്ട്രീയ കക്ഷികളുടെയും പിന്തുണ ഉണ്ടാകുമെന്നും അദ്ദേഹം പറഞ്ഞു. വിവാഹ ആഘോഷങ്ങളിലെ ധൂര്‍ത്തിനെതിരെ നിയമ നിര്‍മ്മാണത്തിനായുള്ള ആശയരൂപീകരണത്തിന് സംസ്ഥാന വനിതാ കമ്മീഷന്‍ സംഘടിപ്പിച്ച ‘ആര്‍ഭാടരഹിത വിവാഹം’ സെമിനാര്‍ ഉദ്ഘാടനം ചെയ്യുകയായിരുന്നു അദ്ദേഹം.
ആര്‍ഭാട വിവാഹം സാമൂഹ്യ തിന്മയാണെന്നും ദുഷ്മാതൃകയാണെന്നും ജനങ്ങളെ ബോധവത്കരിക്കണം. വിവാഹ കമ്പോളത്തില്‍ രൂപക്ക് വേണ്ടി വിലപേശുന്നത് സ്ത്രീത്വത്തെ അപമാനിക്കലാണ്. ആ രീതിയില്‍ കല്യാണങ്ങള്‍ അധപതിക്കാന്‍ പാടില്ല. വിവാഹം കഴിക്കാന്‍ പോകുന്ന ചെറുപ്പക്കാര്‍ക്ക് ഇക്കാര്യത്തില്‍ വ്യക്തമായ നിലപാട് ഉണ്ടാകണം. പണംകൊണ്ടല്ല സ്ത്രീയെ വരവേല്‍ക്കേണ്ടത്. സ്ത്രീയെയാണ് ധനമായി സ്വീകരിക്കേണ്ടതെന്ന ബോധ്യം ഉണ്ടാകണം- അദ്ദേഹം ചൂണ്ടിക്കാട്ടി.
സ്ത്രീധന നിരോധ നിയമങ്ങള്‍ ഉണ്ടെങ്കിലും ഇവ ദുരുപയോഗം ചെയ്യപ്പെടുകയാണ്. പഞ്ചാബിലും പാക്കിസ്ഥാനിലും ആര്‍ഭാട വിവാഹങ്ങള്‍ നിയമംമൂലം നിരോധിച്ചിട്ടുണ്ട്. സംസ്ഥാനത്ത് കഴിഞ്ഞ ബജറ്റില്‍ വിവാഹ മണ്ഡപങ്ങള്‍ക്കുള്ള നിരക്കനുസരിച്ച് വിവാഹചെലവ് തിട്ടപ്പെടുത്തി നികുതി ഏര്‍പ്പെടുത്തിയിരുന്നു. എന്നാല്‍ നികുതിയടച്ചും ആര്‍ഭാടമായിതന്നെ വിവാഹം നടത്തുമെന്നതാണ് നാട്ടിലെ സമ്പന്നരുടെ സ്ഥിതി.
വനിതാ കമ്മീഷന്‍െറ 2010-11 ലെ പഠന റിപ്പോര്‍ട്ട് വ്യക്തമാക്കുന്നത് സംസ്ഥാനത്തെ 75 ശതമാനം കുടുംബങ്ങള്‍ ആര്‍ഭാട വിവാഹം നടത്തി കടക്കെണിയി എന്നാണ്. ഒമ്പത് ശതമാനം ആളുകള്‍ താമസസ്ഥലം വിറ്റാണ് വിവാഹം നടത്തുന്നത്. സ്ത്രീധനംപോലെ തന്നെ ആര്‍ഭാടവും കച്ചവടവത്ക്കരിപ്പെട്ടുകഴിഞ്ഞു. വനിതാ കമ്മീഷന്‍ സംഘടിപ്പിച്ചിരിക്കുന്ന സെമിനാറില്‍ ഉരിത്തിരിയുന്ന നിര്‍ദ്ദേശങ്ങള്‍ ക്രോഡീകരിച്ച് ഇതിനെതിരെ നിയമം നിര്‍മ്മിക്കുന്ന കാര്യം പരിശോധിക്കുമെന്നും അദ്ദേഹം പറഞ്ഞു.
സംസ്ഥാനത്തെ വിവിധ യുവജന, മഹിളാ സംഘടനാ നേതാക്കളും സാമൂഹപ്രവര്‍ത്തകരും സന്നദ്ധ പ്രവര്‍ത്തകരും സെമിനാറില്‍ നിര്‍ദ്ദേശങ്ങള്‍ പങ്കുവച്ചു. വിവാഹ ധൂര്‍ത്ത് അവതരിപ്പിക്കന്ന തരത്തിലുള്ള മാധ്യമങ്ങളിലെ പരസ്യങ്ങള്‍ ഒഴിവാക്കുക, വിവാഹത്തിന് ധരിക്കുന്ന സ്വര്‍ണത്തിന്‍്റെ തൂക്കം പരിമിതപ്പെടുത്തുക, ജാഗ്രാതാ സമിതികളുടെ പ്രവര്‍ത്തനം ശക്തിപ്പെടുത്തി ബോധവത്കരണം സാധ്യമാക്കുക, വിവാഹത്തിനുമുമ്പ് വധൂവരന്മാര്‍ക്കും മാതാപിതാക്കള്‍ക്കും കൗണ്‍സലിംങ് നല്‍കുക തുടങ്ങിയ നിര്‍ദ്ദേശങ്ങളാണ് ചര്‍ച്ചയില്‍ പങ്കെടുത്തവര്‍ മുന്നോട്ട് വച്ചത്. വനിതാ കമ്മീഷന്‍ ചെയര്‍പേഴ്സണ്‍ കെ.സി റോസക്കുട്ടി അധ്യക്ഷയായി. ചടങ്ങില്‍ കമ്മീഷന്‍ ഡയറക്ടര്‍ ജേക്കബ്ബ് ജോബ്, അംഗങ്ങളായ ഡോ. ലിസി ജോസ്, കെ.എ. തുളസി, ജെ.പ്രമീളാ ദേവി തുടങ്ങിയവരും സംബന്ധിച്ചു.
