മോമോസ് രുചികരവും വ്യത്യസ്തവുമായൊരു പലഹാരമാണ്. തണുപ്പകറ്റാന്‍ ടിബറ്റന്‍ ജനത ദിവസേന കഴിക്കുന്ന ആവിയില്‍ പുഴുങ്ങിയ ഭക്ഷണമാണ് മോമോ. മനുഷ്യന്റെ കരവിരുതില്ലാതെ ഉണ്ടാക്കാനാവില്ലെന്നു മാത്രം.

ചേരുവകള്‍

മൈദ                               - 2 കപ്പ്
ഉപ്പ്                                 - ആവശ്യത്തിന്
തിളച്ച വെള്ളം          - അര കപ്പ്

എല്ലാം ഒരുമിച്ച് ചേര്‍ത്ത് മൃദുവായി കുഴയ്ക്കുക. അല്‍പ്പം എണ്ണ തൂകിയ ഒരു പാത്രത്തില്‍ ഇട്ടു അടച്ചു ഒന്നര മണിക്കൂര്‍ വയ്ക്കുക. അതിനു ശേഷം, ഒന്നുകൂടി നന്നായി കുഴച്ച ശേഷം നാലു ഉരുളകളാക്കി മാറ്റുക. ഓരോ ഉരുളയും കനം കുറച്ചു ദീര്‍ഘ ചതുരാകൃതിയില്‍ പരത്തിയ ശേഷം 10 X 10 സെന്റി മീറ്റര്‍ ചതുരങ്ങളായി മുറിക്കുക. തമ്മില്‍ ഒട്ടാതിരിക്കാന്‍ അല്‍പ്പം മാവ് തൂകി ഒരു നനഞ്ഞ തുണി കൊണ്ട് മൂടി വയ്ക്കുക.

മസാലക്കൂട്ട് തയാറാക്കാന്‍

മഷ്റൂം ചെറുതായി നുറുക്കിയത്   - 1 കപ്പ്

ഇറച്ചി കൊത്തി അരിഞ്ഞത്  -  അര കപ്പ്
സവാള ചെറുതായി കൊത്തിയരിഞ്ഞത്  -  അര കപ്പ്
പച്ച ചീര കൊത്തി അരിഞ്ഞത്  -  അര കപ്പ്
പച്ചമുളക് - 2 സ്പൂണ്‍
മല്ലിയില    - 1 സ്പൂണ്‍
ഉപ്പ്  -  ആവശ്യത്തിന്
പഞ്ചസാര   -  അര സ്പൂണ്‍
സോയ സോസ്  -   1 സ്പൂണ്‍
എണ്ണ -  1 വലിയ സ്പൂണ്‍
ഇഞ്ചി അരിഞ്ഞത് -  1 സ്പൂണ്‍

തയാറാക്കുന്ന വിധം

എണ്ണ ചൂടാകുമ്പോള്‍ ഇഞ്ചി വഴറ്റുക. ബാക്കി ചേരുവകള്‍ എല്ലാം ചേര്‍ത്തു ചെറു ചൂടില്‍ വേവിക്കുക. ചൂട് മാറാന്‍ അല്പ സമയം വയ്ക്കുക.

കുഴച്ചെടുത്ത മൈദ പരത്തണം. ചെറിയ ചതുരകഷ്ണത്തിലാക്കി ഉള്ളം കൈയില്‍ എടുത്ത് ഒരു സ്പൂണ്‍ ഫില്ലിങ് നടുക്ക് വയ്ക്കണം. ത്രികോണാകൃതി വരുത്താന്‍ വശങ്ങള്‍ മടക്കി നല്ലവണ്ണം അമര്‍ത്തി ഒട്ടിക്കണം. ഇനി ത്രികോണത്തിന്റെ രണ്ടു കോണുകള്‍ ഒരുമിച്ചു കൊണ്ട് വന്ന് ഒന്നിന് മുകളില്‍ ഒന്നായി അമര്‍ത്തി ഒട്ടിക്കണം. ശേഷം മോമോസ് ആവിയില്‍ വേവിച്ചു ചില്ലി സോസ് കൂട്ടി ചൂടോടെ കഴിക്കുക.

അല്ലെങ്കില്‍, മാവ് പരത്തി കൈവെള്ളയില്‍ വയ്ക്കാവുന്ന ചെറിയ പപ്പടത്തിന്റെ വലിപ്പത്തിലും കനത്തിലും മുറിച്ചെടുക്കണം. അതിനു നടുവിലേക്കു മസാലക്കൂട്ട് വയ്ക്കണം. മൈദയുടെ അരികുകളില്‍പ്പിടിച്ചു മടക്കി മസാലക്കൂട്ടിനെ പൊതിയണം. നേര്‍ത്ത ഞൊറിവുകളിട്ട് രണ്ട് അരികുകളുംകൂട്ടി യോജിപ്പിക്കണം.