പെഷാവറില്‍ സ്‌കൂളിന്റെ മേല്‍ക്കൂര തകര്‍ന്നുവീണ് ഒരു അദ്ധ്യാപികയുള്‍പ്പടെ 29 മരണം
പാകിസ്ഥാനിലെ പെഷാവറില്‍ സ്‌കൂളിന്റെ മേല്‍ക്കൂര തകര്‍ന്നുവീണ് 28 വിദ്യാര്‍ത്ഥികളും ഒരു അദ്ധ്യാപികയും മരിച്ചു. 40ലേറെ പേര്‍ക്ക് പരിക്കേറ്റു. മേല്‍ക്കൂരയുടെ അവശിഷ്ടങ്ങള്‍ക്കിടയില്‍ കൂടുതല്‍ പേര്‍ കുടുങ്ങിയിട്ടുണ്ടോയെന്ന് കണ്ടെത്താന്‍ തെരച്ചില്‍ പുരോഗമിക്കുകയാണ്.
മരിച്ച 28 കുട്ടികളും 13 വയസും അതിന് താഴെയും പ്രായമുള്ളവരാണ്. ഇവരില്‍ ആറുപേര്‍ പെണ്‍കുട്ടികളാണ്. പരിക്കേറ്റവരില്‍ ചിലരുടെ നില ഗുരുതരമാണെന്നും വിവരമുണ്ട്. അപകടത്തില്‍ പാക് പ്രധാനമന്ത്രി ഷെഹ്ബാസ് ഷരീഫ് അനുശോചനം അറിയിച്ചു. പരിക്കേറ്റവര്‍ക്ക് മികച്ച ചികിത്സ ഉറപ്പാക്കണമെന്ന് അദ്ദേഹം അധികൃതര്‍ക്ക് നിര്‍ദേശം നല്‍കുകയും ചെയ്തു.
ഖൈബര്‍ പക്തുന്‍ക്വ പ്രവിശ്യയിലെ ദിര്‍ കോളനിയില്‍ പ്രവര്‍ത്തിക്കുന്ന സ്വകാര്യ സ്‌കൂളിലാണ് അപകടമുണ്ടായത്. സംഭവത്തില്‍ സ്‌കൂളിന്റെ ഉടമയെ പൊലീസ് അറസ്റ്റ് ചെയ്തു. അപകടത്തെക്കുറിച്ച് അന്വേഷണം നടത്താന്‍ ഡെപ്യൂട്ടി കമ്മിഷണര്‍ അഫാഖ് വാസിര്‍ ഉത്തരവിട്ടു. സ്‌കൂള്‍ കെട്ടിടം ശോചനീയമായ അവസ്ഥയിലാണെന്നറിയിച്ച പൊലീസ് അപകടത്തിന്റെ കാരണം പരിശോധിക്കുകയാണെന്നും വ്യക്തമാക്കി.
https://www.facebook.com/Malayalivartha
