എല്ലാ തലവേദനയും 'തലവേദനയല്ല' ; പ്രത്യേകിച്ച് ചികിത്സയും വേണ്ട..എന്നാൽ ചില തലവേദന അങ്ങിനെ അല്ല ,ശ്രദ്ധിച്ചില്ലെങ്കിൽ മരണം വരെ സംഭവിക്കാം
തലവേദന എല്ലാവര്ക്കും വരുന്ന ഒരു സാധാരണ അസുഖമാണ്. ഒന്നുറങ്ങിയാല് മാറും ഇതാണ് തലവേദന വന്നാല് പൊതുവേ പറയുന്നത്. എല്ലാ തലവേദനകള്ക്കും ചികിത്സ വേണ്ട. എന്നാല് ചില തലവേദന അങ്ങിനെ അല്ല. ഇനി പറയുന്ന കാരണങ്ങളുമായി അനുബന്ധിച്ചുണ്ടാകുന്ന തലവേദന ശ്രദ്ധിച്ചില്ലെങ്കിൽ മരണകാരണം വരെ ആയേക്കാം
1) അപകടങ്ങൾ, വീഴ്ചകൾ എന്നിവയോടനുബന്ധിച്ചുള്ള തലവേദന
2) പെട്ടെന്ന് തുടങ്ങിയ അസഹ്യമായ തലവേദന
3) ഗർഭകാലത്തോ പ്രവസവത്തോടോ അനുബന്ധിച്ചുള്ള തലവേദന
4) പനി, കഴുത്തുവേദന, വെളിച്ചം കാണുന്നതിനു ബുദ്ധിമുട്ട് എന്നിവയോടുകൂടിയ തലവേദന
5) തലവേദനയോടൊപ്പം കാഴ്ചക്കുറവ് അല്ലെങ്കിൽ രണ്ടായിക്കാണുക
6) തലവേദനയോടൊപ്പം ബോധത്തിൽ വ്യത്യാസം വരുന്നുണ്ടെങ്കിൽ
7) തലവേദനയോടൊപ്പം വീണ്ടും വീണ്ടും ഛർദി യുണ്ടാകുക
8)തലവേദനയോടൊപ്പം ശരീരത്തിന് ബലക്കുറവ് ഉണ്ടെങ്കിൽ
9) രാത്രിയിൽ ഉറക്കത്തിൽ നിന്ന് എഴുന്നേൽപ്പിക്കുന്ന തലവേദന
10) വീഴ്ച ഉണ്ടായതിനു ശേഷമുണ്ടാകുന്ന തലവേദന
ഇവയെല്ലാം തന്നെ അടിയന്തിര ചികിത്സ ആവശ്യമുള്ള വിഷയങ്ങളാണ് ...അതുപോലെ തലച്ചോറിലെ പ്രശ്നങ്ങള്ക്കൊപ്പം കാഴ്ചത്തകരാറുകള്, സൈനസൈറ്റിസ്, മോണവീക്കം, ചെവിയുടെ പ്രശ്നങ്ങള് എന്നിവയും തലവേദനയുണ്ടാക്കാം. തലച്ചോറിനകത്തോ അതിന്റെ ആവരണത്തിലോ ഉണ്ടാകുന്ന രക്തസ്രാവം, തലച്ചോറിനുള്ളിലെ മുഴകള്, തലച്ചോറിനുള്ളിലെ അണുബാധ, തലയോട്ടിക്കുള്ളിലെ സമ്മര്ദം കൂടുന്ന അവസ്ഥ എന്നിവയും തലവേദനയുടെ കരണമാകാവുന്ന അപകടകരമായ അവസ്ഥകളാണ്
എന്നാല്, സാധാരണ കണ്ടുവരുന്ന തലവേദനയുടെ കാരണം ചെന്നിക്കുത്ത്, അമിത ടെന്ഷന് എന്നിവയാണ്......തലയുടെ ഏതെങ്കിലും ഒരുവശത്തുനിന്ന് തുടങ്ങുന്ന തുടിക്കുന്ന പോലുള്ള വേദന ക്രമേണ വര്ധിച്ച് തലമൊത്തം അസഹ്യമായി വ്യാപിക്കും. വെളിച്ചമോ ശബ്ദമോ ഈയവസരത്തില് തലവേദന കൂട്ടും. തലകറക്കം, തലപ്പെരുപ്പ്, ഛര്ദി തുടങ്ങിയവും അനുഭവപ്പെടും. ആരംഭത്തില് ഒന്നുമുതല് നാലുമണിക്കൂര് വരെ നീണ്ടുനില്ക്കുന്ന വേദന ആയിരിക്കും. ഉറങ്ങി എഴുന്നേല്ക്കുമ്പോള് മാറുകയും ചെയ്യും. കാലക്രമേണ ചിലപ്പോള് ദിവസങ്ങളോളം നീണ്ടുനില്ക്കുന്ന തലവേദനയായി ഇത് മാറുന്നതും കാണാറുണ്ട് .
സ്ത്രീകളിലാണ് ഇത്തരം തലവേദന കൂടുതലായി കാണുന്നത്..ആര്ത്തവദിനങ്ങളോട് അനുബന്ധിച്ചുള്ള ചെന്നിക്കുത്ത് ഉള്ളവര് ആ ദിവസങ്ങളില് ഡേക്ടറുടെ നിര്ദേശാനുസരണം മരുന്നുകള് കഴിക്കണം......
വല്ലപ്പോഴും മാത്രംവരുന്ന തീവ്രമല്ലാത്ത തലവേദനകള്ക്ക് താത്കാലികമായ വേദനസംഹാരി കഴിച്ചാല് മതി. എന്നാല്, തീവ്രമായ, ദിനചര്യകളെ ബാധിക്കുന്ന തരത്തിലുള്ള തലവേദന ഉണ്ടെങ്കിൽ വിദഗ്ധ ചികിത്സ ആവശ്യമാണ്.......
ഭൂരിപക്ഷം തലവേദനകളും നിസ്സാരമായ കാരണങ്ങള് കൊണ്ട് ഉണ്ടാകുന്നവയാണ്. സമ്മര്ദം കുറച്ചുള്ള ജീവിതശൈലിയിലൂടെ വലിയൊരളവ് തലവേദനകളും മാറ്റാന് കഴിയും......ആവശ്യത്തിനു വെള്ളം കുടിക്കുക.. വിശന്നിരിക്കുന്നത് ഒഴിവാക്കുക.... അമിതമായ സ്ട്രൈസ് ഒഴിവാക്കുക ,രാത്രിസമയങ്ങളില് മൊബൈല്, ലാപ്ടോപ്പ് എന്നിവ ആവശ്യമായ വെളിച്ചം ഇല്ലാതെ ഉപയോഗിക്കുന്നത് ഒഴിവാക്കുക, കഫീന് കൂടുതലുള്ള പാനീയങ്ങള് കഴിയുന്നത്ര കുറയ്ക്കുക, എന്നിവയെല്ലാം തലവേദന എന്ന 'തലവേദന' ഒഴിവാക്കാൻ സഹായിക്കും
https://www.facebook.com/Malayalivartha