തോൾ വേദന ഇന്ന് സാധാരണമാണ്. തൊഴിൽരീതികളിലും ജീവിതശൈലിയിലും വന്ന മാറ്റങ്ങളും വ്യായാമക്കുറവുമാണ് വില്ലൻ... മണിക്കൂറുകള്‍ കമ്പ്യൂട്ടറിനുമുന്നില്‍ ചെലവഴിക്കുന്നതും വ്യായാമം ഇല്ലാത്തതും ഇത്തരം പ്രശ്‌നങ്ങള്‍ ഉണ്ടാക്കാം.അതേസമയം ഷട്ടില്‍, ക്രിക്കറ്റ്, ടെന്നീസ് തുടങ്ങിയവ സ്ഥിരമായി കളിക്കുന്നവരിലും ഇത് കാണാറുണ്ട്.

ഒക്യുപേഷണൽ ഓവർയൂസ് സിൻഡ്രം എന്നറിയപ്പെടുന്ന ഈ മസ്കുലോസ്ക്കെൽറ്റൽ പ്രശ്നങ്ങൾ ഇന്ന് വളരെയധികം കൂടിയെങ്കിലും പലരും ഇതിനെക്കുറിച്ച് അജ്ഞരാണ്. ശരിയായ വ്യായാമവും ചെറിയ ശ്രദ്ധയും കൊടുത്താൽ സ്ഥിരമായ വലിയ വേദനകൾക്കു പരിഹാരമാകും..പലപ്പോഴും കൃത്യമായി വേദന എവിടെ ആണെന്ന് പറയാൻ പോലും ബുദ്ധിമുട്ടാകും .

30 വയസ്സിനു താഴെ ഉള്ളവരിൽ കുഴ തെന്നിപോകുന്നതുമൂലവും 40 വയസ്സിനു ശേഷം പൊതുവെ നീർക്കെട്ട്, എല്ലു തേയൽ എന്നിവ മൂലം ഉള്ള വേദനയും സ്വാഭാവികമാണ്. പ്രമേഹ രോഗികളിലും തോൾവേദന സാധാരണമായി കാണാറുണ്ട്

ഒരു ജോലി സ്ഥിരമായി ചെയ്യുമ്പോൾ ആ ചലനം സാധ്യമാക്കുന്ന പേശികളിലും സ്നായുക്കളിലും പ്രവർത്തനക്കുറവും വലിച്ചിലും (Microtrauma) ഉണ്ടായി ക്രമേണ വേദനയിലേക്ക് നയിക്കുന്നു. ഇതിനെ പൊതുവെ ഒക്യുപ്പേഷൻ ഓവർയൂസ് സിൻഡ്രം എന്നാണു പറയുന്നത്.

ജോലി ചെയ്യുമ്പോൾ കഴപ്പ്, വേദന, മരവിപ്പ് എന്നിവയാണ് തുടക്കം. എന്തിലെങ്കിലും പിടിക്കുമ്പോഴോ കൈ ഉയർത്തുമ്പോഴോ ബലം ലഭിക്കാത്തതുപോലെ തോന്നുന്നു. ക്രമേണ ദൈനംദിന ജോലിയെയും ബാധിക്കുന്നു.ഫിസിയോ തെറാപ്പിയും മരുന്നും സംയോജിപ്പിച്ച് നടത്തുന്ന ചികിത്സ മിക്കപ്പോഴും ഗുണം കാണാറുണ്ട് . ചുരുക്കം ചിലരിൽ സർജറി ആവശ്യമായി വരുന്നതും കാണുന്നുണ്ട്

ചികിത്സയ്ക്കു ശേഷവും ജോലി ചെയ്യുമ്പോൾ ശരീരം ഉപയോഗിക്കേണ്ട രീതി, തോൾ ഭാഗത്തിന് ആവശ്യമായ വ്യായാമം, ശരിയായ ഫർണിച്ചര്‍ തിരഞ്ഞെടുക്കുന്ന രീതി, എന്നിവ ഫിസിയോ തെറാപ്പിസ്റ്റിൽനിന്ന് മനസ്സിലാക്കി സ്ഥിരമായി പരിശീലിക്കേണ്ടതും ആവശ്യമാണ്

1. അലമാരയിൽ തോൾ ലവലിനു താഴെയും തുടയുടെ മധ്യ ഭാഗത്തിനു മുകളിലുമായി സാധനങ്ങൾ ക്രമീകരിക്കുക. തോൾ ലവലിനു മുകളിൽ നിന്ന് എത്തിച്ചോ അല്ലാതെയോ സാധനങ്ങൾ എടുക്കുന്നത് കുറയ്ക്കുക.

2. നിങ്ങളുടെ കൈയുടെ നീളത്തെക്കാൾ (കൈമുട്ട് നിവർത്തി) എത്തിച്ച് അലമാരയിൽ സാധനങ്ങൾ വയ്ക്കുന്നതും പാത്രത്തിൽ ഇളക്കുന്നതും ഒഴിവാക്കുക.

3. പാചകം ചെയ്യുമ്പോൾ നിങ്ങളുടെ മുന്നിൽ എല്ലാം ക്രമീകരിക്കുക. ഇടയ്ക്കിടെ വശത്തുനിന്നും പുറകിൽനിന്നും സാധനങ്ങൾ എത്തിച്ച് എടുക്കരുത്.

4 കാർ സീറ്റ് വളരെ പിന്നിലേക്കു നീക്കി കൈമുട്ട് പൂർണമായി നിവർത്തി ഡ്രൈവ് ചെയ്യാതിരിക്കുക.

5 ഡ്രൈവ് ചെയ്യുമ്പോൾ കൈ വിൻഡോയിൽ വയ്ക്കുന്നത് വേദന ഉണ്ടാക്കാം.

6 മുന്നിലെ സീറ്റിൽ ഇരുന്ന് പുറകിലെ സീറ്റിൽ സാധനങ്ങൾ വയ്ക്കുന്നതും എടുക്കുന്നതും ചിലപ്പോൾ വേദനയ്ക്ക് കാരണമായേക്കാം.

7 ഓഫിസ് മേശയിൽ എപ്പോഴും ഉപയോഗിക്കുന്ന സാധനങ്ങൾ നിങ്ങളുടെ കൈമുട്ട് കുറച്ച് മടങ്ങി ഇരുന്നാലും എടുക്കാൻ കഴിയുന്ന രീതിയിൽ ക്രമീകരിക്കുക.

8 കംപ്യൂട്ടർ മൗസ് ഉപയോഗിക്കുമ്പോൾ കൈമുട്ട് 900– 1200 ഡിഗ്രി മടങ്ങി ഇരിക്കുന്നത് തോളിന് ഗുണം ചെയ്യും.

9 ഭാരമുള്ള ഫയൽക്കെട്ടുകൾ ചെറിയ കെട്ടുകളാക്കി തുടയുടെ പകുതിക്കും തോളിനും ഇടയിൽ അലമാരയിൽ ക്രമീകരിക്കുക .. ഫയൽ വശത്തേക്കും പുറകിലേക്കും കൈയുടെ നീളത്തെക്കാൾ എത്തിച്ച് കൊടുക്കുന്നത് കുറയ്ക്കുക.

10 ജോലിക്കിടയിൽ തോളിനും കൈയ്ക്കും ഇടയ്ക്കിടെ വിശ്രമം കൊടുക്കുക.

11 . തോൾ ലവലിനെക്കാള്‍ ഉയരമുള്ള അലമാരയിൽനിന്ന് ഫയലുകൾ എടുക്കുന്നത് കുറയ്ക്കുക. ഭാരമുള്ളവ തീർത്തും ഒഴിവാക്കുക.
തുടങ്ങിയ കാര്യങ്ങൾ തൊഴിൽ തോൾ വേദന ഒഴിവാക്കാൻ നല്ലതാണ്