പകർച്ച വ്യാധികൾക്കെതിരെ ഒരു ദിനം.... ഡിസംബർ 27 അന്താരാഷ്ട്ര പകർച്ചവ്യാധി തടയൽ തയ്യാറെടുപ്പ് ദിനമായി പ്രഖ്യാപിക്കുന്ന പ്രമേയത്തിന് ഐക്യരാഷ്ട്ര പൊതുസഭ അംഗീകാരം നൽകി. കോവിഡ് -19 പോലുള്ള പകർച്ചവ്യാധികൾ തടയുന്നതിനുള്ള നടപടികൾ ശക്തിപ്പെടുത്തേണ്ടതിന്റെ ആവശ്യകതയെക്കുറിച്ച് ആഗോളതലത്തിൽ ശ്രദ്ധ കേന്ദ്രീകരിക്കുന്നതിനായിട്ടാണ് നടപടി പ്രഖ്യാപിച്ചത്.

കഴിഞ്ഞ 75 വർഷത്തിനിടെ ആദ്യമായാണ് ലോകരാജ്യങ്ങൾ അന്താരാഷ്ട്ര പകർച്ച വ്യാധി ദിനം ആചരിക്കുന്നത്. കൊറോണ വൈറസ് വ്യാപനത്തിന്റെ പശ്ചാത്തലത്തിൽ ഐക്യരാഷ്ട്ര സഭയുടേതാണ് എല്ലാ വർഷവും ഡിസംബർ 27 അന്താരാഷ്ട്ര പകർച്ച വ്യാധി തയ്യാറെടുപ്പ് ദിനമായി ആചരിക്കാനുള്ള ആഹ്വാനം.

193 അംഗ സമിതി തിങ്കളാഴ്ച അംഗീകരിച്ച പ്രമേയത്തിൽ പ്രധാന പകർച്ചവ്യാധികളുടെ വിനാശകരമായ പ്രത്യാഘാതങ്ങളെക്കുറിച്ച് കടുത്ത ആശങ്ക പ്രകടിപ്പിച്ചു . കൊറോണ വൈറസ് രോഗം പോലെയുള്ള പകർച്ച വ്യാധികൾ മനുഷ്യ ജീവിതത്തിൽ ചെലുത്തുന്ന സ്വാധീനങ്ങൾ വളരെ വലുതാണെന്ന് ഐക്യരാഷ്ട്ര സഭ ചർച്ച ചെയ്തു

ജനങ്ങളുടെ ഉപജീവനത്തിനും ഏറ്റവും ദരിദ്രവും ദുർബലവുമായ രാജ്യങ്ങളുടെ സമ്പദ്‌വ്യവസ്ഥക്കും ഇത്തരം പ്രതിസന്ധികൾ വിനാശമുണ്ടാക്കുമെന്ന് പ്രമേയത്തിൽ പറയുന്നു

വിദ്യാഭ്യാസത്തിലൂടെയും ബോധവത്കരണ പ്രവർത്തനങ്ങളിലൂടെയും ആളുകളിൽ പകർച്ച വ്യാധികളെക്കുറിച്ചുള്ള അവബോധം വളർത്തിയെടുക്കുക എന്ന ലക്ഷ്യത്തോടെയാണ് ആഗോളതലത്തിൽ പകർച്ച വ്യാധി തയ്യാറെടുപ്പ് ദിനമായി ആചരിക്കാനുള്ള ഐക്യരാഷ്ട്ര സഭയുടെ തീരുമാനം. ലോകരാജ്യങ്ങളെ സാമ്പത്തികമായും സാമൂഹികമായും വലിയ തകർച്ചയിലേക്ക് നയിച്ച പകർച്ച വ്യാധിയാണ് കൊറോണ. അതിനാൽ ഭാവിയിൽ ഉണ്ടാകാവുന്ന ഇത്തരം മഹാമാരികളെ പ്രതിരോധിക്കാൻ സഹായിക്കുന്ന ആരോഗ്യ സംവിധാനം ആവശ്യമാണെന്ന് ഐക്യരാഷ്ട്ര സഭ വ്യക്തമാക്കുന്നു.

കൊറോണ ലോകത്തെ അവസാനത്തെ പകർച്ച വ്യാധിയായിരിക്കില്ലെന്ന്
അന്താരാഷ്ട്ര പകർച്ചവ്യാധി തയ്യാറെടുപ്പ് ദിനത്തോടനുബന്ധിച്ച് പങ്കുവെച്ച വീഡിയോ സന്ദേശത്തിൽ ലോകാരോഗ്യ സംഘടനാ തലവൻ 'ടെഡ്രോസ് അദാനോം ഗെബ്രിയേസസ്' പറഞ്ഞു. അതിനാൽ ജനങ്ങളുടെ ആരോഗ്യം മെച്ചപ്പെടുത്തുന്നതിനുള്ള നടപടികൾ സ്വീകരിക്കണം. ജനങ്ങൾ മഹാമാരികളെ നേരിടുന്നതിനുള്ള തയ്യാറെടുപ്പുകൾ നടത്തുന്നതിൽ പുറകോട്ടാണെന്നും അദ്ദേഹം വ്യക്തമാക്കി.

കഴിഞ്ഞ ഏതാനും കാലങ്ങളായി ലോകത്തെ ജനങ്ങളിൽ ഭീതിയും അലംഭാവവുമാണുള്ളത്. മഹാമാരികളെ ചെറുക്കാൻ ധാരാളം പണം നാം ചിലവഴിക്കുന്നു. എന്നാൽ ഭാവിയിൽ ഇത്തരം സാഹചര്യങ്ങൾ ഉണ്ടാകുന്നത് ചെറുക്കാനായി യാതൊരു പ്രവർത്തനങ്ങളും ഉണ്ടാകുന്നില്ലെന്നും അദ്ദേഹം കൂട്ടിച്ചേർത്തു.

ശക്തമായ ആരോഗ്യ സംവിധാനങ്ങൾ ഉണ്ടായിരിക്കേണ്ടതിന്റെ ആവശ്യകത അടിയന്തിര സമ്മേളനം അടിവരയിട്ടു വ്യക്തമാക്കുന്നു. പ്രാദേശികമായും അന്തർദ്ദേശീയമായും പകർച്ചവ്യാധികളെ തടയുന്നതിനും പ്രതിരോധിക്കുന്നതിനുമുള്ള വിവരങ്ങൾ, ശാസ്ത്രീയ അറിവ്, മികച്ച രീതികൾ എന്നിവയുടെ കൈമാറ്റം, എന്നിവ ഉറപ്പുവരുത്തുന്നതിനായി അന്താരാഷ്ട്ര പകർച്ചവ്യാധി തയ്യാറെടുപ്പ് ദിനം ആചരിക്കാൻ യുഎൻ , ലോകാരോഗ്യ സംഘടനയോട് ആവശ്യപ്പെട്ടു