പുരുഷ വന്ധ്യതയിലേക്ക് നയിക്കുന്ന പ്രധാന കാരണങ്ങൾ
ബീജസംഖ്യയിലുണ്ടാവുന്ന കുറവ്,ശുക്ലത്തിലുണ്ടാകുന്ന അപാകതകളും ലൈംഗിക ബന്ധത്തിലുണ്ടാകുന്ന കുറവുകളും ,ശുക്ലത്തില്‍ ബീജമില്ലാത്ത അവസ്ഥ എന്നിവയാണ്.

ജീവിത ശൈലിയിൽ വന്ന മാറ്റങ്ങളും ജങ്ക് ഫുഡ് പോലുള്ള ഭക്ഷണങ്ങളും ബീജത്തിന്റെ ആരോഗ്യത്തെ വിപരീതമായി ബാധിക്കാറുണ്ട്. മദ്യപാനം പുരുഷ വന്ധ്യതക്കുള്ള ഒരു പ്രധാന കാരണമാണ്. പുകവലിയും പുരുഷന്റെ പ്രത്യുത്പാദന ശേഷിയേയും ലൈംഗികാവയവങ്ങളേയും ബാധിക്കും. ഇറുകിയ വസ്ത്രം ധരിച്ച് കൊണ്ടുള്ള ബൈക്ക് യാത്രയും ഒഴിവാക്കേണ്ടതാണ്.

വന്ധ്യതയുടെ ശരിയായ കാരണങ്ങള്‍ അറിയാത്തതുകൊണ്ടുകൊണ്ടും പുറത്തു പറയാനുള്ള ബുദ്ധിമുട്ടു കാരണവും പല ദമ്പതികളും പ്രശ്നങ്ങൾ അനുഭവിക്കുന്നുണ്ട്.

സ്ത്രീകളിലും പുരുഷന്‍മാരിലും വ്യത്യസ്ത കാരണങ്ങള്‍ കൊണ്ടാണ് വന്ധ്യതയുണ്ടാകുന്നത്. പുരുഷ വന്ധ്യതയ്ക്കുള്ള പ്രധാന കാരണങ്ങള്‍ നോക്കാം

ബീജത്തിലെ പ്രശ്നങ്ങള്‍
രതിമൂര്‍ച്ചയുടെ സമയത്ത് പുരുഷ ലിംഗത്തില്‍ നിന്നും പുറത്ത് വരുന്ന ശുക്ലത്തില്‍ നിന്നാണ് പുരുഷ ബീജം ഉണ്ടാവുന്നത്. പ്രോസ്റ്റേറ്റ് ഗ്രന്ഥി, സെമിനല്‍ വെസിക്കിള്‍, മറ്റ് ലൈംഗിക ഗ്രന്ഥികള്‍ എന്നിവയില്‍ നിന്നാണ് ഇത് പുറത്ത് വരുന്നത്. ശുക്ലത്തിലെ അപാകതകൾ , ലൈംഗീക ബന്ധത്തിലെ അപാകതകൾ എന്നിവയാണ് പരുഷ വന്ധ്യതയ്ക്കുള്ള പ്രധാന കാരണം. ഇതിന് പുറമെ ബീജസംഖ്യയിലെ കുറവും വന്ധ്യതയ്ക്ക് കാരണമാകാറുണ്ട്. ഒരു മില്ലി ലിറ്റര്‍ ശുക്ലത്തില്‍ ഒന്നരക്കോടിയിലേറെ ബീജങ്ങള്‍ ഉണ്ടാവുന്നുവെന്നാണ് കണക്ക്. എന്നാല്‍ ചിലരില്‍ ഇതിന്റെ അളവ് കുറയുന്നതാണ് പ്രശ്നകാരണമാകുന്നത്.

അസൂസ്പേര്‍മിയ
ശുക്ലത്തില്‍ ബീജമില്ലാത്ത അവസ്ഥയെ ആണ് അസൂസ്പേര്‍മിയ എന്നറിയപ്പെടുന്നത്. ചിലരുടെ ശുക്ലത്തില്‍ ബീജം ഒട്ടും കാണപ്പെടാറില്ല. ഇത് ചികിത്സയിലൂടെ ഭേദമാക്കാമെങ്കിലും പെട്ടെന്ന് തിരിച്ചറിയുകയാണ് ആദ്യം വേണ്ടത്. രണ്ട് തരത്തിലുള്ള അസൂസ്പേര്‍മിയ ആണ് പ്രധാനമായും കാണപ്പെടുന്നത്. ഒബ്സ്ട്രക്റ്റീവ് അസൂസ്പേര്‍മിയയും നോണ്‍ ഒബ്സ്ട്രക്റ്റീവ് അസൂസ്പേര്‍മിയയും. ബീജം പുറത്ത് പോകുന്നതിന് ജന്‍മാനാലോ പില്‍ക്കാലത്തോ ഉണ്ടാകുന്ന തടസമാണ് ഒബ്സ്ട്രക്റ്റീവ് അസൂസ്പേര്‍മിയ. ബീജോല്‍പ്പാദനം ഇല്ലാത്ത അവസ്ഥയാണ് നോണ്‍ ഒബ്സ്ട്രക്റ്റീവ് അസൂസ്പേര്‍മിയ. ചെറുപ്പകാലത്ത് കളിക്കുമ്പോഴോ മറ്റോ വൃഷണത്തിനേല്‍ക്കുന്ന ക്ഷതമോ അല്ലെങ്കില്‍ ജന്‍മനാ ഉള്ള ജനിതക പ്രശ്നം കൊണ്ടോ ബീജമില്ലാത്ത അവസ്ഥയുണ്ടാകാം .

ബീജത്തിന് അണ്ഡവുമായി സംയോജിക്കാന്‍ കഴിയാത്തതാണ് മറ്റൊരു പ്രധാന പ്രശ്‌നം. ഇതിന് കാരണമാകട്ടെ ബീജത്തിന്റെ ചലനം കുറയുന്നതാണ്.
ഇത് മൂലം ശുക്ലത്തില്‍ നിന്നുണ്ടാവുന്ന ഒറ്റ ബീജത്തിനും അണ്ഡവുമായി സംയോജിക്കാന്‍ കഴിയുന്നില്ല.

ബീജത്തിന്റ അസ്വാഭാവിക ആകൃതി കാരണം ചിലപ്പോൾ ബീജത്തിന് അണ്ഡവുമായി സംയോജിക്കാന്‍ കഴിയാതെ വരുന്നു.
വൃഷണത്തിലെ അണുബാധ, വൃഷണത്തിന്റെ ശസ്ത്രക്രിയ, വൃഷണത്തിന്റെ അമിതമായ ചൂട് എന്നിവയും വന്ധ്യതയ്ക്ക് കാരണമാകുന്ന പ്രധാന പ്രശ്നങ്ങളാണ്.

ചിലരില്‍ ബീജത്തിനെതിരെ പ്രവര്‍ത്തിക്കുന്ന ആന്റി സ്‌പേം ആന്റി ബോഡി എന്ന പ്രതിരോധ വസ്തുവും പ്രശ്‌നങ്ങള്‍ സൃഷ്ടിക്കും. ഇതുള്ളവരില് ബീജത്തിന്റെ ആരോഗ്യവും ശേഷിയും എണ്ണവും കുറയും

തുറന്ന് പറയാന്‍ മടികാണിക്കാതെയും ഏറെ നാള്‍ കാത്തിരിക്കാതെയും കൃത്യമായ ചികിത്സ തേടേണ്ടത് വന്ധ്യത പരിഹരിക്കാൻ അത്യാവശ്യമാണ്. ശാരീരിക പരിശോധന, ജനനേന്ദ്രിയ പരിശോധന, ശുക്ലപരിശോധന, വൃഷണപരിശോധന എന്നിവാണ് വന്ധ്യതാ ചികിത്സയില്‍ പ്രധാനമായും നടത്തുന്നത്. ഇതുവഴി ബീജത്തിന്റെ അളവ്, ചലനവേഗത, നിറം, ഗുണം, അണുബാധ എന്നിവയെല്ലാം തിരിച്ചറിയാം.