വായ്‍പുണ്ണ് അഥവാ വായയിൽ അൾസർ വരുന്നതു കൊണ്ട് ബുദ്ധിമുട്ടുന്നവരാണ് പലരും. കാര്യമായ ചികിത്സയില്ലാതെ തന്നെ പലപ്പോഴും ഇത് മാറുകയും ചെയ്യും. അല്ലാത്ത സമയത്ത് ചില വീട്ടു ചികിത്സകളും ഫലപ്രദമാകാറുണ്ട്.

വർഷത്തിൽ ഒന്നോ രണ്ടോ തവണ വരുന്നത് അത്ര ഗൗരവമായി കാണേണ്ടതില്ല. അതേസമയം ചിലതരം വായ്പുണ്ണുകള്‍ അപകടകാരികളാണ്. മാസത്തിൽ രണ്ടോ മൂന്നോ തവണ വരിക, അതല്ലെങ്കിൽ രണ്ട് ആഴ്ചയിൽ കൂടുതൽ നീളുകയോ ചെയ്യുമ്പോൾ അതിന്‍റെ കാരണങ്ങൾ തേടേണ്ടതാണ്. അവ അര്‍ബുദത്തിന്റെ മുന്നറിയിപ്പോ ലക്ഷണമോ ആവാറുണ്ട്

ബ്രഷ്, പല്ലിന്‍റെ അറ്റം തുടങ്ങിയവ ഉരസുന്നത് കൊണ്ട് വായയില്‍ മുറിവുകൾ ഉണ്ടാവുകയും അതിൽ വരുന്ന ബാക്ടീരിയൽ ഇൻഫെക്ഷൻ കാരണം അത് അൾസർ ആയി മാറാനും സാധ്യതയുണ്ട്. ചിലരിൽ വിറ്റാമിൻ കുറവ് കാരണം അൾസർ വരാം. വിറ്റാമിൻ B12, അയൺ, ഫോളിക് ആസിഡ് എന്നിവയുടെ ഡെഫിസിയൻസി മൂലമാണ് അള്‍സര്‍ കണ്ടു വരാറ്.

ചിലയിനം ടൂത്ത് പേസ്റ്റ്, മൗത്ത് വാഷ് (സോഡിയം ലോറൽ സൽഫേറ്റ് അടങ്ങിയവ) ഉപയോഗിക്കുന്നത് കൊണ്ടും അൾസർ കണ്ടുവരാം.

പുരുഷന്മാരിൽ പുകയിലയുടെ ഉപയോഗം കൊണ്ട് വായയിൽ അൾസർ കാണുന്നു. സ്ത്രീകളിൽ മാസമുറയുടെ തൊട്ട് മുന്നേയുള്ള ഹോർമോൺ ചെയ്ഞ്ച്‌ കൊണ്ടും ഓവുലേഷൻ സമയത്തുള്ള ഹോർമോൺ ചെയ്ഞ്ച്‌ കൊണ്ടും വായയിൽ അൾസർ കണ്ടുവരാറുണ്ട്.

ചില ഭക്ഷണങ്ങളുടെ അലർജി കാരണവും വായയിൽ അൾസർ കാണുന്നു. മസാലകൾ അടങ്ങിയ ഹോട്ടൽ ഫുഡ്, കോഫി, പാൽ ഉത്പന്നങ്ങൾ, ഓറഞ്ച് പോലുള്ള ഫ്രൂട്ട് എന്നിവ ഇത്തരം അലർജി ഉണ്ടാക്കുന്നു.

മറ്റുരോഗങ്ങളുടെ കൂടെയും ഇത്തരം അൾസർ കാണുന്നു. ഉദാഹരണമായി മൈഗ്രെയിൻ, ടെൻഷൻ, സ്‌ട്രെസ്, വയറിൽ അൾസർ, ചില ത്വക് രോഗങ്ങൾ, ഐബിഎസ്, ഗ്യാസ്‍ട്രൈറ്റിസ് ഇവ കാരണമായും വായയിൽ അൾസർ ഉണ്ടാവുന്നു.

രണ്ടു തരത്തിലുള്ള വായില്‍ പുണ്ണാണ് പ്രധാനമായും കണ്ടുവരാറ്. വേദനയോട് കൂടിയതും, വേദനയില്ലാത്തതും. ഇതില്‍ വേദനയില്ലാത്ത വായില്‍ പുണ്ണാണ് അപകടകാരി. അത് ആമാശയത്തിലെ, കുടലിലെ കാന്‍സറിനു കാരണമോ അര്‍ബുദത്തിന്റെ ലക്ഷണമോ ആകാം.

തുടര്‍ച്ചയായി ഒരേസ്ഥലത്തുണ്ടാകുന്ന വായ്പുണ്ണ് മാസങ്ങളോളം ഉണങ്ങാതെ നില്‍ക്കുകയും നിരന്തരം വലുതാകുകയും രക്തസ്രാവമുണ്ടാകുകയും ചെയ്യുന്നുണ്ടെങ്കില്‍ അവയെ നിസാരമായി തള്ളിക്കളയരുത്. അവ അര്‍ബുദത്തിന്റെ പ്രാരംഭ ലക്ഷണമാകാം. അതുകൊണ്ട് വേഗത്തില്‍ വിദഗ്ധ വൈദ്യ പരിശോധനക്ക് വിധേയരാവുകയാണ് വേണ്ടത്

ഇടക്കിടെ കാണുന്ന വായ്‍പുണ്ണിന് പ്രധാനമായും വയറിലെ പ്രശ്നങ്ങളാണ് കാരണം. ദഹനത്തിലെ താളപ്പിഴകള്‍ മൂലമാണ് വായില്‍ പുണ്ണ് പ്രധാനമായും വരുന്നത് .. വയറിലും കുടലിലും നല്ല ബാക്ടീരിയയുടെ കുറവ് മൂലം വിറ്റാമിൻ വലിച്ചെടുക്കുന്നത് കുറയുന്നതും വായ്പ്പുണ്ണിന് കാരണമായേക്കാം. അല്ലെങ്കിൽ അവിടെ ഉള്ള പൂപ്പൽ ബാധ കാരണവും ആവാം. ഉയർന്ന ഉർജം അടങ്ങിയ ഭക്ഷണ പാനീയങ്ങൾ, പാക്കറ്റ് ഫുഡ് ഉപയോഗം, ആരോഗ്യകരമല്ലാത്ത ഭക്ഷണ ശീലം എന്നിവ കൊണ്ടും ഇത്തരം പൂപ്പൽബാധ ഉണ്ടാവാം. പ്രധാനമായും നാരുകള്‍ അടങ്ങിയ പച്ചക്കറികളും ഇലക്കറികളും ഭക്ഷണത്തില്‍ ഉള്‍പെടുത്തുകയും ഉപ്പ്, പുളി, എരിവ്, മാംസാഹാരം എന്നിവ കഴിയുന്നതും ഒഴിവാക്കുകയും ചെയ്താല്‍ പലരുടേയും വായ്പുണ്ണിന് ശമനമുണ്ടാകാറു ണ്ട്... വായ്പുണ്ണ് വരുന്നവര്‍ വെള്ളം ധാരാളം കുടിക്കാനും ശ്രദ്ധിക്കണം

പുകയില, നിക്കോറ്റിന്‍ ഉപയോഗിക്കുന്നവരിൽ കാൻസർ വരാനുള്ള സാധ്യത കൂടുതലാണ്. രണ്ടു ആഴ്ചയിൽ കൂടുതൽ വായയിൽ അൾസർ നിൽക്കുമ്പോഴും ഗൗരവമാക്കേണ്ടതാണ്. കൂടാതെ പല്ലുകൾ തട്ടി തുടർച്ചയായി അൾസർ വന്നാലും അത് കാൻസർ ആയി മാറാവുന്നതാണ്.

ചെറിയ ചൂട് വെള്ളത്തിൽ ഉപ്പിട്ട് വായ് കഴുകിയാല്‍ അൾസർ പെട്ടെന്ന് ഭേദമാവുന്നതാണ്. തേൻ പുരട്ടുന്നതുകൊണ്ടും ശമനം ലഭിക്കുന്നതാണ്. മഞ്ഞൾ, വേപ്പില ഇട്ട് കാച്ചിയ മോര് ധാരാളമായി ഭക്ഷണത്തിൽ ഉൾപെടുത്തുന്നതും അൽസറിനെ തടഞ്ഞു നിർത്തും.

വായ്പുണ്ണ് വരാതിരിക്കാന്‍ ചില മുന്‍കരുതലുകള്‍ നല്ലതാണ്. വായ്ക്കകം എപ്പോഴും വൃത്തിയായിരിക്കാന്‍ ശ്രദ്ധിക്കുക. ഭക്ഷണാവശിഷ്ടങ്ങള്‍ പല്ലുകള്‍ക്കിടയിലും വായ്ക്കകത്തും തങ്ങിനിന്ന് അണുബാധക്ക് കാരണമാകരുത്. ഭക്ഷണം കഴിച്ചശേഷം, പ്രത്യേകിച്ച് മധുപലഹാരങ്ങള്‍ കഴിച്ചശേഷം നല്ലപോലെ വായ് നല്ലപോലെ കഴുകണം.

പുകവലി, മദ്യപാനം, പാന്‍മസാലപോലുള്ളവയുടെ ഉപയോഗം ഒഴിവാക്കുക. ഭക്ഷണത്തില്‍ പഴങ്ങളും പച്ചക്കറികളും ഇലക്കറികളും സലാഡും ഉള്‍പ്പെടുത്തി സമീകൃതാഹാരം കഴിക്കുന്നതു വഴി ഒരു പരിധിവരെ വായ്പുണ്ണ് ഉണ്ടാകുന്നതിനെ തടയാനാകും. പോഷകാഹാരക്കുറവ് യഥാസമയം കണ്ടുപിടിച്ച് പരിഹരിക്കണം. ആവര്‍ത്തിച്ചു വരികയും ആഴ്ച്ചകള്‍ കഴിഞ്ഞിട്ടും ശമനം ലഭിക്കാതിരിക്കുകയും ചെയ്താല്‍ തീര്‍ച്ചയായും വിദഗ്ധ ചികിത്സ തേടണം.